اعتراف........

[sarraj]

من وقت بتكون صغير ببلشو اهلك .. لا تعمل هيك .. لا تحكي بهالطريقة .. الفظ الحروف صح .. لا تقرط ولا تلدغ ولا تمط ولا تتبوجق... لا تلعب بانفك .. لا تحك الشو اسمو .. لا تطلب الشغلة هيك .. اطلبها هيك
طيب ليش ؟؟ لانو احسن .. مشان تصير متلك متل الناس المحترمة ..وزلمة طبيعي
بتروح عالمدرسة .. ببلشو الاساتزة .. لا تقعد هيك .. اقعود هيك ..طيب انا هيك مرتاح .. وقعدتي هيك ما بتضر حدا .. ما بهم ... اقعود منيح متل العالم والناس المحترمة .. خليك طبيعي

بس تجاوب علي صوتك و سمع الصف ..زقف لرفيقك زقفة طلائعية حتى لو ما كنت عم تسمعو .. حتى لو ما حكا شي عليه القيمة .. طيب ليش ؟؟

خليك متل الناس المحترمة .. خليك طبيعي
بتكبر شوي .. لا تراهق .. لا تكبر راس على اللي اكبر منك .. لا تتزعرن .. لا تعشق وتتمعشق.. عيب لساتك صغير .. لا تضيع وقتك بشغلات مو مفيدة .. لا تقرا هي الكتب .. لا تسمع هالموسيقى .. لا تعمل شعرك هيك .. وليش ؟؟
لانو هيك الصح وهيك احسن ..وهيك بتصير متل الناس المحترمة ... هيك بتصير طبيعي
بتكبر اكتر شوي ..ادروس هالفرع .. لا تدرس هالفرع .. حتى لو بتحبو .. مو هالشغلة .. خلاص ادروس شي الو مستقبل.. كبر عقلك واحترم غيرك حتى لو ما بيتساهل الاحترام .. ليش ؟؟
مشان تصير متل العالم والناس المحترمة ..وتصير طبيعي
بتكبر كمان .. لا تعصب .. خليك حكيم .. لا تتهور .. ولا تتولدن .. وكون قد المسؤولية.. لا تظهر مشاعرك لبنت بتحبها خليك تقيل العبها صح.. وليش ؟؟
مشان تبين متل الناس المحترمة ... وتكون طبيعي
طيب وبعدين ؟؟ طالما ما عم نموت رح نضل عم نكبر ونكبر .. وبدنا نضل نعمل شي لنصير متل الناس المحترمة ونصير طبيعيين.. انو لايمتى؟؟ ايمتى رح صير انا الطبيعي وغيري لازم يصير متلي؟؟
طيب شو مشان انا ما بدي كون متل الناس الممحترمة ولا بدي كون طبيعي ؟؟
مو لشي والله .. بس لانو لهلق ما عرفت شو الطبيعي .. ولا مرق معي هالناس المحترمة

بشوف كتير ناس عم تلدغ وتقرط بالحروف وتتبوجق بالحكي ومع هيك الها محبين ورفقات وناجحة بعملها وعايش حياتو .. واذا بتحكي معو بتحسو طبيعي
بشوف بمواقف معينة كتير ناس قاعدة بجعصة ... ورافعة رجلها بشكل ممكن اعتبارو غير لائق وغير محترم .. بس بكل بساطة بكون هو محور القعدة ومحط الاحترام كلو .. يعني كمان زلمة محترم وطبيعي
مرق على راسي كتير ناس (خصوصي اللي بكون صاحب منصب او سلطة او معو مصاري) بتحكي كتير .. وبتكون ردة الفعل .. يخزي العين عنو الله عاطيه طلاقة لسان
نفسو اذا قعد شي مرة وما حكا كتير .. بيطلع وااااااو زلمة رصين بيحسب كلمتو قبل ما يحكيها
وهلم جرا
طيب انا ما بدي كون طبيعي .. ولا بدي كون متل الناس المحترمة .. وبصراحة اكتر كل الناس اللي مرقو معي لهلق ما كانو طبيعيين .. وبالتالي المفروض ما يكونو متل الناس المحترمين بنوب
وحاليا اذا بتسالني .. انو لو بيجي واحد ومعو عصاية سحرية وبقلي فيني البخك بهالعصاية على راسك وبتصير طبيعي ومتل الناس المحترمة.. بس بدي تطلب مني هالشي
بصراحة ما بعرف اذا بعرف اني مو طبيعي .. بس ما بعرف اذا حابب كون طبيعي؟؟

