بدون تكليف

[yass]

شو حلو تطلع فيك شاشة الموبايل، يتنططلك شي رقم ، يمكن ناطره و يمكن لآ، تتجاهل كلمة "رد" أو "رفض" ، يملكك شي من حنين لما فاتك من ارتكاب لعشق المراهقين او جبروت البالغين ، انو هالشخص يلي عم يرنلك و يمكن ئاعد بالطرف التاني من الكرة الأرضية كل همه و تفكيره أنك ترد عليه، و انت بس عم تصفن بالشاشة عم تضوي و مرتاح تماما انو أخيرا تأكدلك شي مرة انو في حدا عم يفكر بس فيك بهاللحظة بدون ما يكون في حيرة عندك انو يا يا ترى عم اخطر عباله او لآ بس انت مابدك ترد عليه!هيك لمجرد أن تعذبه..و لتضحك قليلا.

فأنا
اتسلى بتعذيب البشر في غربتي
يوميا

شو حلو تتحرر من ارتبا طك بكل شيء انت عبد له متمسك فيه لتحس انك عايش.

شو حلو ما يعود يهمك حدا. او انك تفهم حدا أو انك تفسر حالك لحدا ، او شلون ممكن الواحد يعيش مع حدا ولحدا.

شو حلو أنو تقرا قصايد العشق ، نفس القصيدة يلي كانت عم تبكيك من سنتين ، وتحكي لحالك " ولك مين كاتب هالغبا تبع : انت السما و انت الأرض وانت هادا الشي يلي بين السما و الأرض"0

شو حلو انو تسلّم أن كل هذه المصطلحات من: يمين و يسار و معتدل ،شيوعي ، ريديكالية ، اشتراكية امبريالية،متشدد ثورجي و قومجي ،أنسانية، عربي ، سوري ، يهودي مسيحي مسلم اسماعيلي درزي شركسي ، علوي و شيعي اخترعها شخص ما ، مات ، لكن بقيت وراءه هذه المصطلحات التي لن افقهها يوما. ويلي قرأت تعريفاتها مية مرة ، وبرجع بنسى مين كان مين.0

شو حلو تفتح صفحة بيضا و ما فيك تمليها ، لأنو كل شي بمخك نزلتو على ورق، و كل شي بقلبك شخبرتو يعني مساحة العمل بمخك كانت عبارة عن 30 صفحة و مساحة الأحساس بالقلب كانت يمكن 30 شخبرة و من ثم توقف العمل لأنه هذا المخ لم يحمل كل مساحة هالتفكير و القلب ما حمل كل هالضجيج .0

شو حلو تبطل تحس انو فلسطين هي اول الدنيا و هي آخر الروح، شو حلو ما تحس و بس .. لا رح توصل لأول الدنيا و مو بأيدك آخر الروح.

شو حلو تطلع بعيون العالم وقت يحكو.

شو حلو تسمع عيونون شو عم تحكي ، و يهربو من عيونك ، بعد ما كنت انت يلي تهرب بعيونك من العالم.

وشو حلو تصير الساعة شي 4 الفجر وعندك هالأحساس انو انت أنسان بهالدنيا. بدون تكلف ، مش فاهم أشي. مش ماسك أشي ، مش عارف أشي( هيك تحكي مع حالك بالفلسطيني، لأن مابتعرف تحكي مع حالك بالسوري) أنو شو هادا تجاهل للكينونة؟ 0

شو حلو شباك الكنيسة يلي ماسكينو كل العالم و بيئعدو قباله كل ليلة، بيطلعو فيه، بيحكوله كل شي ، و بعدين بيفصلوا الخط ليقدروا يناموا.. يعني مو طبيعي كيف جينات البشرية بتشتغل!! و ان بطلت تروح عالكنيسة لتئعد ئدام الشباك و تعترف للشيخ بكل الخطايا، لأنو أغلب المصطلحات القاضية بتحرر البشرية طلعت ضد هالشي، فاشتغلت الجينات و اخترعت شباك يومي بدل ماكان اسبوعي!! 0

شو حلو لما تطلع بخلئتك مشكلة، تحكي لشو عصب ، لشو انقهر، يمكن بكرا موت، و يبطل فيه مشكلة.

شو حلو انو العالم تقرا هالتدوينة و تحكي : يااااي شو حلو، و هز براسي اني مسدئة أني شي حلو...0
يحرئ كفر الوسادة الخالية...مع الخبز الحافي...

____________________________________________

من

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

[هشام ابو شرار]

شي منظوم وجلو.....خرج القراءة

[بروليتاري]

شو حلو أني أتمعن بهيك كلمات

وأعرف حالي أنو مافي شي أتمنى عيشو من بعدون

وشو حلو أني أعرف أنو بعد هالكلمات اني وصلت لاخر احاسيسي

وشو حلو بعد هالكلمات اني عرفت انو ما ضل شي اكتبو

شو حلوين شكرا

[Miss Petals]

شو حلو تتحرر من ارتبا طك بكل شيء انت عبد له متمسك فيه لتحس انك عايش.

شو حلو ما يعود يهمك حدا. او انك تفهم حدا أو انك تفسر حالك لحدا ، او شلون ممكن الواحد يعيش مع حدا ولحدا.

شو حلو أنو تقرا قصايد العشق ، نفس القصيدة يلي كانت عم تبكيك من سنتين ، وتحكي لحالك " ولك مين كاتب هالغبا تبع : انت السما و انت الأرض وانت هادا الشي يلي بين السما و الأرض"0

agree with all what you have said pal...and this is exactly what i'm feeling now

[i m sam]

شو حلو لما تطلع بخلئتك مشكلة، تحكي لشو عصب ، لشو انقهر، يمكن بكرا موت، و يبطل فيه مشكلة.
انا صرلي فترة مو قليلة عايش هيك
مخلي بكرا لبكرا

[Miss Petals]

u remind me by this song for Cat stevens....father and son...
Its not time to make a change,
Just relax, take it easy.
Youre still young, thats your fault,
Theres so much you have to know.

[satoman]

شو حلو وشي حلو

[شوط ياقمر]

كاتب النص الأصلي : yass

شو حلو تتحرر من ارتبا طك بكل شيء انت عبد له متمسك فيه لتحس انك عايش.

شو حلو ما يعود يهمك حدا. او انك تفهم حدا أو انك تفسر حالك لحدا ، او شلون ممكن الواحد يعيش مع حدا ولحدا.

هادا هوي .. يلي ماعم ائدر اوصلّو ..

واذا على هلسحبة .. فا ماأظن ..

كتير ميرسيات ياسينو .. انو زكرتني .. بما معناه .. دورت الموتور عن جديد .