يا جماعة أنا في كلمتين بدي قولن و كيف ما بدكن تفسرون فسرون , لأنو بصراحة ما عاد ققدر اسكت .
أنا ضد تعدد الأحزاب و ضد الحرية و ضد الديمقراطية بسورية .
و ماني عم قول هالحكي هيك عن عبث , ولا عم اعمل مزاودات . و بتمنى أنو الناس اللي بتوجه الاعتراضات ع النظام القائم تحط حالها محل النظام و تتخيل شو بدها تعمل .
سوريا أو مصر أو الهند أو ...أي بلد من بلدان العالم التالت هو بلد غير مستقل حكماً و قطعاً . و منكون خياليين إذا فكرنا انو ممكن يكون مستقل . و بتختلف تبعية هالبلد من زمن لزمن و من ظرف لظرف . يعني أحياناً بكون تابع للمعسكر الاشتراكي ( أيام الاشتراكية ) و أحياناً تابع للغرب و أحياناً تابع لبلد من بلدان العالم التالت ( متل لبنان مثلاً ) .
نتيجة هالتبعية الحتمية ( و أشدد على كلمة حتمية و اللي عندو رأي تاني يا ريت يبرهن علي بالدليل القاطع ) نتيجة هالتبعية لا يمكن انك تعمل ديمقراطية حقيقية أو حرية حقيقية أو ...الخ من هالمصطلحات .
و من جهة تانية نحنا بسورية خليط غير متجانس و بالاحرى متفجر (و بتذكر مرة صار في تصويت بالمنتدى اذا كانت سوريا احسن من غير بلدان من ناحية التعايش الديني و انا وقتها صوتت بلاء لأنو مافي تعايش بالحقيقة في أمن و في مخابرات و اللي ما بدو يتعايش ما نيالو و هاد الشي بشكر على الامن و النظام و المخابرات ) يعني بسوريا في طوائف و في طائفية و في عشائر وفي عشائرية و في تعدد اثنيات و في حساسيات . يعني لو نفرض انو جبنا ملاك من عند الله نحطو بالحكم رح يقدر يعطي هالعالم حرية ؟ طيب اذا عطاهن الحرية شو رح يعملو بالحرية ؟ أنا بقول رح يعملو سلطة ( يعني رح يعملو البلد سلطة ) .
أنا ماني مع نظام الحزب الواحد كفلسفة بس أنا مع وجود نظام حديدي على رأس السلطة في كل دول العالم الثالث , نظام بيقدر يحفظ الأمن و يأمن لقمة الخبز . و أنا بعتقد أنو النظام السوري قدر يحقق بكفاءة عالية الأمن و لقمة العيش للشعب السوري . يعني لهلق منحس حالنا (سكان سوريا ) أنو عنا كرامة , الكرامة اللي ضاعت من كتير بلدان عريقة بدون ما اذكر اسماء .
أنا بشوف انو صار لازم نعمل مصالحة مع النظام بدون ما نحاول تغيرو او نطالبو بالتغيير , يعني لازم نحنا ننسى شو كان يصير لحتى النظام يطلع من عقدة الخوف كمان و يقدر يصلح نفسو و هو حاسس انو الشعب عم يتقبل هالاصلاح بمصداقية .
أنا و انا مسؤول عن الكلام اللي عم قولو هلق , لو صارت انتخابات حرة و نزيهة ما رح انتخب غير الموجودين حالياً ع راس السلطو و انا مرتاح الضمير .
و لا تآخذونا مشان الله
J.S: Death is the solution to all problems. No man = No problem.
|