[marochka]

من أسبوعين كان عنا عزا وهي أول مرة كون مضطرة أحضر عزا من أولو لآخرو على اعتبار أنو المرحومة هي سلفتي، بس فعلاً هالوقت خلاني فكر قديش في عادات بلا طعمة يعني فوق المصيبة لازم الواحد يضل قاعد بالصالون من السبعة الصبح للسبعة المسا على سلامات وتبويس وبكي، وفوق كل شي بتبلش تسمع قصص عاللبس وطريقة القعدة وطريقة البكي حتى، لك سمعت نقاش ساعتين بين النسوان على لون الكلسات النايلون وقديش عيب أنو كنة المرحومة ما كانت لابسة كلسات سودا.
بس من جهة تانية وجود العالم حوالين أهل الميت بيخفف شوي من المصيبة والتفكير بصعوبة هالقعدة بيلهيهن عن التفكير بالفقيد، وهالمواضيع السخيفة يمكن إلها دور بإلهاء العالم عن الحزن. بس أكيد لازم يكون في طريقة أحسن شوي من هيك.
لاء وكمان بيقولولك عيب الواحد يفتح التلفزيون هو وحزنان طيب ما هاد أكتر شي بيلهي وبيخفف الحزن! بس بعدين عرفت أنو مو المطلوب تخفيف الحزن عن أهل الفقيد!! وإنما المطلوب أنو العالم تشوف أديش الأهل زعلانين عفقيدون!! طيب شو دخل العالم؟ بس إجمالاً في كتير أشيا عم تخف وعم تنكسر بالتدريج، والعادات فعلياً تغيرت كتير من سنين لهلأ، بس اللي بيبلشو بالتغيير عادة بيموتو قبل ما يشوفوه صار العادة الجديدة !!