[ويحد سوري]

......بالصيف بترتفع الحرارة و بيصير في شوب و هالحكي مثبت علميا و في عالم كتير بحسوا بارتفاع درجة الحرارة و خصوصا لي عندهن مكيفات يعني الله يساعدهن ع ارتفاع الحرارة و خصوصا لما بتنقطع الكهرباء الضهر يعني كيف بدهن يناموا بهالشوب؟؟؟
كمان في نوع تاني من ارتفاع الحرارة لي بيحس فيه البعض مثلا من حرارة الشوق ما فيهن يناموا أو لما بيكون الواحد عشقان و حرارتوا مرتفعه, يمكن صابيتوا حمى أو يمكن حرارة الحب منعيتوا من النوم ,.
هون في عندي ربط صغير بين الحرارتين ولي هوي كالتالي :
خلال أيام الصيفية و الشوب أغلب البشر بحاولوا يهربوا من الشوب و اللجوء للأماكن الأقل شوبا , مثلا لي عندوا قدرة إنو يروح ع الجبل و ع شي مصيف أو يشتري مكيف و يشغلوا بوقت الشوب بدون ما يحسب اشقد رح تكون فاتورة الكهرباء و الهاتف(الهاتف هون لطشه ع الفواتير) ما بدنا نحكي عليهن , لي بدنا نحكي عليهن الفئة التانية لي بتهرب من الشوب ليقعدوا بالبرية أو بالحديقة أو ع طرف شي طريق أو لي عندو سطح خاص فيه بيقعد ع السطح و بيجهز للسهرة و تأمل النجوم . خلينا نفترض إنو في شخصين بيحبوا بعض (بعيدا عن التماثل) و من حرارة الحب دايبيين ع بعض وما فيك تبعدهن عن يعض و صدف هالحب بالصيفية و بهالشوب , شو بتتوقع تشوف من هالتنين؟؟ أنا بعتقد انو كل ما زاد الشوب رح يزداد حبهن و رح يتمنوا انو هالشوب لو انو بالشتوية حتى المشاعر اضل متأججه و ما تبرد العواطف , أما لي ما ألو علاقة بهالحالة يمكن اذا سمع هالحكي يحترق و يطق , يعني شو هالشاعرية و خصوصا بهيك جو!!!
منرجع للسطح و السهرة و انو نحنا سهرانين ومعنا هالعشاق , نحنا منحكي ارتفاع الحرارة و ارتفاع الاسعار وهدوك بيحكوا عن حرارة الحب و حلاوة هالحب و اخ لو تنقطع الكهربا شي ربع ساعه لحتى يفوتوا بالجو أكتر يمكن اذا اسالت : شو رأيكن بالجو؟ رح جاوبوك أحلى جو لانو سهرانين مع بعض و خصوصا انو هيك سهرة حميمة ما بتجي بالسهل , أما لي مشوب و عندو بق ع السطح بيقلك : اليوم تحممت مرتين أو تلاتة و قاعد تحت المروحة و هالصيفية ما مرت متلها من 50 سنة ووو ......
فمعقول اذا كلنا حبينا بعض و حسينا بحاجتنا لبعض منسى الشوب؟ و بيصير بدنا بس نقعد مع بعض ؟ حتى لو كانت البقة (الناموسة) بحجم البقرة ؟ .......