[shadow81]

"على الرغم من انه زمان صعب الا ان الجميل فيه انه زمن سقوط الاقنعه "

اخي لا ترد انته طبيعي واللي عاجبو عاجبوا واللي مش هوه حر

[sarraj]

كاتب النص الأصلي : shadow81

"على الرغم من انه زمان صعب الا ان الجميل فيه انه زمن سقوط الاقنعه "

اخي لا ترد انته طبيعي واللي عاجبو عاجبوا واللي مش هوه حر

مزبووط كلامك

بس يعني الكل بيشوف انو انت ما طبيعي

شي بيحير

[shadow81]

كاتب النص الأصلي : sarraj

مزبووط كلامك

بس يعني الكل بيشوف انو انت ما طبيعي

شي بيحير

وحياتك دايما بتصير معي ههههههههههههه

[suzaan]

هلا الواحد لمن بدو يلحق كلام الناس

على طبيعي ولا بيروح على القبر وبيحكوا عليه

فساوي ألي بيرضي ربك وبيرضيك وفخار يطبش بعضو

صحيح انا قلت الكلام هاد كلو بس الواحد لازم يكون محترم بتصرفاتو

[Nay]

بتعرف شو!!!!
اسوأ شي بالحياة هوي الحكم على الآخرين .. والخوف من حكم الاخرين علينا..
لازم يكون الي أنا مجموعة قيم واهتمامات وخطوط حمرا او خضرا.. وانا لوحدي اللي بحددها وحسب نظرتي انا وبدون ما اعمل حساب لرأي من الاخرين..
واذا انت ملاقي حالك مرتاك انا بشد على ايدك وبصف جنبك..
على الهامش: بحييك على اسلوبك الكتابة.. كتير حلو..

[جلنارالغالية]

فيه حكمة تعلمتها وم وأنا زغير بالمدرسة انو أرضاء الناس غاية لا تدرك يعني اش ما سويت ما رح تزبط معك والناس رح تضل ما عاجبها حالتك فأحسن شي الواحد فينا يساوي ياللي ببالو وما يرد على حدا

[sarraj]

كاتب النص الأصلي : suzaan

هلا الواحد لمن بدو يلحق كلام الناس

على طبيعي ولا بيروح على القبر وبيحكوا عليه

فساوي ألي بيرضي ربك وبيرضيك وفخار يطبش بعضو

صحيح انا قلت الكلام هاد كلو بس الواحد لازم يكون محترم بتصرفاتو

مو قصة كلام الناس بس التعليقات و النصائح الي من نسمعا و كأنو ما عم نعرف نساوي شي بالحياة

دائما نحن على خطأ و هنن على صح

انا عم بعمل الي بيرضي ربي اولا و تاني شي اثبت لنفسي اني شخص طبيعي

شكرا على مرورك

[sarraj]

كاتب النص الأصلي : Nay

بتعرف شو!!!!
اسوأ شي بالحياة هوي الحكم على الآخرين .. والخوف من حكم الاخرين علينا..
لازم يكون الي أنا مجموعة قيم واهتمامات وخطوط حمرا او خضرا.. وانا لوحدي اللي بحددها وحسب نظرتي انا وبدون ما اعمل حساب لرأي من الاخرين..
واذا انت ملاقي حالك مرتاك انا بشد على ايدك وبصف جنبك..
على الهامش: بحييك على اسلوبك الكتابة.. كتير حلو..

