[Nirvana]

بدي قلكن عن قصة صارت هالأسبوع عنا بمنطقتنا (بعرف اني بالأردن بس الفساد هوي هوي وين ما كان)

نحنا بتيجي المي عنا من سلطة المياه مرة واحدة بالأسبوع (واللي هوي يوم الثلاثاء) بقومو الكل بعبو خزاناتهم ليكفو باقي الأسبوع، لازم تيجي المي الثلاثاء الصبح أو الاثنين بالليل.
اللي صار انو الماي ما اجت الا للساعة 6 المساء التلاتاء وضعيفة كتير ونحنا ساكنين بأعلى منطقة من المدينة والخزان فاضي، مشان هيك المي يادوب عبت ربع الخزان.
قامت في جارة النا (جدعة وصاحبة مبدأ وصاحبة حق) اتصلت مع مسؤول في سلطة مياه المدينة (طبعاً بعد ما حكيت شي مليون تلفون ومع مليون سكرتيرة) قام شو بقلها كان في عطل ونحنا فتحناها للمي وقالولي اللي بفتحو المي انو وصلتكم ومشيتو حالكم (شوف هالمنية)، قالتو انو لأ وانو الخزانات شبه فاضية وما بتكفي ولا ربع أسبوع، قام وعدها يبعتلها تنك مي من سلطة المياه ليعبي الخزانات عندها، قالتلو لأ كيف بدك تبعتلي مي الي لحالي وجيراني شو يعملو .. ولا ما بينفع غير كرت غوار معكم .. قلها خلص رح نبعتلك للشقق كلها، قامت جارتنا عملت المعاملة وأخدت وصل بكمية المي وهالحكي من يوم الثلاثاء الماضي، اليوم اللي هوي السبت لوصل تنك المي الي رح يعبيلنا بعد مليون تلفون تاني (انو وينك ونحنا مقطوعين من المي).
المهم .. ما وقفت لحد هون.. يفترض بالأخ اللي جايب المي يجيب كمية محددة من المي للشقق اللي بالعمارة كلها وموجودة هالكمية على الوصل اللي مع جارتنا، بيجي اليوم حضرتو جايب يمكن ربع الكمية بس .. !!!

طبعا بتقدرو تفترضو بكل راحة انو يا اما اعطى المي لواحد أهم منا أو باعها لحدا تاني وكسب هوي على حساب سلطة المياه وحسابنا ..

ايه شو رأيكم .. هاد فساد ولا مو فساد ..؟
المي مو حق طبيعي للانسان ولا لأ..؟
والفساد منتشر تحت وفوق وفي كل الطبقات ..
تخيلو معي لوين بيوصل الفساد!


طبعا ملاحظة على الهامش: نحنا بالأردن ما بنقدر نشرب من مية الحنفيات .. لازم كمان نشتري مية الشرب !!!!