[krimbow]

مرحبا وايت سنيك

الرسول محمد عليه الصلاة والسلام بالنسبة النا أهم من أهالينا وأعراضنا ونحن منعرف الضعف والهزل والهوان يلي وصلنالو كأمة مسلمة وعربية ومنعترف انو صار لازمنا تصحيح يبدء من أنفسنا ومن ثم للمجتمع
الرسول متل ماعقب بالسابق كريمبو على موضوع تاني انو مات من 1400 سنة وهاد شي صحيح بس يمكن لما ينحكى عن فكر او لوحة او كتاب لشخص بينحكى عنو وعن شخصه ولو بعد ملايين السنين

ما بتصور انك فهمت قصدي لما قلت انو مات و شبع موت
رح اشرحلك ياها
انا بؤمن انو "لا يملك المرء إلا ان يهين نفسه"
يعني ازا انت بدك تهين بني آدم .. عمليا او واقعيا هوي اساسا اهان نفسو، و انت اجيت و نشرت الاهانة بس مو اكتر
و بالتالي ازا في اهانة لشخص الرسول قد حصلت ... فهو الملام الاول

كتير ناس ماتوا و شبعوا موت و تم رسمهم بشكل كاريكاتوري (متل كاريكاتورات فرجيل و افلاطون المشهورة على سبيل المثال) و مع ذلك بقيت آثارهم عم تتدرس باهم الجامعات و عم تنتقل من جيل الى جيل

ما بتصور ابدا انو شخص الرسول ضعيف لدرجة انو كم كاريكاتور ممكن تسيء لألو ... و ازا تم هالشي ... فطز بهيك شخص كائنا من يكون

لا تنحمق و تزبد و ترغي
روق اعصابك و افهمني
شخص متل الرسول بيتبع تعاليمو اكتر من مليارين بني ادم، لا يمكن انو تسيء لألو كم صورة
و يللي اساءلو فعليا هوي اتباعو
هيك كانت مقدمة مينيمي لما نشر الصور باخوية


بعدين تعا لألك شغلة
عن جد محسب انو هي اول مرة بيتم رسم صور كاريكاتورية لشخصية عامة و مشهورة متل محمد ؟؟؟
سألت حالك للحظة ليش قمتوا القيامة على هالصور بالزات ؟؟؟؟ برأيي الشخصي الجواب لأنكم جواييم، مجرد لعبة بيحركوها بعض الاشخاص على كيفهم

وانا بأيد هالنقطة أنو لما الرسام استهزء بهالشكل من الرسول كان أكيد بيقصد شخص الرسول بس لما الحكومة الدانماركية بتحتوي الرسومات وبتدافع عنها كحرية رأي وبترفض الاعتذار (على أقل تقدير) فأكيد ماكانت بتقصد الاستهزاء بالرسول الكريم بل فينا نحن المسلمين حول العالم

هاها
انت عيني
هلأ بلشنا نتفاهم ...
شخص الرسول ما كان ابدا مقصود (من مبدأ عدم امكانية الاساءة الو كما اسلفنا)
بس تم التغرير فيكم (من قبل بعض رجال دينكم يللي بيتحكموا فيكم متل الدومينو) و إظهار الموضوع على انو اساءة للرسول ... و النكتة انكم مشيتوا بالموضوع، او بالاحرى انسقتوا كما تساق البهايم
هلأ صدق او لا تصدق ... انا من رواد اتباع نظرية المؤامرة و كل واحد تحاور معي بهالمنتدى بيعرف هالشي
ازا بدك تحكي من باب انو في مؤامرة ع المسلمين ... انا معك
بس المؤامرة ما بلشت من الدانمارك، لأنو متل ما اتفقنا نشر الصور ما كان القصد منو التغرير بالنبي
و لما الحكومة سمحت بنشر الصور ... لأنها فعليا حكومة ما بتقدر تمنع هالصور من النشر بسبب حرية الرأي
لو انها منعت الصور من النشر كانت سقطت تاني يوم و طلعت محلها حكومة شغلتها الوحيدة هيي نشر الصور
و برأيي حكومة الدانمارك انو ينقهر مليارين مسلم بالعالم احسن ما تسقط و تستلم المعارضة مقاليد الحكم فيها
مشان هيك اختارت اهون المرين و ما منعت الصور من النشر
المؤامرة حبيبي بلشت عنا هون بالشرق الاوسط ... لما كم اجدب كبر القصة على بلا طعمة
شو رح يطلع بايدكم تعملوا ازا الحكومة الدانماركية تيست راسها ؟؟؟
طيب شو رح يطلع بايدكم تعملوا ازا هب الاتحاد الاوروبي لنجدة الدانمارك ؟؟؟

على فكرة ... لحد هلأ الصحف يللي نشرت الصور هيي صحف المانية و فرنساوية و نرويجية و سويدية و روسية و بولندية و اردنية و مصرية و اسرائيلية و اميركية و كندية و برازيلية و يابانية

