[jano.]

يا عمي اتركو هالبشر تخترع على كيفا، يعني هيك وهيك الشمس رح تصير حمرة وتحرقلنا الارض بعد 5 مليار سنة، فانا برأيي خلي البشر تعجّل شوي وتخترع كل شي معقول وغير معقول، ماحلوة مشان سمعتنا قدّام المخلوقات يلي رح تجي بعد الحريقة العظمى

الاستنساخ بشكل عام متل السكّينة، فيك تستعملها لتحضير الاكل وفيك تقتل فيها... يعني أول انسان اخترع/اكتشف السكين كان قصدو يستفاد وما توقّع أو ما اهتم باحتمال انو ينقتل بنفس السكين...
اليوم في كتير اختراعات تعودنا عليها وهيي بنفس الوقت مضرة بالبشريّة..
بالنهاية الانسان رح يضل يكتشف وما بتصور رح تتوقف هالعملية ابداً..
حاليا فكرة الاستنساخ هيي تطوير جنين عن طريق اخذ الحمض النووي لشي شخص وزرعو ببويضة تمّت ازالة حمضها النووي مسبقاً وبعدين تحريضها عالانقسام، ومن هالجنين (قبل تطورو لمراحل متقدمة) رح يتم استئصال خلايا جذعية ممكن تحويلا لاي نوع من الخلايا العادية كنسيج أو كعضو وزرعا بالجسم... هي هيي فكرة الاستنساخ
أما استنساخ انسان بالغ (يعني رح يُترك الجنين المستنسخ لينمو ويكبر) فبتصور رح يقتصر على حالات العجز عن الانجاب أو مثلا فقدان طفل للعائلة(كتيرين بيشجعو الفكرة الاخيرة بس أنا شخصياً بحسا قصة فاضية، يعني خلي ينجبو طفل جديد وبلا فزلكة)...
بالنسبة لاستنساخ شخصيات تاريخية متل ما بنسمع بكل مناقشة عن هالموضوع: هلّا بجد مصدقين انو ممكن يصير عنا جيفارا أو اينشتاين أو طرزان أو توتعنخ آمون جديد فقط لانو النسخة هي مطابقة عضوياً 100%؟؟؟ أكيد عم تمزحو مو؟

بالنسبة للخلايا الجذعية، استخداما حالياً -والتقدم الي توصلولو العلماء لحد الآن- مقتصر على استنساخ او تكوين بعض أعضاء الجسم. هون لازم نعرف انو الخلايا الجذعية نوعين:
1- خلايا بتتاخد من الجنين، وهون رجعنا لنفس قصة الاستنساخ لانو بيتم قتل جنين. لكن هالخلايا بيقدرو العلماء يكونو منها أي عضو وأي جزء من الجسم يعني شي متل "خلايا عامة"
2- خلايا موجودة بجسم الانسان البالغ متل خلايا نخاع العظام او خلايا الحبل السرّي وغيرا، بس هالخلايا ما بيقدرو يطورو منها أي عضو بشري حابينو، يعني الاستفادة منها محدودة..

وطبعا كل هالامور، الاستنساخ والخلايا الجذعية، كلها قيد التطوير وما وصلت لمرحلة انها تتطبق مية بالمية، بس أكيد تكنولوجيا الخلايا الجذعية رح تتطور باستمرار، لانها تقنية مسموحة ولو بأطر محدودة، ورح تحقق قريباً الغاية المطلوبة منها، وهون لازم ما ننسى شغلة مهمة:

حتى لو صار عنا تقنيات تعوّض عن الفوائد المترقبة من الاستنساخ و تكون "أخلاقية" اكتر منّو، الانسان رح يستسخ ورح يعمل شغلات جديدة هيي بالنسبة النا أغرب من الاستنساخ بكتير، لانو الانسان فضولي ولو كانت اكتشافات البشر من البداية مقتصرة فقط على الضروريات ما كنّا وصلنا للتطور الحالي...
يا جماعة لاتفكرو انو في دولة عندا كل التقنيات والعقول اللازمة للاستنساخ وما نسختلا عالقليلة بني آدم واحد بالسرّ!