[yass]

يااااااااااسووووووو ...
رح حاول اكتب التلاتين سؤال فرد مرة تفاديا ً لانو ما الحق أسألن متل ما صار وقت حسان ..
رح تكون الأسئلة مقسمة مجموعات .. ...
منبدا







لو :

1- لو رئيس سوريا شو بتعمل ؟

حسب بأي صيغة أنا رئيس... اذا رئيس من اللي بالي بالو استقيل..

اذا رئيس ديمقراطي اشتغل بأمانة في سبيل انو ما يظل سوري واحد محتاج يهاجر لأي سبب كان

2- لو في لقاء مع الله شو بتقول ؟

بسألو اذا بيؤمن فيني

3- لو بدك تحكي بمجلس الأمن عن شيء بيخص سوريا ومعك دقيقة وحدة شو بتحكي ؟

بطالع معي مسجلة و بحطلهون علي الديك و بقلهون انو هاد سلاح دمار شامل يا بيرجعولنا الجولان و اللواء يا بنبعتو ع مسارح برودواي

4- لو أنت مكان حسام بأخوية شو بتغير ؟

عالأغلب السمايلات

و كمان حدا يشرحلي اذا حدا باع و اشترى بالبسطة شي؟

5- لو بدي شوفك هلق وين منروح ؟؟


ع وانيس بس انتي بتدفعي



خلينا نتفق انك شخص مميز ..

1- شو اللي بيجعلك مميز ؟

ماني مميز بشي أنا... أنا شخص عادي جدا و ما عندي أي شي يميزني يعني... عن جد

2- شو الشي اللي بيجعلك غير راضي عن نفسك بس ما عم تقدر تغيرو ؟

الكسل ماني رضيان عنو, بس ما جرّبت اغيرو أو أخلص منو....... متكاسل

3- شو أكتر شي بيحسسك أنك مختلف .. وبيحسسك بالغربة ؟

راح قلك شغلة... أنا حسيت حالي مختلف بسوريا أكتر من هون, خلال طفولتي يعني... ما بعرف كنت حالة نوعا ما جديدة بالرقة انو ابن أجنبية و بيحكي "أجنبي" ...فكانو حتى آنساتي حاطيني تسالي, و ولاد المدرسة يعني كانو يضايقوني أحيانا مجرد فضول يعني... متل انو كترة الأسئلة عن "الاجانب" و انو كيف الشغلات برا و هيك...و كانو بيتمسخرو علي لأنو كنت آخد صندويشات صمون و ملفوفة بورق هاد الالمنيوم (يعني بهديك الأيام فضيحة)

مرة امي اجت تاخدنا أنا و اختي من المدرسة.... يا خيبتي ع هالفضيحة التمّت كل المدرسة... لو زياد (سبايك) هون هلأ كان تذكر

يعني ما عانيت أنا لأنو تعودت يعني و ما كان في هالأزعاج, بيجوز بس أول سنين الابتدائي لأنو عربيتي مكسّرة و كتير كتير حسّاس كنت بصغري.... بعدين تمسحت و صرت جفص

4- شو الشي اللي ممكن يبكيك ؟

ما ببكي تخنقني العبرة. بالكتير.....

الظلم و القهر..... و الحزن أكيد

و يعني و لما الواحد يشربلو كاسين زيادة و تطلع المشاعر و الأحاسيس الدفينة و تصير تحب كل العالم
5- شو الشي اللي بتقول بقلبك انت وعم تتعامل " معي " .. أخ بس لو ما كانت هيك ؟

ما بقول شي......

هو التعامل معك حلو و منيحة مافي متلك و تسالي...... المشكلة انو الدكتور مانعنا نقلّك منشان ما يكبر راسك و تعودي ما تنحملي


أنوثة وبنات

شو اللي بيضيفو حضور الأنثى بحياتك ؟

اذا بقول و لا شي بكون عم اكذب....كل انثى هي كيان مستقل (واللي بيقول انو كل النسوان متل بعض بيكون مصاحب بنات بيشبهو بعض ) كل وحدة تضيف شي بصفات معينة و كميات معينة, هلأ على اعتبار لساتني عم اتعالج من آخر كلاش عاطفي ما فيني كتير أفصّل و أزيد..... متل المتخوم اذا بتسأليه شو بيحب ياكل عالعشا.... ما خرج

وشو التأثير السلبي لحضور الأنثى بحياتك لهلق ؟

مفهوم الكلاش العاطفي.... للصراحة هو مو تأثير سلبي للانثى انما للعلاقة... و العلاقة هي بين 2, يعني كمان فشل علاقة ما مسؤوليتي كمان


بكلمة وحدة .. انت مستحيل تحبا .. إذا كانت ( ؟؟؟؟؟؟ )

جاهلة... ما بيهمني شو اهتماماتها أو تفكيرها... بس انو يكون عندها اهتمامات اكيد

انت مع الجنس قبل الزاوج ؟

أي و كمان بعد الزواج بيصير مو عيب

أنت مع الزواج من أصلو ؟ عرفلنا الزواج

أنا ماني مع الزواج, و اذا ماني مضطر ما راح اتزوج.. أتفهم قدسية الزواج بالنسبة للمؤمنين لكن أنا ما يعنيلي شي

