هلا مروى
اقتباس:
|
ازا وجود حدا بيهدد وجود آخر .. هل من حق هلـ حدا أو هلـ آخر إنو يطالب بالغاء وجود منافسو؟
|
بعتقد انو هون بدنا نبلّش من أولها... هل من الممكن انو وجود حدا يهدد وجود الآخر؟ مجرد وجود؟
رأيي الفلسفي الفزلكي انو لأ, مافي وجود بحد ذاتو يهدد وجود, اللي ممكن يصير انو يكون في خواص بهالوجود تتعارض مع خصائص وجود الشخص الآخر, و بهالحالة في حل فلسفي أو سياسي بانو الواحد يبحث عن نقطة توازن ما بين هالخصائص (بمعنى آخر, كل واحد يحط من عندو شوية جهد لحتى يصير في, ازا مو تعايش على الأقل تجاهل وجود).
أما لما احد الطرفين أو كلاهما ما بدو يحط من طرفو شوية جهد... فهو المشكلة و هون تبدا النزاعات من خناقة الحارة للحروب العالمية, بس هون الأمر ما بيتعلّق بالوجود بحد ذاتو انما بخصائص مرتبطة فيه, و هالخصائص مهما كانت دوغماتية الواحد لازم يحاول يسيطر عليها.
اقتباس:
ازا كرهت شي لأني خايفة منو ولأنو وجودو عم يهدد وجودي ... حريتي بتسمحلي إني طالب بالغائو ؟
|
لازم ما ننسى انو في مجموعة ضوابط تنظّم عمل هالمجتمع (قانون أو دستور أو شو ما كان), و انك تخافي من شي حقيقة يهدد وجودك فاللي عم يخرق حد حرية التعبير هو هالشي و ليس انت, و بالتالي انتي من حقك تطلبي حماية أو تحمي حالك بنفسك اذا هالحماية مش موجودة.
فرضاً.... شي واحد (متل ما التقيت من فترة بالبلوغوسفير) عندو فكرة ايجابية تجاه العنف ضد النساء و يدعم و هيك... فهو هون عم يحكي حكي... و في فرق بين انو يجعجع و ينرد عليه كما يستوجب (بالطبع رديت عليه) و فرق بين انو فعلا يكون في تهديد حقيقي لانو يضرب امرأة أو يأذيها..
ازا بيجعجع بس... هو واحد كريه و بهالحالة المجتمع لازم يتعامل معو طبقاً لكراهيتو و لكن ما فينو يلغيه
اذا حاول يأذي.. هاي ما عادت حرية تعبير هاي صارت جناية..
مثال تاني:
في واحد باسبانيا هون هو ابن جنرال سابق بجيش فرانكو و يكتب و يعمل محاضرات (فاشي - نازي), فالمهستر هاد بيحكي بالتلفزيون وقت يطلع انو هو لو عندو طريقة يجيب سلاح و يجند ناس كان حاول يعمل انقلاب...
وقت يحكي هيك و هلأ الناس يضحكو عليه كتير و ما حدا يحاول يسكتو, لأنو الديمقراطية صارت شي داخل الحياة الاجتماعية و ما رح يقدر حدا يزعزعو, و لكن لو بيشوفوه عن جد عم يحاول يدبر سلاح و يجند ناس بيروحوه عالسجن..
من الممكن يكون في 1000 واحد بيفكرو متلو و ما حدا يحاكيهون (طبعاً منبوذين و مكروهين و كرد فعل على كراهيتهون لهالمجتمع), و لكن لو هالألف واحد بيفكرو يعملو حزب ضد الديمقراطية رح يمنعوه, لأنو صار في قدرة تنظيمية حتى لو صغيرة و لكن هي محاولة تنظيم ضد الديمقراطية (ما يعني هالشي انو الفاشية ممنوعة, في أحزاب فاشية كتير بس صغيرة جدا جدا جدا, بعضها ما عندون غير 20 عضو, و لكن لحتى يترخصو لازم يكون واضح بنظامهون الداخلي انو هنن ضد أي وسيلة عنيفة لإحداث تغيير)
ما بعرف اذا وضحت الفكرة...
سلامات