بخصوص حفلة زياد

[MadMax]

مبارح كانت الحفلة الأخيرة لزياد الرحباني بقلعة دمشق

و متل ما شفنا ... اختلفت الآراء بتقييم هالحفلة

بس حسب ما أنا شفت أنو الآراء اختلفت بس بعدين بالحديث عن الحفلة

أما بأثناء الحفلة .. فــ اتفقوا الكل على أنو ..... منيحة




هلأ بالمجمل .. أي فنان لما بدو يقدم أعمالو أمام جمهور جديد .. ما بيعرف عنو شي ..بفضل ما يجازف .

فـ بحاول يقدم أعمالو المعروفة ( أو متل ما بقولو الـ best of شيتو* ) يعني الأعمال يللي بكون متأكد من نجاحها
و هيك عمل زياد السنة الماضية

أما هالسنة ... شفنا أشيا جديدة ..شفنا أشيا مش كتير معروفة .... بس اشيا مهمة

شفنا برنامج متعوب عليه ... شفنا شغل واضح غير مجرد موسيقى

شفنا زياد على طبيعتو و آخد راحتو

يعني باختصار .... شفنا زياد يللي منا و فينا




هلأ بحسب وجهة نظري اختلف تقييم الحفلة بين الجمهور .. على نوعية الجمهور

يعني يللي بيسمعوا بـزياد ....فضلوا حفلة السنة الماضية

أما يللي بيسمعوا زياد فـ ..... حبوا حفلة هالسنة أكتر ( رأي شخصي )

فـــ يا ريت من يللي حضروا الحفليتين ... يخبرونا اي حفلة فضلوا
وشو ميّز الحفلة يللي فضلوها ... عن الحفلة التانية

*شيتو = خاصتو

[..AHMAD]

انا صوتت للـ 2009 ، حبيتا اكتر ، لانو زياد ما كان نفسو زياد السنة الماضية

اللي كان السنة الماضية ، كان مغني وعازف فقط

بينما زياد هالسنة كان طبيعي اكتر ، وكان زياد بكافة جوانبو ... وجزء من جانبو السياسي - الساخر ... كان موجود

لما يكون شخص قادر يظهر كل هالشي ... ويقدر يحقق كمية هالنجاح
فـ هي بتكون حفلة استثنائية جداً

[لامار رمز الدمار]

لاسف انا ماحضرت ولا حفلة من كتر ما شفت باخوية بيحبوا زياد صار عندي شغف تابع اعمالوو
هلئ بوشي على موضوع اعمال زياد
ورح تابع الاستبيان
مرسي ميداكس

[achelious]

الحفلة الماضية كانت اتقل فحسب, انو كان فيا موسيقى أكتر ..

أما الحفلة الأخيرة فكانت منوعة .. بس مو أقل!
أهضم للي ما بيعرفوا زياد , كوني بعتبر انو الموسيقى الي بيقدما أهم بكتير من باقي الاشيا
هو موسيقار بالنهاية.

وماتبقى بوافقك الرأي شيتو

[اممي]

شو منشان الي ما قدرو يحضرو ولا وحدة منن؟؟

بس بكل الاحوال بالعادة اول حضور بيكون دوما غير
ان فكرة وجودك ضمن نفس القاعة مع هالشخص الي كتير بيعنيلك باعمالو والي كان كل علاقتك فيه بتم عبر السيديات والراديو وفجاة بتشوفو عالحقيقة ...ان شي غير
واذا قدر زياد بالحفلة تبع هالسنه يظهر احسن من السنه الماضيه فهالشي كمان مو غريب عليه لان الزلمة اكثر من فكرة حدا بيعزف نوطة او بيغني كم مقطع ويرجع عبيتو ...باعتقادي روح زياد راح تخلي اي حفلة يقدمها الها خصوصيتها الي مافيك تقارنها باي حفلة بيعملها قبل او بعد

[مش هيك بيكون الحكي]

يعني بالحقيقة ما في تفضيل بين الحفلتين لأنو كل وحدة الها جوا
وحتى لو كنت صوتت للحفلة التانية
فلأنو يعني كان ناقصنا نشوف هالسكيتشات live مو أكتر
الحفلتين أحلى من بعض واللي ما حضر عن جد راحت عليه



ملاحظة: لمن لم يحضر الحفلة يمكنه سيعيد زياد نفس الحفلة في بيروت على مسرح قصر الاونيسكو في 24/25/26/ تموز

[رجل من ورق]

لكل منون جوها الخاص ومتل ما قلت سامر لما بدو يجي اول مرة بيقدم البيست اوف
وهالمرة اخد راحتو اكتر تحرك عالمسرح قدم اكتر واكتر
النقطة الخلافية الكبرى كانت انو السنة الماضية كانت منظمة اكتر بكتير من هالسنة وهاد ادى انو الى حد ما تتفوق حفلة السنة الماضية عليه
اجمالا بيضل زياد عارف ومخطط شو بده
يعني حفلة السنة الماضية كانت شبيهة بحفلة فيروز الا شوي وهالسنة الحفلة لزياد وواضح انو ولاشي من اللي قدمه بيشبه اللي كان بالحفلة الملضية

[ابو ريتا]

أنا صوتت لحفلة السنة يعني 2009 لسببين الأول : انو حفلة السنة الماضية ما حضرتا . التاني : حفلة السنة كتير حسيتها مميزة كانت موجودة رشا رزق, وعازف السكسفون هو من أعضاء الفرقة الوطنية السورية , يعني زياد جمع الناس الي هنن الأفضل و عمل مونتاج للصوت شي رائع بعمرو عنا ما حدا فيه بيساويه طبعا كان كتير حلو برنامج العرض انو موسيقا وغناء وكلام ,,, وفعلا هيك كان وقدّم بالفعل عدة مقطوعات موسيقية من ( منيحة ) , و أكتر شغلة لفتت انتباهي هي الصوبيا , حدا منكن بيعرف ليش كانوا مركبّين صوبيا ؟! للوهلة الأولى كنت مفكّر انو زياد بدو يسخن ابريق متة ....

[Abu Guzef]

هلا الحفلة تبع هي السنة احلا من السنة الماضية بس الترتيب بالسنة الماضية أزبط كان حاطين الستيج عاليمين وجاي صفة الكراسي بالعرض فكان الشخص اقرب منو من هي السنة حاطينو بالصدر بس انو بتحس ازا من كنت من جماعة الالف متلي انا انو انت بوادي وزياد بوادي اللهم الا شاشات الإسقاط اللي أنقذت الموقف شوي

الحفلة تمام السنة بالنسبة للاغاني وهيك

الحفلة السنة الماضية احسن من السنة من ناحية الموقع

[MadMax]

كاتب النص الأصلي : achelious

بعتبر انو الموسيقى الي بيقدما أهم بكتير من باقي الاشيا
هو موسيقار بالنهاية.

أنا ما بتفق معك انو الموسيقى هيي الجانب الاهم عند زياد ( مع أنو هو أكتر شي بيرتاح بهالجانب )

يللي عطى زياد قيمتو الحقيقية برأيي ..... هو المسرح ...و الأغاني الملتزمة و البرامج الإذاعية .. بالإضافة لكتاباتو القليلة

يعني بالمختصر كل منبر بيقدر يعرض فيه رأيو و الأفكارو




يعني الفكر و الرأي و الجرأة ...... هو أهم ما في زياد

[MadMax]

كاتب النص الأصلي : اممي

شو منشان الي ما قدرو يحضرو ولا وحدة منن؟؟

قريباً منحاول نحطلون شوية مقاطع فيديو