[الموسيقار]

كاتب النص الأصلي : خوليو

ما فهمت .. لسا ما فهمت وين بدّك توصّل .. إذا كان "نضال" الناس بنظرك وعذابن مقابل أهدافن لا بقدّم ولا بأخّر .. شو هوّ يلي بقدّم وبأخّر ..

شو بدّك بالأخير .. !!

ممكن تقدّملي برنامج عمل بتقترحو يكون فعّال بعمليّة التغيير .. !!
شلون بكون التغيير .. وكيف لازم نشتغل نحو مجتمع أفضل .. !!
قلّي ..

بكون ممنون كتير .. أعرف طريقة ما .. هدف ما إلك .. عمل ما بتقترحو .. بتقترح علينا إنو نمشي عليه لنوصّل لشي ..


مع إنو موقفك التواكلي والاستسلامي (يلي انا شايفو وممكن كون غلطان) مغري عفكرة .. وبريّح الراس كتير .. بس ما بعرف ليش حاسس إنو بتسيرو "مصالح" معيّنة مخفيّة وراه .. لخلوّوا من أي رسالة .. والله أعلم ..

بالانتظار ..

خوليو

أنا يا صديقي مالي بصدد كسّر مئاديف .. ولا ألطم وأبكي عالأطلال .. القصة ابسط من هيكـ ..

هلأ تعا اضربلكـ مثال موسيقي . .

ازا خطر ع بالي أنو هلأ هلأ بدي أعمل سيمفونية ..

جيب 100 شخص اعتباطيا ً من الشعب السوري (مثلا ً) رح تلاقي على أكتر تقدير .. 6 منهن بيعرفوا يعزفوا كمنجة وتنين بيعرفوا يعزفوا تشيللو .. و1 بيعرف يعزف كلارينيت .. وواحد بيعرف يعزف عود.. يعني صار المجموع 10 يعني 10 % .. 10% بيعرفوا يعزفوا والباقي مو سمعانين .. عن شي اسمو موسيقا بحياتهن .. وطول عمرهن مقضينها ع وفيق حبيب .. وعتابا وميجانا (مع أنو حلوة العتابا) ..

ممكن برأيكـ نعمل من هال 100 شخص اوركسترا ؟؟ اللي هي صيغة راقية كتير ؟؟

هي هي ذاتا .. الديمقراطية .. صيغة راقية .. واللي متل مو الأوركسترا ما بمشي حالا لتعلم العازفين يكونوا عازفين .. الديمقراطية .. نفس البلوكة تمام ..

بينما جيب 100 شخص من فرنسا .. رح تلاقي عالأقل .. 50 شخص بيخلص حالو ع شي آلة .. و29 منهن محترفين .. باعتبار أنو الموسيقى مادة مهمة بالمنهاج الفرنسي متلها متل الرياضيات .. هون فيكـ تعمل أوركسترا لأنو اجمالا ً الكل بيعرف يقرا نوطة .. لأنو كمان بيعلموها بالمنهاج الأساسي .. يعني الأوركسترا بالأخير بتخلص حالها ..

وازا جبت 100 شخص من الشعب الكمبودي .. رح يطلع معكـ شي قريب لنتيجة الشعب السوري .. لأنو هاد شعب بدولة نامية .. وهداكـ نفس الشي ..

الديموقراطية متل الأوركسترا .. صيغة راقية .. ومتقدمة كتير للحالة الموسيقية .

والمجتمع .. بيعمل مع بعضو نغمة ... ازا ما المجتمع نفسو عندو وعي موسيقي .. ما ممكن لأي مايسترو أنو يعمل شي يطلع تنغيمة منه.. لأنو بالنهاية المجتمع ما عم يعرف اللغة الأساسية للتنغيم الي هي النوطة .

يعني برأيكـ كيف ممكن أي مايسترو .. أنو يطالع نغمة أوركسترية .. محترفة .. من ناس ما بيعرفو .. الفرق . بين مفتاح الصول .. وبين صندويشة البسطرمة .. ؟؟؟

لا تقلي المثال مو موفق .. لأنو .. أقرب شي للي موجود حاليا ً ..

هلأ شو الحل ؟؟

في حلين ..

واحد مرحلي ..
هو أنو نلتفت للأمور اللي نسكج فيها سكاجة .. و نعارض بطريقة مدروسة .. يعني نعارض الناس الصغار .. واللي عم يأثروا تأثير مبشار ع حياتنا .. لأنو أي صيغة معارضة للسلطة (ممثلة برأسها) ... رح يكون تأثيرو كارثي عالمعارض ازا فشل وعالبلد كلا ازا نجح ..

وشفنا تجربة المعارضة العراقية .. شو جابت للعراق .. لأنو صدقني ما ممكن تنجح تجربة معارضة .. ألا ازا استعانت بـ براا ..

هلأ اجا الوقت لأسألكـ سمعت عن معارضة بدولة نامية .. حسنت تغير بطريقة سلمية ؟؟ ولا قللي عن معارضة بدولة نامية التفت حولها الجماهير وراحت لعند الحاكم .. وقلبت نظام الحكم (طبعا ً بلا معونة أجنبية)؟؟



ليش .. لنستورد سيارت ما خرج تمشي عالاسفلت تبعنا .. ؟

سؤال يستحق الإجابة ..