[I_Love_Syria]

بما إنو الموضوع صرلوا زمان نايم قلت لحالي بفيقوا بركي حدا بيستفقدنا بشي طبخة معتبرة

نودلز باللحمة والجبنة
مقادير الطبق:
- ربع كيلو لحمة مفرومة ناعمة
- بصلة صغيرة
- كيس نودلز خمسمية غرام أو أقل أو أكتر حسب سعة المعدة
- لوح جبنة بيضاء
- نعنع
- زيت زيتون
- ملعقة سمنة بلدي أو حيواني أو نباتي ماكتير بتفرق
- بندورة يابسة (معجون يعني)
- ملح
- فلفل
طريقة التحضير:
بنسلق المعكرونة سهلة هي
بنفرم البصلة فرم ناعم أو ريش حسب الرغبة
بنقلي البصلة مع اللحمة بمعلقة سمنة طبعاً بنحط عاللحمة شوية ملح وفلفل حسب الرغبة
بس تصير البصلة على زهر بنحط البندورة اليابسة فوق اللحمة مع كاسة مي وإذا في عصير بندورة بيكون أسهل, مع ملاحظة ما تكون المرقة كتير زايطة كل ما سمكت كل ما كانت أطيب
بس يغلو شوي بنحط معلقة نعنع أخضر وبنخليهون على نار هادية
بندوق النودل إذا لساتها عم تعلك بنستنى عليها شوي مافي مشكلة ماورانا شي
أبل ما تستوي النودل بشي 7 دقايق بنحط لوح الجبنة على ورق قصدير أو بجاط حسب المتوفر وبنحط عليه معلقة زيت زيتون صغيرة مو كبيرة وبنرش فوقها نعنع وبنحطها بالفرن مدة عشر دقايق بتلاقي لونها بلّش يتغير شوي
بنغسل النودل وبنحطها بالصحن وبعدين بنحط الصوص عليها وبعد كل هاد بنحط قطعة الجبنة فوقهون وصحتين وهنا
أترككم الآن مع الصور تازا وسخنين
الوقت المتوقع للتحضير الإيستيميتد تايم يعني (الله يرحم جدي كان بريطاني) ساعة وعشر دقايق ومع الأكل بيصيرو ساعة ونص أو ساعتين إلا ربع حسب كم حصان الطواحن عندك

إذا حدا ما حبّا أنا مادخلني مو تلحقني شي طرطوشة