[سيجارة]

وبعد 6 سنين انتهت المرحلة الابتدائية وانتقل الى المرحلة الاعدادية يعني شو يامعلم بلشت مرحلة الشبوبية وصار في مين تشوف حالك علي
وكالعادة اول يوم محسوبكن تواعد مع أصدقائه من الابتدائي ورحنا سوا على المدرسة بالبدلة العسكرية والبوط الاسود وماني شايف حدا قدامي
والله يامعلم شي فتت على المدرسة استلمني ميت ياحزركن (استاذ العسكري )
وقال : وين يا معلم وين جاييني بهالمنظر شعر طويل وحالقلي بانكي ووين الرتب ووين ووين لحتى طردني وقلي لا بقى تجي على المدرسة بها المنظر
والله محسوبكن ما صدق على الله
لم الشلة اللعينة واتجه الى السوق لاول مرة لوحده فحضرنا فلم سينما واكلنا الفلافل وضلينا نتمشى حتى نهاية الدوام ومن ثم عدت للبيت عايف حالي من التعب
وطبعا خلال فترة الاعدادي أكلت شي 3567 عصاية على ايدي وانفصلت من المدرسة شي 50مرة بس كان في استاذ صاحبي ينفدني كل مرة من دون مانجيب سيادة الوالد وأحيانا كنت جيب بياع ىالفول اللي قدام المدرسة عاساس ابي لحتى مرة المدير جبلو الشرطة لانو ماخلا طالب وما فات معو على المدرسة عأساس ابو كتر مانو غبي
المهم بلا طول سيرة صرنا صف تاسع وبلشت الحرب النفسية ضدي وبدأ صوتي يصير عريض وحب الشباب ينبت بوجهك وبتحس كل العام كرهانتك وما حدا الو نفس يحكي معك
وطبعا كانو اخواتي الشباب يستلموني لأنو بتعرفو شو بيصير مع الواحد بهي المرحلة
وطبعا بهي المرحلة محسوبكن تعرف على الصديق والخل الوفي (الدخاااااااااااااان )
وما تشوفني غير طالع على سطح البيت عمدخن سيكارة وطبعا ارجع على غرفتي دايخ وعمبسعل فحط راسي ونام وطبعا فيق على بهدلي من الست الوالدة ومحاضرة بشحذ الهمم انو بكرا ولاد الاقارب والجيران وغيرن وغيراتن رح يغلبوك ويجمعو اكتر منك ومن هالحكي
وفي احدى المرات وأنا امارس التدخين على السطح لمحت وجه بنت الجيران على البكون وهي تحدق بي ومحسوبكن طبس فيا من اول نظرة وفرش عالجويزة وبلشت الرسايل والمغازلات وتقوية الاستريو على الآخر لما بكون لحالي بالبيت مشان تسمع وكان اياما طالع كاسيت طبيب جراح لاب وديع
المهم محسوبكن انكشف انو عمدخن وانو عمزبط بنت الجيران واللي كشفني اخي يللي بيجا قبلي وطبعا اكلنا بدن مرنب من السيد الوالد وانحطيت تحت الاقامة الجبرية لحتى بل\ش الفحص
وقدمنا الفحص وطلعت النتائج وجمعت 261 علامة يعني منيح