[فلسطينية الشتات]

يا اخوي العزيز

الحياة غريبة، دايما فيها الكويس والعاطل
فيها الحب وفيها الكره
فيها الفرح والمرح والأمل
لكن فيها الحزن واليأس والملل

وصدقني كل شي بصير معنا في الدنيا هو نتيجة خيار احنا بنختاره بإرادتنا الحرة

يعني لما تصحى وانتا قرفان الدنيا كلها ومش شايف اشي غير الكآبة
راجع نفسك، شو رح تستفيد من كل هاي الأشياء، او شو رح يصير وشو رح يأثر هالوضع
في الناس اللي حواليك ؟؟؟

ولا شي، لكن لو قررت للحظة انه لا ما بدي اكون بالسلبية هاي بدي افرح بدي اصنع من ضعفي قوتي ، صدقني شوي شوي الامور رح تختلف.

وانا مش بس بحكي والسلام، بحكي من تجربة شخصية، واكيد الامور ما رح تتغير من اول مرة ولا ثاني مرة، وبجوز تضلك تحاول وما تزبط معك لكن لا حياة مع اليأس ولا يأس مع الحياة. لازم تضلك تحاول والا ما يكون في تأثير.

وبدي اعطيك هالمثال:

لو جبت حجر صغير ورميته في بركة شو رح يصير؟؟؟ رح يتغير سطح المي شوي وترجع بعدها مثل ما كانت، لكن هل فعلا ما تغير شي؟؟؟؟؟

انا بحكيلك لا تغير، صار في حجر زيادة في قاع البركة، وهذا بحد ذاته لو ما كان ظاهر للعيان هو تأثير . اتمنى تفهم قصدي


وروق يا اخي روق والله ما في اشي مستاهل