فعلا اسوأ شي هو الحكم على الأخرين

بس لسا الأكبر من هيك لما نحكم على أنفسنا يا ترى منقدر نقيم حالنا بحالنا ؟؟

شكرا على مرورك الرائع

[sarraj]

كاتب النص الأصلي : جلنارالغالية

فيه حكمة تعلمتها وم وأنا زغير بالمدرسة انو أرضاء الناس غاية لا تدرك يعني اش ما سويت ما رح تزبط معك والناس رح تضل ما عاجبها حالتك فأحسن شي الواحد فينا يساوي ياللي ببالو وما يرد على حدا

[Nay]

كاتب النص الأصلي : sarraj

فعلا اسوأ شي هو الحكم على الأخرين

بس لسا الأكبر من هيك لما نحكم على أنفسنا يا ترى منقدر نقيم حالنا بحالنا ؟؟

شكرا على مرورك الرائع

انا بحس انو الشخص هوي أكتر حدا بيقدر يقيم حالو.. الا بأحوال كان شخص مانو متوازن..
وبحس انو تقييمي لنفسي من وقت كان عمري 15 سنة ولحد هلأ.. حسن من شخصيتي كتير.. وعلمني كيف اتحكم بنفسي وبأطباعي السيئة..
مافي مشكلة انو الواحد يسأل الناس القريبين منو.. بس مو لازم يكون خايف من حكمون عليه

[saman]

طيب انا ما بدي كون طبيعي .. ولا بدي كون متل الناس المحترمة .. وبصراحة اكتر كل الناس اللي مرقو معي لهلق ما كانو طبيعيين .. وبالتالي المفروض ما يكونو متل الناس المحترمين بنوب

انا بدي كون انا .. ما بدي كون اي حدا تاني .. ما بدي اشبه حدا تاني

من زمان ضليت فكر انو انا ليش ما عندي شي مميز ... ليش ما بمرض كتير .. ليش ما عندي صوت لو للغناء .. ليش ما بقدر ضحّك العالم .. متل رفقاتي .. ليش ما فيني كون متفوق بدراستي متل الباقي .. ليش ما بعرف ارسم .. ليش ما بكتب شعر .. ليش ليش... لحد ما مريت بفترة كنت عم عاني فيها من عقدة نقص ...

بعدين اكتشفت انو انا .. متل ما انا ... انا مميز ... بجوز لأنو ما عندي كل هالشغلات انا مميز ..
فررت من وقتها كون انا متل ما انا .. ما حاول غيّر بحالي تغييرات جذرية ... ما بدي اعمل اشيا لارضي هاد وخلي هاد ينبسط مني ... المهم كون انا مبسوط وانا مرتاح .. وبس

[ِAbu Alzooz]

ربوط القديش محل ما بيئلك صاحبو

و فخار يكسر بعضو

[ابو نجبو]

شوي من هون شوي من هنيك.....

يعني ..حسب رأيك...الترباية مالها أي دور...ويالله خلي كل واحد يربّي حالو و يصقل شخصيتو بنفسو ....

وعلى فرض انّك مقتنع بشي فكرة ...ومؤمن فيها جداً ...مابتنقلها لابنك!! ...حتى لو بالغصب...

[marochka]

في شي صح وفي شي شوي مختلط ببعضو بهل الحكي، يعني أنا ما فيني شوف ابني اللي عمرو 5 سنين عم يمسح ايديه بتيابو هو وعم ياكل وما علمو أنو ما يعمل هيك، وما فيني شوفو عم يقرا القاف متل الكاف وما صلحلو ياها، بس كل ما يكبر دور الأهل بيتغير شوي شوي، المهم أنو الولد يفهم كل شغلة ليش عم نمنعو عنها. بس هاد ما بيعني أنو بكرة بس يكبر إذا حب يطول شعرو حتى لو أنا ما بحب هالشي إني أمنعو، لأنو في فرق بين شي بمنعو عنو لأنو بيأذيه أو بيأذي غيرو، وبين شي بيتعلق فيه هو بس وحريتو الشخصية.
أما موضوع أنو الواحد يصير متل الناس الطبيعيين أو المحترمين فهاد شي نسبي كتير، وكل مجموعة بشرية بتحس أنو إلها قواعد مختلفة لتقييم العالم والقواعد غالباً بتتغير بشكل مستمر، المهم الواحد يتعلم يسمع آراء غيرو ويعمل اللي هو مقتنع فيه ويتقبل إذا غيرو ما عجبو تصرفاتو.

