صباح الخير عليكوا جميعا اومساء الخير مش هتفرق كتير
النهاردة انا جايبه موضوع مهم جدا للزوجات او الانسات المخطوبات و هو... ازاى تكتشفى ان جوزك او خطيبك كداب..
قبل ما نكتب اى حاجة لازم نتفق يا ستات و يا بنات و يا انسات و يا مواموازيلات ان الرجالة دول صنف خاين و لازم نمسكه بالحديد و النار ... هتقول لى واحدة ان جوزها او خطيبها ملاك و نسمة..هقولها كلهم بيبانوا كدة... و علشان ما تضربنيش و هى تروح القسم و انا المستشفى... ممكن اتنازل و اقول ان خطيبها دة هو الشذوذ اللى بيأكد القاعدة...
كفاية لك بقى و نبتدى فى درس خصوصى لمعرفة ان خطيبك كداب
بصى يا ستى
لما تحسى ان خطيبك كداب و دة اكيد اى واحدة بتحسه مننا احنا يا ستات يا مكسورات الجناح..... فلازم تشوفيه ايه موقفه فى بعض المواقف يعنى مثلا يا ستى تقولى له ميمى صاحبتى اشترت كمبيوتر النهاردة بسبعتاشر الف جنيه فلو رد عليكى و قال لك دة كتير
اوى .. ليه يعنى؟... تعرفى انه صادق فى اللى كان بيقوله لك.... اما لو لارد عليكى و قال لك مثلا.. و ماله.. ما هم على قلبهم فلوس كتير ... تعرفى انه كداب على طول
اقول لك يا ستى التفسير... التفسير انه لما بيكون بيكدب بيميل لتبرير اى موقف حتى لو كان مالهوش علاقة بكدبه.... على فكرة دى طريقة متخيبش..............
و طبعا ما تنسيش ان الكداب بيحك ارنبة انفه باستمرار لان الادرينالين بيتاعد فى الجسم كله و بالتالى بيسبب الحكة دى.....
و طبعا باستمرار تستخدمى السؤال اكتر من مرة علشان يجاوب عليه اكتر من مرة و بالتالى يقع فى الغلط...
و يا سلام بقى لو هب فيكى زى بابور الجاز و قال لك هو كل شويه انتى هتسألينى نفس السؤال ... دة طبعا معناه انه عصبى و مش عارف يجاوب لانه مش عاوز يقع فى الغلط ... و معناه طبعا انه كداب......
فى النهايه عاوزة اقول لك انك ممكن تريحينى و تريحى نفسك و متتجوزيش خالص و دة هيكون احسن كتير
(طبعا بعد الشر على كل البنات و يا رب كل البنات يتجوزا) يلا سلام بقى و مستنيه ردودكم و يا رب ما يكون حد كتب الموضوع قبلى و لا اكون حطيته فى قسمغلط زى ما عملت فى قسم الكاريكتير.............................. . اوعوا تنسوا النصايح بس لو واحدة اخدت لها طبق او شاكوش فى راسها بعد الخناقة اللى هتقوم بعد ما تطبقوا النصايح دى فأنا مليش دعوة........ و بعدين مفيش مشاكل لما تاخدى شاكوش و لا حلة فى سبيل الحقيقة.............. سلااااااااااااااااااااام