[TheLight]

حالات غريبة من الفصام ومظاهر غريبة من التصرف وأشكال شاذة من العلاقات مع المجتمع....كل هالامور بتميز وبجدارة شخصية الإنسان العربي بعلاقاته مع المحيط متمثلا بمجتمعه وعائلته واقاربه.....
بنقدر نقول بوجود شي اسمو ازدواجية شخصية الانسان العربي؟؟؟
هل كل الحالات والامثلة يللي بنشوفها وبنسمعها كل يوم غير كافية على اثبات هذه الازدواجية؟؟؟
هل بيكون الانسان ذو شخصية ازدواجية وقت بيمنع عن سواه يللي بيسمح لنفسه فيه؟؟؟
هل تكون شخصيته ازدواجية وقت بيبيح لنفسه وبيحرم على غيره؟؟؟
بدنا أمثلة....؟؟؟؟
في عشرات الامثلة يللي بتبدا من علاقة الانسان العربي مع اقرب المقربين اليه وصولا لأي كان بمجتمعه....

أي عدَوا لنشوف....
ممنوع اختي تمشي مع شب بس انا بيحق لي كل يوم صاحب صبية واقيم معها علاقة جنسية...
مسموح انو بفترة شبابي كون مقطع موصل وما خلي بنت وما نام معها بس يوم يللي بدي اتجوز لازم نقي اطهر وأشرف بنت ما باس تمها الها امها...
بتحول لوحش بس حتى يقرب ع أي شي بيخصني بس بنفس الوقت ما بتردد اني هاجم غيري
بدافع عن ديني بكل شراسة وكأني أحد الصحابة او أحد تلاميذ المسيح...وأنا بعيد كل البعد عن تعاليم ديني بحياتي اليومية
بطالب بحقوقي بالاجازات بوظيفتي وأنا بنفس الوقت ما بقدم عشر يللي مطلوب مني....وفوقها بهرب كل يوم قبل ما يخلص لدوام....ويوم يللي بكون بدائرة حكومية وما بلاقي الموظف بيجن جنوني.....
بطالب الدولة أنها تعطيني كل شي وبشتمها يوم بتقصر معي وبنفس الوقت بتذمر يوم لازم ادفع الضريبة...
بشتم الدولة والحكومة لأنهم عم يسرقونا وما بتردد للحظة أني اسرق أي واحد بيفوت ع دكاني....
بسب ع شوفير سيارة يوم بيزمرلي لأني قطعت الشارع بدون ما اطلع ع الجسر وبعد بدقيقتين بكون عم سب ع واحد عمل نفس الشي وبتهموا انو متخلف....
ببكي يوم بشوف طفل عم يموت بفلسطين او بالعراق بس بهلل وبزقف لما بيموت طفل اوروبي او امريكي بتفجير بمحطة مترو...

أنو ليش؟؟؟؟