[sheldi]

اولا بتشكرك هالموضوع حلو وبيواجه كتير ناس ياسيدي هي فكرة الشخصية المحترمة او الأفضل تسميها المبروظة هي احدى الأحلام الخرندعية بسوريا انا غادرت سوريا وكنت بعرف هالافكار وشو بيصير وشو مابيصير وعقد.

بالجامعة اللي كنت ادرس فيا كان في بروفسور شب, شخصية كتير كتير لطيفة ومشهور بميدانه ياسيدنا بيضل لابس خلال شغلوا تياب اقل من عادية ومرة من المرات نصدمت انو هو وفريقوا اللي عما يشتغل معو عما يلعبوا كرة طائرة انا بالبداية نصدمت بس بعدين زاد احترامي الو عتواضعو الفكرة من هالحكي انو الشخصية المحترمة هيي المحترمة بعملا وبتواضعى اما بالنسبة للاهل فهني عايشين بالمجتمع و بيعرفوا العادات والتقاليد فهني بالصغر بيحاولوا يعلموا للابن وهني بيحكو هيك من المحبة بس لما الواحد بيكبر لازم يكون للاهل دائما كلمة بس كمان الك رأيك بحياتك وأمورك الشخصية فياسيدي تصرف عراحتك لبس و طول شعرك اوقصرو وحب وعشق بس لا تشطا هاد هوي الطبيعي والناس شو ماعملت قسم رح يحبك وقسم راح يكرهك وبكرا بالايام اذا صرت شي شخصية محترمة يعني عندك مصاري كتير اللي بيحبك وبيكرهك كلو بيعجب فيك.

[zen]

هلق بمانو ناي جاوبت فعطت كتير من اللي بدي قولوا
انا مثالا عشت فترة كبيرة من صراع
كيف بدي كون و ليش ةشلون
واخر شي وصلت
لطريقة تفكير انا اخد اللي بيهمني ةكب الباقين
و بما انو انا مرتاح وبدون ما أذي حدا فما بيهم شو رأي هالحدا
لانو انت مرتاح ولو هوي بيحبك كان بينبسط لانك مرتاح
طبعا بمجمع متل عنا اجباري بدك تتعذب و تضايق
بس فيك توصل لاحسن شي ممكن

[مملكة الورود]

أنا رأيي كمان بكلامك في شي صح وشي غلط
برأيي الأهل لما يكون ولادن زغار واجب عليهون تربايتن وارشادن
وبس يكبر ولادن بس بيقدرو أن يشيرو عليهن ويقترحو عليهون
مو يأمرو واذا ما صار اللي بدن اياه يزعلو وما الى ذلك
تاني شي خصوصا الولد لما يكبر ويصير عندو عيلة بظن انو الأهل اذا بدن يدخلو بأبنن المتزوج بكون فيون مرض اجتماعي وهو مرض التسلط والتحكم بالغير..

وبعدين انا حاسة انك لساتك مو متجوز وعندك ولاد
لأني متأكدة انو الواحد بس يتجوز ويصير عندو ولاد بعيد نظرو بترباية أهلو لألو لما كان زغير وبيعرف انو بأكتر الشغلات معن حق فيا
وبعدين أنا برأيي أبشع شي بالدنيا هو انو الواحد يحسب حساب للناس وحكي الناس
عندي قناعة انو كن كما انت
كن على طبيعتك كما خلقك الله
ولا تعطي بالا للناس
لأن ارضاء الناس غاية لا تدرك...

يسلمو عالموضوع