[Joe]

مرحبا, هادا جواب موجه للأخ ميني مي و للجميع...


أولا : صعب السؤال أنو امريكة شو مستفيدة من اسرائيل . ليش ؟ لأنو مافيك تقول شو مستفيدة سوريا من حمص مثلا ..
لاء مين قال, سوريا بتستفيد من محافظة حمص بكتير شغلات, هادا طبعا لو فكرت بالموضوع من نظرة فدرالية. عندنا كل المصانع الوسخة و الثقيلة تبع القطر!


تانيا : اذا بدك .. اسرائيل سوق للأسلحة الأمريكية . اسرائيل بوجه المدفع الشرق أوسطي العربي "سابقا" ..اسرائيل مكان لتجمع زبالة يهود العالم.. اسرائيل كانت العبد االمئمور اللي بينفذ كل الأعمال القذرة اللي صارت بالمنطقة من خمسين سنة لتاريخ احتلال العراق.
إسرائيل مانا سوق للأسلحة الأميركية اذا بتقارنو بحجم الأسواق التانية و التجارة مع باقي الدول. فيك تقول أميركا بتعطيها سلاح ببلاش لإسرائيل لتحقيق أهدافها التانية متل انت قلت انو الاعمال القذرة بالمنطقة و خلافه. الحقيقة انو إسرائيل بلوة بالنسبة لأميركا و مصاريف على الطالعة و النازلة. يعني ما في فائدة مالية عم تجي من ورا إسرائيل غير وجع الراس.
و إسرائيل مانا عم تنفذ مصالح أميركا المباشرة بالمنطقة. إسرائيل عم تحقق مصالحها هيي بشكل أولي عن طريق دعم أميركي. الأميركان مصلحتهم بالخليج العربي. الحرب بإسرائيل و بغزة و الجولان و مع المصاروة... هي حرب مافيها لأميركا لا ناقة و لا جمل متل ما بيقولوا. دخلك لو كانت فعلا مصلحة أميركا مرتبطة بمصلحة إسرائيل, ليش ما كنا منشوف جنود أميركان بإسرائيل؟ ليش ما منشوف مصالح أميركية و شركات بإسرائيل. ما في من هل شيء ... مافي عندك مناجم او نفط او مجال لأسواق تجارية بإسرائيل ... لا إسرائيل لعبة بإيد أميركا و لا العكس, كل دولة مستقلة بس العلاقة هيي إنو اميركا "كانت" تبتسفيد بشكل غير مباشر من قوة و وجود إسرائيل بالمنطقة. و السبب طبعا هوي الحرب الباردة. الحرب هون بالشرق الأوسط هيي دايما حرب بين الكلاشنيكوف و بين السلاح الغربي.. بين الدبابات الروسية و بين الدبابات الغربية... مو قصة نكاية... قصة حرب باردة. و هادا واقع و معروف, و فينا نرجع للتاريخ و منوشف إنه قبل الأربعينات ما كان في توجه سياسي معروف بالمنطقة عندنا... كان في تخبط سياسي و ضياع... و اخترنا المعسكر الشرقي و اتوماتيكيا اميركا اختارت اسرائيل (مع انه مثلا الاتحاد السوفييتي اعترف بإسرائيل قبل أميركا!!!). اميركا اختارت إسرائيل مو لأنو رح تربح من وراها شي... بالعكس كان أحسنلا أميركا بمليون مرة لو ضلت مع العرب (و طبعا أحسن للعرب كمان!!)... بس هادا يلي صار... (أما ليش معسكر شرقي فطبعا افكار ثورية و اشتراكية و حركات.. كل الناس بتحب هيك شي اول شي بعدين بتكتشف انو كله حبر على ورق)

و مشان قصة زبالة اليهود. هادا الحكي مانو سبب ابدا. لانو من اليهود يلي بأميركا (و هني جالية غنية و قوية) نسبة قليلة جدا هاجرت على فلسطين اذا ما بتقارنها مع يهود شرق أوروبا و روسيا الفقراء. يعني اميركا ما كان عندا زبالة لتتخلص منها بفلسطين


تالتا معك حقك بناحية .. مؤخرا .. بدأت أمريكا تحس بأنو أسرائيل والجيوش والشرطة العربية ماعادت تقدر تحمي مصالحها بالمنطقة ..يعني بلشت تخبص .. لذلك قررت أمريكا تغامر باظهار أنيابها وأجت بنفسها للمنطقة .

عزيزي أميركا طول عمرها بالمنطقة و عسكريا كمان... الشغلة صرلها من قبل حرب الخليج الاولى. أصلا الانكليز صرلهم من أواخر ال 1800 بالخليج و اجا محلهم الاميركان... يعني ما في شي جديد
أميركا إلها نفوذ بالمنطقة من سنة 1834 و قيام الجامعة الأميركية ببيروت... و من ال 1800 كان في صراع أوروبي على المنطقة و على الطوائف الدينية المتعددة... فرنسا مع الموارنة, الروس مع الأرثوذكس, الأميركان مع البروتستانت... و الانكليز مع الدروز! (حاليا إيران مع الشيعة و مدري مين مع السنة و هيك رح نقضيها لأخر العمر الهيئة) .. في اهتمام بالمنطقة من زمان... بس كان اهتمام ثقافي قبل ما يكتشف النفط بالخليج

يعني بالمشرمحي : اسرائيل انسحبت من غزة ومن الجنوب اللبناني لأنها ماقدرت على الضرب اللي أكلتو .. وهدا مؤشر خطير بالنسبة لأمريكا .. أنو في حدا بالمنطقة عندو أجندة غير اللي عند أمريكا اللي هي نفسها عند اسرائيل ..

شو أجندة ما أجندة. عن جد انت مفكر انو اسرائيل خرجت من الجنوب بسبب عدم القدرة على الوقوف في وجه كم صاروخ كاتيوشا؟؟ خرجوا بسبب ضغوط سياسية من داخل إسرائيل و لانو الشغلة ما فيها شي مفيد يعني... بس مشاكل. بينما يعني اسرائيل لو بدها بظرف يوم بتصير بحلب شو عم تحكي انت

كمان : الشعب العربي اللي عأساس أنو أهبل .. بلش تظهر عليه معالم تثاؤب .. يعني كأنو بدو يفيق .. وهون كان موقف الحكومات الغبية اللي بلشت تتخبط.. يعني مصر مثلا ..راح الريس الأهبل وبلش يظبط الوضع لأبنو ..قامو الفراعنة انفلجو أنو ناطرينك لتفطس وساكتين الله لايبارك فيك .. قام الريس خاف وتراجع ..بس هالتراجع ماعجب المعلمين بواشنطن ..قررو يحلقولو وبتشوف بالانتخابات..

مصلحة واشنطن هوي الاستقرار السياسي و الأمني و الديمقراطية و الانفتاح بالشرق الاوسط
لولا واشنطن كنا منضل جرابيع تحت راس الحاكم (و لساتنا لليوم للأسف)
بس الضغط الأميركي هوي السبب الوحيد يلي عم تبلش تشم ريحة إصلاح بالمنطقة. ما بعرف كيف عم تشوف انت انو أميركا بدها العكس؟؟


بكل الدول اللي بالمنطقة .. عمبيصير شي خارج عن الأجندة الموحدة للحكومات ولأمريكا ... طبعا أمريكا ألعب الجميع .. يعني أذا رأيت أسنان الليث بارزة .....................

أجندة الحكومات أبدا ليست نفس أجندة أميركا
أميركا بدها شعوب حرة و زنكيلة ... و مافي شي عيب بهل شي بالعكس هاي غاية الإنسان