[VivaSyria]

لعما هيك أنا حكيت؟؟!!! إي أكيد أنا لأنو عن جد هاد طلبي الوحيد بهالدنيا... هاد ميدو لقطني بلحظة ضعف (نادرة الحدوث)..

بس بالفعل أنا ماعد فرحت من زمان.. أخر مرة فرحت بشي من شي 7 أو 8 سنين لما أخدت البكالوريا و إشتريت سيارة... والله هي أخر مرة فرحت فيها.. يومها كنت مبسوط و عم إضحك من قلبي.. بعدها ماعد شي فرق.. كل شي متل بعضو.. البنات متل بعضن.. الأكل متل بعضو.. السيارات متل بعضن.. الشغل متل بعضو.. (طبعاً هون ما عم قارن البنات بالشغلات التانيه بس لأنو هي حياة الشب قبل ما يتجوز) يعني بإختصار ماعد في شي إلو طعمه...و اكتشفت ليش لما بدو حدا يشبهلك حالة فرح بيقول ( متل الولد الصغير يلي جايبنلو لعبة جديدة) عنجد هي أصدق لحظات الفرح.. الطفل لما يفرح هي أصدق مشاعر ممكن تشوفها..

كتير بتطلع عالسما و بقول ياربي ما بدي شي خود كل شي بس رحعني صغير افرح و العب و اضحك من قلبي.. والله مشتهي افرح عن جد مو تصنع ولا تمثيل.. والله تعبت ..على مايبدو بعدني بلحظة الضعف..