[قرصان الأدرياتيك]

كاتب النص الأصلي : yass

حابب بس قول انو بعتقد انو المجاكرة التاريخية هي لأهل الدير (أهل المدينة حصرا) مع أهل ريف الدير و أهل الحسكة و الرقة (هنن يعتبرو انو هنن عاصمة شرق سوريا و كل ما حولهم هو عبارة عن ريف تابع لهم)
الرقة تاريخيا أهم من دير الزور (من ايام توتول و دورا أوروبوس)
الحسكة و القامشلي فيها موزاييك ثقافي و حضاري رهيب و جميل جدا, أغنى تنوّع ثقافي بسوريا
شو عندا الدير؟ عندا كومة حقوقيين, هنن الناس الوحيدين بالجزيرة اللي انخرطو بالدولة و أجهزتها, لما باقي أهل الجزيرة عندون موروث عثماني يخليهون يخافو من كل شي اسمو دولة و موظفين و شرطة و عسكر.. فلذلك كانو واصلين و عندون امتيازات أكثر من باقي الجزيرة

كلامك صحيح! هلا أكيد تاريخياً الرقّة والمجدل (الحسكة حالياً) كانوا أهمّ وبدلالة القصور الآشوريّة والآثار الرومانية اللي عم تطلع يوم بعد يوم!
بس بالدولة العثمانية الدير كان ألها مكانة أكبر واستمرّت هالمكانة مع الفرنسيين يللي عملوا فيها مطار عسكري. وكمان هيك مع الدولة السورية! برغم أنو متل ما قلت ما ألها ماضي تاريخي كبير متل الرقّة. وهاد سبب رئيسي بنظرة أهالي الدير للبقيّة وخصوصاً أنو مدن محافظة الحسكة ما عمرها أكتر من ميت سنة!!! بعد المذابح والنزوحات الشماليّة.
وبكل الأحوال السلوك عامة من قبل الدولة السورية لهلا هو سلوك سيء جداً تجاه المنطقة الشرقية كاملةً. يللي هي أغنى منطقة بالنفط والغاز والثروات الباطنية عدا عن المنتوجات الزراعيّة. يللي مخلية سوريّة عم تاكل خبز وتطعمي غيرا كمان.
تصور يا رجل محافظة بأكملها ما كان فيها جامعة وحدة والبركة بالخاص يللي جبر الحكومة تفتحلنا جامعة وكليات!
وتخيل أنو محافظة الحسكة يللي فيها أكثر من 700 تل أثري من بيناتهن تلال تعود لأقدم من الحضارة السومرية، وتعتبر من أغنى المناطق السوريّة بالعصر التاريخي الأول؛ ما فيها متحف .
ألن عشرين سنة وهن عم يبنوا بهالمتحف وما كان يخلصوا... الله يسامحن بس ما رح قول أكتر من هيك.

هامش: من نواحي الدير عندك الميادين و العشارة هدول بدهون قصة لحالون..
و في قرية اسمها "الموحسن", معروفة من قبل أهل الجزيرة باسم "موسكو الصغرى" .. لأنو كل سكانها ضباط جيش أو شرطة, و شيوعيين

هدول بنحسبن على أهل محافظة الرمادي العراقيّة .
وعلى فكرة باتفاقية سايكس بيكو بين فرنسا وإنكلترا تمّ التبادل بين محافظة دير الزور والموصل! الأولى راحت لسورية والتانية للعراق!
يا ريت كان العكس وللديريّة .