بقا شو رح تعملوا ازا كل العالم نشرها ؟؟؟ تتقوقعوا على حالكم مثلا ؟؟؟

وكانو ناطرين مننا نعمل شي ليشوفو ويفرجو العالم همجية المسلمين الارهابيين من نظرهم

متل شو يعني ؟؟؟
حرق السفارات تبع الدانمارك و النرويج .... و تشيلي ؟
سب كل الشعب الدانماركي ؟
محاولات اغتيال بعض الدانماركيين بالشرق الاوسط ؟
وضع قنابل بمبنى الصحيفة ؟

هي هيي الاعمال الهمجية يللي كانوا ناطرينها ؟؟؟
يظهر انك ما عم تتابع الاخبار
ألو ... ألو
من الارض الى وايت سنيك... حوّل
هي الامور كلها صارت

وماكانو متصورين يصير يلي صار من مقاطعة اقتصادية وثورة فكرية للمطالبة بالاعتذار والتواصل والحوار مع الحكومة او الرسام او الصحيفة وهاد الشي ولو ماعجب كتير منكون أثر باحصائيات لشركة حليب أنكور وحددت خساراتها اليومية من المقاطعة مليار دولار (لا تسألوني عن المصادر منحكي فيها بعدين)

اتطمن ما رح أسألك عن المصادر
رح اطلب منك تروح تلعن سلاف صاحب هالمصادر شو انو ترين
حبيب ... الشغلة بالحساب مو بالكعاب
علبة حليب انكور كامل الدسم بينباع بمحلات التجزئة (متل السوبر ماركت) بـ 5 دولارات
بعد ما نشيل ربح محل بيع التجزئة و المستودع و المستورد و تكاليف الشحن و الضريبة و ربح المصدر ... بيوصل حق العلبة لدولار واحد (20 %)

خلينا نفترض جدلا انو حق العلبة كلو ارباح و ما في تكاليف (الجماعة بتمطر عندهم حليب، و بيتجفف بقدرة واحد احد)
و خلينا نفترض جدلا انو في 100 مليون راس مسلم قدران يشتري حليب مجفف كامل الدسم و فوق هيك مستورد كمان
و خلينا نفترض جدلا انو كل راس بيشرب كل يوم علبة انكور كاملة (تخينة ما ؟؟ معلش مرقوها)

100 مليون * 1 دولار = 100 مليون دولار باليوم
يعني اكتر من هيك ما فيي زبط القصة
بس لسا ناقصني 900 ... تسعميت مليون دورار لأوصل للمليار

بقا مع احترامي الشديد لألك ... طز بهيك مصادر
يعني الواحد بيغلطلو بمليون ... لك مليونين دولار باليوم
بس مو تسعمية

بعدين شو هي "ثورة فكرية" ؟؟؟
يعني معلش بتقدر تشرحلي ياها بالله ؟؟؟

هلأ نحن كأشخاص اذا واحد استهزء بوالدك الله يخللي أهاليكم ويرحم يلي ماتو
بصورة بمسبة بشي شغلة شو بتعمل فيه؟؟؟
وخصوصاً انو لما بسب الأب شخص ما بيكون بيقصد الشخص المسبوب ومو أبوه وهداك بيجن جنانو وبينط وما بيحط ولا الأم
اذا قررت تلجأ للشرطة المتآمرة ويللي يمكن تضحك عليك وبعدو بتلجأ لمحامي بيضوعك وبتضيع معو بقى يمكن بتلجأ لأسلحتك الشخصية يلي هية ايدك يمكن او رجلك

في فرق كتير كبير بين الشخصية العامة و الشخصية الخاصة
الشخصية الخاصة هيي شخصية بتهمك الك وحدك ... او الي وحدي، متل الاهل، الحبيبة، الاصدقاء... الخ، لما حدا يتعدا عليهم بيكون عم ينتهك خصوصيتك المقدسة، و هون ... اي جهة متل ادارة اخوية مثلا، او حكومة الدينمارك او الامم المتحدة بتوقف معك و بترجعلك حقك

اما الشخصية العامة هيي شخصية بتعني كل الناس او اغلبهم... متل محمد، يسوع، الله، بشار الاسد، جورج بوش، نزار قباني، نانسي عجرم .... الخ
هون لما حدا يتعدا على هيك شخصيات بيكون عم يمارس "حرية الرأي"
و هي الشغلة اسمها "ضريبة الشهرة"
و بالتالي مثالك معلم باطل من اساسو
و متل ما قلت انت ... فعلا في رسوم مسيئة ليسوع ... و بقي يسوع بقلب المسيحيين نفسو قبل و بعد الرسوم متل ما هوي
لأنو اساسا ما ممكن انو شوية صور تسيء لشخصو

معلم
الدول العربية و الاسلامية ... و من خلفها الشعوب، لا تملك القدرة على مقاطعة زيمبابوي
فما بالك بدولة من دول الاتحاد الاوروبي ؟؟؟