الزواج هو عقد عم يتفقو فيه 2 انو بس يتطلقو كيف يتقاسمو

وبالطريق عرفلنا الحب

لما بشوف الحبيبة و يصير تسارع نبضات القلب و ارتفاع توتر شرياني و احمرار الوجه و تسارع التنفس و هيك متل القرصة بمكان القلب.... هاد هوي الحب (كمان ممكن يكون معك اضطراب نظم بالقلب )

وبعدا عرفلنا الجنس ( افترضت لحالي .. أنو مع خانة الأنوثة والبنات .. إذا غير هيك صلحلي )

أي افترضتي صح.... تضربي
الجنس حاجة فيزيولوجيا و هي طريقة تعبير عن الحب, شغلة حلوة و ممتعة كتير.... لو في منها أكتر كان وفّرنا ع حالنا أكتر من نصف حروب الكون

هلق نيالا اللي بتحبك لأنو ؟؟؟

لأنو لقت فيي شي بتدوّر عليه.... كان ما حطت عينها علي

ويكون بعونها لأنو ؟؟؟

لأنو مو سهل التعامل معي..... عندي نفسية الله يعين الناس عليها

باقي واحد ولو مشان يصيرو عشرة ... مارال .. شو الشي اللي انت ربيت عليه وما رح تنقلو لمارال ؟

راح اعتبر حالي أب ممتاز اذا قدرت أربي ولادي على الشغلات اللي ربيت عليهون

كتب :

كام كتاب في بمكتبتك ( عم انوي اجي الطشن ) ؟

يعني بين الموجودين عندي هون و اللي بسوريا حوالي الـ1000 برياحة

اكتر كتاب قريتو " يعني قريتو اكتر من مرة " ؟

رأفت الهجّان لـ صالح مرسي: فوق العشرين مرة
ليون الأفريقي لـ أمين معلوف: =========
السقا مات لـ يوسف السباعي: =========
1984 لـ جورج أورويل: شي عشر مرات
سمرقند لـ أمين معلوف: شي 10 مرات
موانئ المشرق لـ أمين معلوف: أكتر من 5 مرات
كل كتب الماغوط و نجيب محفوظ: على الأقل خمس مرات
و كتير من الكتب قاريهون مرتين و تلاتة... الكتب لكتّاب مشهورين عالميا بحاول أقراهون بالعربي و الاسباني

كتاب قريتو وما حاز اعجابك بنوب ؟

القرن الأول بعد بياتريس لـ أمين معلوف: هالزلمة برا الرواية التاريخية البحتة بيضيع
مدينة الوحوش لـ ايزابيل الليندي: من بعدو بطّلت اقرالها لأنو صارت تجارية كتير... كل سنة كتاب كيف ما كان



لو انت كتبت كتاب شو رح تسميه ؟

مو لنكتبو أول شي؟؟

إذا رح تهديني كتاب شو بيكون ؟ وشو بتكتبلي على أول صفحة ؟

الهدس لـ أستاذي ابراهيم الخليل.

بوقّع بس و حط التاريخ و السعر

صور :
رح حطلك خمس صور ...وبدي تكتبلي أحلى شي بتتذكرو بخصوص هالصورة ..



شايفين الباب الأخضر ورا التمثال؟ هاد باب بيتنا بسانتياغو. الشبابيك البيض لألنا الطابقين, و الشباك اللي مغطيه راس التمثال هاد شباك غرفتي....

أحلى شي؟؟؟ أي نص حياتي هون شو أحلى شي



هالبناء هاد هوي كلية الطب بجامعة سانتياغو.... أحلى شي بتذكرو؟؟ عشقاتي و صحابي أكيد



أخوية!!!! شو بدي احكي لأحكي.... عالم من الابداع و الثقافة و التسلية... شهادتي فيها مجروحة


هاد حسام ملحم "عاشق من فلسطين" الله يفك أسرو و يرجعو لأهلو و حبايبو.... شو بدي أحكي يعني, عم اتحطم جواتي لأنو عم يضيع شبابو يا حرام

بدي كل واحد من اللي بيفسفسو و يحكو شروي غروي يحطو عينهون بعينو و يقولولو "انت خاين" ..... احكوها اذ كنتو رجال!

لو عندي سلطة بهاللحظة كان رحت طالعتو.. ضمدتلو جروحو و عطيتو كتفي لحتى يبكي كل دموع القهر... بشتريلو لترعرق و بعطيه ورقة و قلم........ و نسهر للصبح

الحرية الو و لكل أسرى الضمير

هاد علم سوريا... مجرد علم لمجرد بلد
علم عادي لبلد عادي.... بس هالبلد العادي هوي بلدنا
ما بعرف شو احكي ذكريات.... بس فيني احكي شغلة وحدة

اللي ما شرب مية الفرات ما ارتوى... واللي ما أكل فول ببوز الجدي ما بيعرف طعمة تمّو





بس هدول ...