[اممي]

كاتب النص الأصلي : ابو ريتا

ما بعرف ..بيطلع بها الأيام بالحي صوت بيانو ، باسمعه بيكون ، وبكون ميّت بها الأوضة ، صوت بيانو الساعة عشرة ع بكرة ، بطأة المجتمع ال..عجيب ، مش معروف من أي بناية ، من أي طابق ، بَطُلْ أشوف بركي باعرف منين ، ما بعرف ، باصير باطلّع ما بيطلع بوشّي إلا غسيل منشور ..بكثافة ..من أجل النضافة ، والبيانو بيدندن ، مش باعرف اتجاهه ، ما بس تدب الحياة بالمجتمع وبالاسعافات ، صعب تحدد من وين مارقين وبأي ميل طلع صوت أو طرب أو منين طلعت روحه ، بارجع بافوت ع الأوضة ، باسرح ، بدّي أعرف منين عم بيدق ، (مين عم بيدق بيانو؟؟) ، ما بيجي ع راسي إلا صورة بنت ..صغيرة .. وضعيفة ..عمرها تسع سنين ونص ، يعني.. عم تدرس بيانو ، يمكن مَنّا كتير كتير موهوبة بس فظيعة بها الحياة ، عم تتعلم شي منيح يا أخي ، شي ما إلو طايفة ، ما إلو لغة ، ما إلو تهجية ولا أحرف ، مش عم نعرف منين ، فظيعة باحسها ، وهي معلقة ع فرد نوتة ، لأنو معلقة معها ، لأنو بعدا عم تتعلم ،

بكرة بيمشي حالن ، مش أحلي ها البنت من تجمع اللجان والروابط ..المعادية ..للإمبريالية ..والصهونية؟ ، مش أحلي ها البنت من مسودة مشروع..اقتراح..احتمال..إمكان ية..حل..لدستور..نظام..معين..يو ماً..ما..بلبنان..الجديد؟، لأجله ..ولأجل السامعين؟، مسودة ..طالعة من راديو صوته مثل الصوص بها الأوضة ، وبتضطر تضل فاتحه ، مابدك تروق شي خبرية يعني انت .. مسنّح وناطر ، تصور بس ..إذا ها البنت كبرت وضلت عم بتدق بيانو ، أديش بتصير عظيمة ، أديش أحسن من ها الحي اللي ساكنين فيه ، هيدي إذا سألتها " عرفتي شو صار بالتلاتة وتمانين؟" راح بتقلك "كيف؟..عفواً أنا ما كنت " ، كانت هيّ ، أو..ما بعرف ، أنا سمعتها بالحي عِنّا كانت ، بس كانت ....عم تدرس بيانو

الكلام ..لزياد رحباني
اللوحة ل... Caroline Magerl

عفكرة هي مابعرف كيف
بس كلما بسمعها بحس حالي عم اسمع نفس الصغير وان هيه لحد هلق عم تعزف علي نفس البيانو
وصوت زياد عفكرة فيها بيختلف عن اي تسجيل ثاني
بتحس عم يحكي عن شي من كل بد