صرلي فترة متردد لحتى نزل هالفكشة هي
انو احكي هلئ هالفكرة ولا انطر شوي بركي بتروح السكرة وبتجي الفكرة وبطلع بشي موضوع عليه القيمة احسن من هالعلاك كلو
واوقات كتير كنت قول لحالي مافي داعي لهالموضوع ....... اسماع وسطح
بس لما شفت انو الموضوع لساتو شاغل بالي .. قلت ما بدها تفكير.. اكتبو وريح راسك..
ويا رب اقدر افهم بـ يوم من الأيام..
بلشت الحكاية من زماااااااااااااان
زماااااان زمان... بالقرن الماضي هيك يعني
و انا طفل صغير .. لفت انتباهي رياضة غريبة كتير بيمارسها الناس اجمع..
أول مرة شد انتباهي الموضوع هاد كان في يوم الظاهر كان فيه لعبة مهمة.. وسيادة الوالد عازم الشباب بالبيت يتفرجوا على المباراة معو..
لحد هون ما في مشاكل.. انا صحيح مو فاهم هني بيتفرجوا على شة بالزبط!.. بس قلت مو مشكلة.. مسألة أذواق
!
و فجأة يا حضرات
.. بتفاج/ق/ بصوت صريخ و وعياط بالصالون -(موقع متابعة المباراة المهمة مو صالون اخوية )- فـــ /اتخضيت / على قولة المصاروة شكلو في مصيبة بالموضوع
بس طبعا مافي لا مصيبة ةولا من يحزنون .. مجرد أعراض طبيعية لأي جلسة متابعة لمباراة كرة قدم..
وطبعا ما قدرت افهم الحماس الرهيب هاللي بيخلي الواحد يطلع عن شعورو و هوي بيتابع لعبة رياضية عالتلفزيون
المهم انا ما بقدر اسكت ....... رحنا عند سيادة الوالد ..... وصار هالحديث الفاشل
بابا
اي حبيبي
هلئ ليش كنتو بتعيطو وبتصرخو متل المدري شو وانتو عمتتفرجو ؟
لان الوحدة جاب كول يا روحي
ايوا ....... اي وإزا يعني .... شو أول مرة بجيب كول بحياتو
لأ يا بابا لأننا كنا فرحانين
طيب وفرحانين ليش
لانو نحنا وحداوية ....... منشجع الوحدة ..... لهيك فرحانين
طيب ليش ؟
لأنو لعبو حلو حبيبي
طيب يعني الجيش ما بيلعب منيح؟
اي حبيبي ما بيعرفو يلعبو
طيب ما دام الجيش /حمير لعب / ليش الناس بتشجعها ...... وما دام الوحدة لعيبة لهالدرجة ليش مو كل الناس بتشجعها ؟
ما بعرف حبيبي
هون الحوار وقف مؤقتا..
و انا لساتني عمفكر.. و حاول افهم.. ليش الجيشاوية بيشجعو الجيش!!.. شو اللي جبرهن عهالشي
// هاد على افتراض الجيش مانهن لعيبة //
الشي الوحيد اللي قدرت اوصلو .. انو الله بعاقب الجيشاوية عزنوبهن .. بقا بيخليهن ما بيعرفو يلعبو..
وحسب ما بيقول الشيخ :
اقتباس:
إني لأرى أثر المعصية في سلوك زوجتي ودابتي و الفريق الذي أشجعه
|
وهون راحت السكرة واجت الفكرة
رجعنا عند سيادة الوالد
وصار هالحديث مجدداً
بابا
اي حبيبي . خير يا طير؟
هلئ الجيشاوية رح يفوتو عالنار شي ؟
شو شو شو ............ حبيبي شايف هداك الديناصور اللي هنيك ؟
خلصت السيرة هون ؟
أبداً .. مستحيل
متل ما توقع سيادة الوالد... ابنو عندو عاهة مستديمة
.. و يبدو انها نادرة جدا
.. الله بلاه بابن //
معوق كروياً //
حكمتك يارب
و تمر الأيام.. و تمر السنين.. و حوارات كتيرة متل هالحوار بيتكرر معي ..
ومن كم شهر ...... واقف بسوبر ماركت .........مالي ولا عليي .... عمحاسب الكاشيير
و إذ يا حضرات بميكروفون ضخم شق الأرض وطلع بنص خلقتي .. بتطلع هيك .. بلاقي مذيع بوجهو البشوش و حاشر الميكروفون بنص بوزي و جنبو الكاميرا مان...
خير يا رب !!!!!!!!
