[Abu ToNi]

رؤيا شخصية من جهة وتوضيح من جهة اخرى
كون الموضوع قامت الدنيا فيه امبارح وخوفا من اعادة تكرار نفس الأحداث اللي حصلت حسيت انه لازم احط توضيح للشي اللي صار او بالاصح للشي اللي انا عملته

بداية اول ما قريت اسم الموضوع توقعته انه متله متل امثاله الكثر اللي بيحكوا عن اشخاص مسيحيين بعد ما كانوا مؤمنين بدينهم تركوا المسيحية وانتقلوا إلى الإسلام الشي اللي خلاني احط موضوع بالبريد استفسرت فيه عن شو موقف الأخوية من الافلام الدينية الوثائقية
كان الرد من جانب المشرفين والمنسيقين كتير مقنع بوجهة نظري وحسيت انه معهم حق 100 % وبالتحديد سامر قال لي ما منقدر نحكم على الفيلم لحتى نشوفه وباعتبار الخطوط سيئة حاليا ما منقدر نشوفه بدنا ننتظر حدا يشوفه ويحط رد حتى نعرف شو هوي .

قمت انا نزلت من بيتي وفتت على كافيه انترنت نزلت الفيلم وحضرته بالبيت
تبين اني كنت على غلط والفيلم ابعد مما تصورته بكتير لا بل عجبني لأبعد الحدود .
يمكن كوني مسيحي تختلفوا معي عن الشي اللي عجبني .
كمسلمين بالتاكيد بتشجعوا الافلام اللي بتشابه الفيلم هاد كونها بشكل او بآخر بعرف عنكم بشكل افضل .
اما انا فاعجبت جدا بالفيلم كونه أميركي اولاً ولو كان عربي يمكن ما كنت كتير اهتميت فيه بس كونه اميركي كتير احترمته لأني شفت فيه انه بينقل صورة كتير حلوة .
كون الفيلم اميركي وموجه بشكل خاص للمجتمع الأميركي كان بالنسبة الي شي كتير عظيم انه يصير بين ايدينا لأن بوضح لنا كيف انه الشعب الأميركي عنده صورة عن المسلمين تشكلت بشكل او بآخر ومع هاد الشي نشوف الأعلام الأميركي قام بالبحث وبالاتصالات وحب ينقل صورة جديدة للشعب الاميركي كيف انه الاسلام بعكس الشي اللي متخيله الشعب الأميركي بمعنى آخر حاول انه يحسن من صورة الاسلام عند المجتمع .
الشي اللي عجبني برجع بقول هو حيادية البرنامج اللي منشوف ما اتخذ اي موقف متطرف تجاه عرض الحلقة لا بل بالعكس أظهر الاسلام على انه دين سماوي ودين محب وانحاز لجانبه بعدة مواقف والمشاهد لا بل حتى في بعض المشاهد منشوف كيف ان المخرج حاول تمرير بعض الصور والشعارات اللي بتتنافى مع الواقع لكنها بتدعم فكرة الـبرنامج متل الصورة اللي بدي احطها واللي بتقول " بارك الله أميركا "

وصراحة ما بعتقد في مسلم على الأرض بردد هي الجملة ومع هاد الشي حاول البرنامج تمرير العديد من الصور المماثلة واللي تعد متل " مسجات مخفية " للمشاهد الأميركي .
واللي عجبني اكتر هوي اختيار احد المؤمنين المسيحيين وكيف انه ما كان عنده مشكلة انه يفوت على بيت مسلم ويعيش معه ويقرا بالقرآن ويسمع تعاليمهم ويصلي متلهم بالرغم من الفكرة المتكونة عنده عن الجماعة اللي بدهم يستضيفوه متل ما شفنا انها قال بيتخيل الرجال المسلمين حاملين أسلحة .
من كتراعجابي بالحلقة وطريقة تقديمها حبيت انا كمان اقتدي فيهن واعمل متلهم اني اشيل كل الأفكار اللي عندي على المسلمين ولاسلام المتكونة براسي بطريقة او بأخرى " اكيد مانها موضع نقاشنا هلق " والتزم الحياد لا بل اكتر من هيك اني ابذل بعض الجهد لمساعدة الأخوة اللي حابين يطلعوا على الفيلم سواء كانوا مسحيين حتى ما يوقعوا بالفخ اللي انا وقعت فيه او من المسلمين حتى يعرفوا شو هو موضوع الفيلم وطريقة عرضه .
الحكي هاد اللي كتبته كنت ناوي اكتبه بالنهاية بعد ما انتهي من تصوير الفيلم " تحويله إلى صور "
حتى اني بديت افكر بالاسلوب المناسب وكتبت بعض الاجزاء من اللي بدي اكتبه بالنهاية

وهيك مشوف كيف ان الغرب الاميركي ما عنده اي مشكلة تجاه المسلمين وبيتمثل هاد الشي باعداد برنامج كامل لنقل صورة واضحة عنهم وتحسين أفكار المجتمع حول الديانة الاسلامية بالرغم من الافكار المتكونة عنهم وبالرغم من كافة التهديدات اللي بعاني منها الشعب الأميركي من بعض الفرق او المجموعات الاسلامية
الشي اللي ما بعتقد ممكن يوصل إليه اعلامنا الحالي

لكن كون الموضوع اتجه بالشكل هاد وخوفا انه يرجع يتكرر الاشكال نفسه مع أشخاص آخرين شعرت انه من المطلوب بأسرع وقت احط الحكي اللي كنت بدي اقوله بالأخير .