اليوم الاول 26/2/2009
يا سيدي ما انا .... بعد سهرة سهرتها مع رفقاتي للـ 2 ... رجعنا عالبيت ... فتحت كتاب الادب وبلشنا قراية .. 
الشي الطبيعي انو ما كون فهمان شي .. كوني نعسان و آكل بهدلة تازة ... من الماما ...
المه يا دوب قعدت ربع ساعة واذ بتطب عليي هديك يلي بيسموها الناعوسة ...
وقدحناها نومة للـ 7.30 الصبح ... قمت لبست هالبنطلون وهالكنزة وهالجاكيت ... وفوراً عالشغل .... بنشاط وحيوية 
اكيد الشغل ... مو كل العالم بتروق فيه ... بس انا اليوم كنت مروق شنو بدنا نقبض الراتب ...
طنت الساعة 12.30 ... وقبضنا الراتب .. انشالله اصرفو بالهنا ....
وفوراً عالكافي نت منشان نصرفوا للراتب 
المهم .. يا دوب قعدنا شي ساعة الا نكشة .. واز بتطن الساعة 2 .... يعني موعد طفي الكهربا ....
رجعنا عالبيت وكفاها الله .... 
اخدنا هالدوش الدافي ... وثم ....طلبت الوالدة من حضرتنا ان نطبخ .. ولي شو طبخ ما طبخ (مع العلم انو صرلي شي جعتين بلا ما آكل طبخ ) بس لاني كنت تعبان وصينا ع بيتزا ع حسابي الخاص ... واكلناها ....
وبعدها ضبينا هالشنتا ورحنا عالمدرسة ...
طلع استاز الفلسفة بخلقتي اول ما وصلت ...(يبعتلو قتلو )
فتنا على هالصف .. وكوني ما بفهم شي عليه وكونو هوي حمار معبى ببنطلون ... خطيت هالراديو وبلشت ااسمع على فيروزيات المسا ...
هيييييييييييك لحتى خلصو هالحصتين المقرفتين تبع الفلسفة العربية (ملا عربية ) بسلام ... طبعاً طلع مع الاستاز انو ابن سينا والخوارزمي عرب .. كيف ما بعرف .... هوي كان رح يقول انو الله عربي ... بس ما زبطت معو ....
نزلنا عالبريك ... تزهرمنالنا لقمة وكاسة شاي ... ورجعنا على حصة العقد النفسية (الديانة ) ... ليش عقد نفسية ..... ؟؟
لانو بكل بساطة استازنا عندو عقدة من شي اسمو ابنا الاغنياء والمسؤولين !
العمى ضرب جوز عيونو ضرب اديشو معقد !
طلع هيك كم طالب مو جايبين كتا ... ومنهن انا ... وابن واحد غني .... يا حرام ... هالابن الغني ماحكى شي .. بس ما بيصير الاستاز شيت الديانة ما يستلمو ... 
حللو شخصيتو .. شلحو الطواق يلي لابسها .. قال هي كفر ومستوردة من الغرب .. شوية تانية رح يشلحو الاندر وير شيتو !! 
وبما انو استاز الفلسفة هوي مدير المدرسة ... قعد يحكي مع الطالب (ابن الغني) بالفصحى المفلطحة ....وقعود بقا على تفلسف ...
رجعنا عالصف .. وضل يعيد ويفتق بالسيرة (استاز الديانة الزفت ) ... هذه الميتلكا فساد للخلق .. وهي من الشيطان ... والخ ... من العلاك (طبعاً عنا معدومة الحرية الشخصية ) ..... ومنشان هيك وجكارة فيه (لاستاز الديانة ) قررت اجي الجمعة الجاية لابس صليب .. وازا لقيت نجمة داوود .. نعمة من الله 
بعدها .. اجا استاز الانكليزي اللئيم (بس انو ما بو شي بالتدريس) ... عطانا كم درس من الملحق الادبي يلي ما في كلمة فيه ما بدها ترجمة ...
انصرفنا الحمد لله قبل بنص ساعة .... ورحنا عالنادي وشفنا اور فريندز .... وشجعناهن .. 
ومن ثم رحنا على مطعم فيه الجزيرة الرياضية (مع اني ما بتابع رياضة ) بس كانت عزيمة .. على اركيلة ... ما حلوة خيب آمال الشبيبة ... تفرجنا عالمباراة وتزهرمنا وتكورتنا اركيلة ... وخسر الفريق يلي كانوا عم يشجعوه (اسي ميلان) يا شماتتي ....
وتوجهت بفوري لاكتب هي المئالة ... هون ان زيس سقيفة ...
اقول قولي هازا .. وادعو سعدو .. ان لا يتعطل السيرفر وانا افقش على (ارسال الرد)
نراكم في الحلقة القادمة 
وغداً نلتقي 
الكلُّ سفّاح و ابنُ سفّـاح
.
القومُ أبناء القومِ يا صــاح
.
عندهم الدّينُ زهقُ أرواح
.
والذّبحُ للنّاس نهجُ إصْلاح
|