الاحمر هوي المزيع
والازرق انا
:
هلا فيك اخوي
: أهلا و سهلا
لحد هون مافي مشاكل..
المشكلة باللي جاي..
تخيلو اخونا بالله ترك كل اسئلة الدنيا ....... واجا بدو يسألني شو يا حزركن ؟؟؟؟؟؟؟؟؟ صح!!
حبيب.. شو بتتوقع بتكون نتيجة مباراة بكرا ؟!
: ليش في مباراة بكرا ؟؟!!!؟!؟!؟!
: إي.. نهائي بطولة كأس آسيا !
: و في كاس آسيا كمان؟
: إي.. بكرا النهائي بين العراق والسعودية ..شو بتتوقع بتكون النتيجة؟
: بصراحة ما بشوف فطبول .. طابة ... الخ بالمرة
: اي ما بيأثر ..... بس عمأسالك عن النتيجة !! شو بتتوقعها؟
: يعني مصر على موقفك انت؟
: إي طبعا.. شو توقعاتك للنتيجة؟
:
.. توقعاتي انو بحالة فوز السعودية.. رح تتعبى الشوارع بالمجانين والطرقات رح تتسكر .. لهيك بنصح الناس يأجلوا مشاويرهن لبعد بكرا.. و في حالة فوز العراق.. رح تضل محتلة..
: تبا لك /بالاجنبي/ ..طراخ (صوت قفل عدسة الكاميرا)
و بتمر الشهور.. و بنفس نفس المكان..
ماشي بأمان الله ..
و فجأة.. بلاقي كل واحد ماشي من جنبي .. يتطلع فيني و يبتسم.. و يقول لي بكل عين وقحة "مبروك"
غريبة. هواليوم اديش بالشهر بالزبط؟
ترن ترن <------ صوت الموبايل
: مبروك
: الله يبارك فيك.. خير؟.. اليوم عيد ميلادي شي؟
:
مصر أخدت الكاس يا مان !..
: لا حول ولا قوة الا بالله.. مصر عمتسكر يعني ؟؟؟؟؟ كيف اخدت الكاس
: خمرة شو؟؟؟؟
كاس أفريقيا يا حمار ..
: يا ويلي ....... هوي افريقيا كلها عمتشرب
: يا تنح بلا زناخة هلئ .. مصر أخدت كاس بطولة أفريقيا!
: ياحبيبي ركز.. أخدو الكاس ولا البطولة؟؟
: أخدو كاس البطولة..
: ماشاء الله.. و هاد يعني غير الدوري؟
: تبا لك/ بالاجنبي كمان / !.. وتسكر الموبايل بخلقتي
هلئ
ظاهرة هوس الطابة..
من الظواهر الطبيعية الغريبة اللي بحاول دايما افهمها.. و بعجز بسبب الإعاقة الكروية اللي عندي (و ماحدا يشمت .. هيك خلقة ربك ) ..
دايما بحاول أفهم.. و بتنتهي محاولاتي بالفشل الذريع!..
و سبب حيرتي و عجزي عن الفهم.. هو اني تعودت اني ما اعمل شي إلا و انا عارف منيح ليش بعملها .. وواخدلها نية.. و محدد الهدف منها..
بقا لهيك مو قادر افهم.. على أي أساس الواحد بيختار انه يكون وحداوي او جيشاوي او أهلاوي
هل هي وراثة؟ ولا هوي اختيار مبني على اقتناع ووضوح رؤية؟
و هل يجوز شرعا ان الوحداوي يتجيش / يصير جيشاوي / بيوم من الأيام أو انو الجيشاوي يتوحدن
كمان مو قادر افهم.. شغلة سجود الشكر في المباريات هي!
الأصل انو الطابة رياضة.. هاد بالنسبة للي بيلعبو.. و ترفيه.. بالنسبة للي بيشجعوا..
لو قلنا رياضة.. فهل الفريق الفايز استفاد على المستوى الصحي من ممارسة الرياضة أكتر من الفريق الغير فايز ؟
و لو قلنا ترفيه.. فما الفضل و المنة و النعمة الربانية في فوز فريق على آخر في "لعبة" الهدف منها الترفيه..
و هل يقابل سجود الشكر من الفريق الفائز بأن يتوب الفريق الخاسر إلى الله و يرجع عن خطاياه و يصلوا ركعتين بنية التوبة ؟
ما هوي لو الفوز بالمباراة نعمة.. بتبقى الخسارة ابتلاء و غضب من الله يعني ؟
خلصنا .........