[VivaSyria]

من هو البلطجي:

هو الشخص الذي يمتهن طريقة الزعرنة أو التشبيح أو القمع أو طولة اللسان لإثبات وجهة نظره "إن وجدت" أو لإسكات البشر أو تسفيه أرائهم وهو الشخص الذي لايميز بين حقوقه وحقوق الأخرين كما من الممكن هذا الشخص يلجأ الى استخدام نوع من أنواع القوة "المزعومة" والتي لاتكون بأغلب الأحيان قوة حقيقية بل هي نوع من الاستقواء بظرف معين أو وضع معين...يستخدم البلطجي هذه "القوة اذا استطعنا تسميتها" بهضم حقوق الأخرين ومحاربتهم نتيجةً لظروفه الخاصه...

أسباب البلطجة:

المشاكل الثقافية أو الفكرية أو النفسية أو العائلية... غالباً البلطجي إنسان عندو خلل بأحد نواحي حياته بيحاول يغطيه بطريقة البعبعة الفاضية والفزلكة والهوبرة والعلاك...

أنواع البلطجية:

1- أخي بالمختصر في ناس بتخلق بلطجية... يعني هيك الزعرنة والطريقة السوقية بدمون وبيعتبروها بطولة ومرجلة... لك ياعمي الرجولة بتفرق عن البلطجة... الرجولة هي مجموعة قيم وأخلاق... البلطجة هيه انعدام القيم والأخلاق... بتناقشو بالسياسة بيجاوبك من سوق الخضرا... بتناقشو بالفن بيجاوبك بطريقة بياعين المازوت... بتناقشو بالإقتصاد بتحسو بياع علكه على اشارة مرور...

2- البلطجي المنتحل الشخصية... خيو هاد بيجي اجباري عن الله بدو يقنعك انو هو بلطجي... بتقلو ياعمي انت مو بلطجي بيقلك لاء أنا بلطجي... أخي خلص بيحفظ طريقة حكي معينة وطريقة تصرفات معينة بيفكر حالو صار بلطجي... بيلاقيلك شي بلطجي محترف "من النوع الأول" وبيصير بيقلدو بكل شي... هيك أخي بدو العالم تحسبو على البلطجية... لك عمي حارتنا ضيقة ومنعرف بعض... الاحترام مابيجي من الزعرنة بيجي من المنطق والاحترام المتبادل... طبعاً هاد الشخص بيكون معدوم الشخصية وعندو خلل معين بيخليه يحاول بشكل دائم يلاقي حالو بشي مكان... فبيقلك أخي بلاقي حالي بهالطريقة هي وبثبت وجودي... بس للأسف بيصير مضحكة البشر...

مع هالحالتين من البلطجية صعب توصل لأي نتيجة أو تغيير أو قواسم مشتركه.. خيو هنن مبسوطين بفزلكتون وطريقتون السوقية... تركون عمي تركون... لاتناقش ولاتعزب حالك... مافي أمل إلا أمل انهون يصحوا بشي يوم ويحسوا انهون من الغباء لدرجة انو ماعم يلاقوا حالون إلا بالزعرنة والفزلكة...

كلمتين مني لإلهون كتير سهل الإنسان يكون سفيه وسخيف وسوقي... بس صعب يكون الإنسان منطقي ومتوازن وعاقل... حاولوا إلا ماتتحسنوا بيوم...

طبعاً في أنواع أخرى من البلطجية ماني بصدد الحكي عنهون هلأ وكمان في أنواع أخرى من البلطجة متل البلطجة السياسية والبلطجة الاقتصادية ممكن ناقشون بمحاور تانيه...


ودمتم