[yass]

معلوماتك عن اعلان دمشق الصراحة عم تفاجئني يعني... انو ممولة خارجيا؟ من وين؟ مين مراهن عليهون؟

ميشيل كيلو مرتبط مع عبد الحليم خدام؟ بشو؟ ما عبد الحليم خدام سافل ان كان بالحكم و ان كان "مستعرض" ... و الكل بيعرف هالشي, و ما بيحط ايدو بأيد خدام الا الغبي أو اللي متلو سافل أو كلاهما معا... و ميشيل كيلو ما عندو ولا وحدة من هالصفات

بدي اسأل كمان مين "منسق أعمال اعلان دمشق بباريس"

أنو في باعلان دمشق مليارديرية؟ أي في واحد ما بعرف اذا ملياردير بس مليونير أكيد... اسمو رياض سيف, و مشان كون صريح معك ما بعرف اذا مالو نظيف أو لأ... بس انو لما كان عضو مجلس شعب كان الو كذا سنة مليونير... ليش ما حدا تذكر انو نصّاب أو حرامي؟ و يا ترى نص مسؤولين البلد ان لم نقل أكثر أنظف منو؟

بعرف انو اعلان دمشق ارتكبو أخطاء و خطابهون شوي ضايع و ممكن حتى أفكارهون ضبابية... بس ممولين خارجيا؟؟ لأ ما بعتقد, بالأحرى ما بصدّق... أرفض التخوين, و التخوين اسلوب رخيص جدا... لو واحد ميت من جوعو وقال كلمة معارضة للنظام راح يعملوه خاين... هاي سنة الحياة بالبلد