[سيجارة]

بدأت حياتي لما انزلت من بطن امي في 8/2/1984 الساعة تلاتة بليل وطبعا بالبيت تبعنا لأتو اياما كانو الدايات على قفا مين يشيل (الدية اوم عدنان -أوم سعيد- أوم ابراهيم ....................الخ)
وترعرت ضمن عائلة مكافحة مؤلفة من خمس صبيان وبنت وحيدة وام ربة منزل يعني حياتا بالمطبخ أب موظف يا دوب الراتب عمكفي لخمس ولاد كلن بالمدارس حتى صار عمري 6سنوات وصار الوقت لحتى فوت عالمدرسة وهداك يوم وهادا يوم
أول مرحلة أخدن السيد الوالد لعند المصور وسفقني صورة من كعب الدست وطبعا قبلا كان في قتلة مشان اثبت قدام الكاميرا وطبعا انجزنا اول مرحلة من بعد ما كره المصور الله تبعي
وتان ي يوم طلعو الصور وشحطني ابي الى المدرسة التي بجاني بيتنا فاستلمني الاستاذ يللي بكون جارنا ومحسوبكن البكي تبعو موصل لآخر الدنيا ومخطتو شارا (طبعا من البكي) فذهب ابي وتركني مع ذلك الاستاذ اللعين فكانت هي اللحظة المؤثرة في حياتي وبدأ يهددني بغرفة الفيران والفلقة إذا ما سكتت
وعندما لم أجد نفعا من بكائي لبدت في صفي في أخر مقعد وطبعا الاطافيل اللي كانو معي كلن من نمرتي وكل واحد عيون مخوخة من البكي وهاد اللي مستفرغ على مريولو البني (آه على المريول البني بتتذكرو ما )وهادا اللي عاملا بحالو وهادا اللي عمياكل صندويشة الزعتر مع الخيارا وغيرو وغيراتو ......
ومحسوبكن ما سمع صوت الجرس حتى نط متل النمر لعند الأزن واشترا كاظوظة مع تمرية
ومضت الخمس حصص ومضى الدوام ومحسوبكن آلش على الجو وصار عندو مناحة كل يوم عطلة وطبعا صرنا ناكل القتلة بالبيت