[bki]

السلام عليكم بالأول,


بعض الناس بينقال عنن بأنو دمن حار أو سخن, لأنو من كلمة بيجنوا وبيعصبوا, بيرتفع ضغطن وبيعلى صوتن وبيصيروا مابيشوفوا قدامن, هلا أنا والحمد لله ماني من هدول الناس, بس كعيلة نحن منن, أنا قدرت اتحكم بغضبي وأوجد وسائلي الخاصة بمواجهتو, وأساليبي متنوعة لأنو أسباب الغضب مختلفة, فمو ديماً الحل الواحد ممكن يفي بالغرض, طيب, أنا لما بعصب بقوم بالتالي وبالترتيب من حيث الأهمية والأولوية عندي حسب خبرتي مع الغضب والتعامل مع الغضبانين
1- بتوقف عن الحكي وبنعزل عن سبب غضبي.
2- بروح بغسل وشي واذكر ربي بسري واحتسبو واتوكل عليه.
3- بحاول اتسطح شوي وغمض عيوني ومافكر بأي شي وخاصة موضوع أو سبب غضبي.
4- أكل خاصة إاذ كان الغضب أو التوتر مرتبط بالزمن, كأن يكون وقت مشكلة عائلية أو امتحانات مثلاً.
5- بسوق سيارة أو بركب مع حدا مو بهدف السرعة, بس إنو امشي بالسيارة لأنو بنسى وتها سبب غضبي.
6- اتسمع لموسيقى بحبها.
7- بحكي مع أقرب شخصة إلي قلبي إذا كان في بحياتي حدا طبعاً.



برجع وبقول إنو موكل هالأمور بأهمية وحدة إلي وهالاهمية مو ديماً ثابتة, يعني ممكن ايام أول شغلة اعملها إنو احكي مع أقرب شخصة إلي, وأحياناً هي بالتحديد مابعملها ولو كان الموضوع مو متعلق فيها وعادي إنو تعرفو, يعني حسب الحشيشة بسوق.

فهاتوا لنشوف, أدلوا بدلوكم وخبروني شو بتعملوا بمواقف الغضب.

بالمناسبة هلا أنا طالع تازة من مشكلة كبيرة مع أخي الكبير فقلت بنشوف بلكي غيري عندو أساليب أنجح من أساليبي, رغم إنو مابظن في حدا عندو أسلوب أنجح من أول نقطة حكيتها.


سلام