قصيدة الأم
يا أمي بْعِيدِك البِيشعّ زِيني......... بقِصّة ماضيه بِتْذكِّريني
قِصّه من الدّني أجْمَل و أروع......... أنا رَح قُولها و إنتي اسمعيني
إجَا بِــالأمس مِستَعمِرُ و فَظّع......... بهَوني أرض ما فيها سَكيني
و صار من الصبايا بنَات يجمَع......... وقِف ضِدّو فَتى مِن غَير طِيني
غضب هالظالمِ الوجّو مقَنّع......... و بَعَتلو جَيش بِيغَرِّق سَفيني
و لمّا ما لَقى هالعَقِل ضيّع......... و أخَد أمُّو بَدَل عَنّو رَهيني
قَلها عِنقِك بهالسَّيف بِقطَع......... يَمّا وين إبنِك خَبِّرِيني
ما قالِتلو قَتَلها وضَل يِطمَع......... بمَقتَل ابنها و صارِت دَفيني
و بلَيلِة ابنها الغافي بيِقشَع......... بِنَومو صُورَة الأم الأميني
بِتِصرخلُو يا إبني قُوم إسرَع......... عاقَبري فَرشتَك خِطرَة و حَزيني
وَعِي دِغري و قَبل ما الفَجر يِطلَع......... حِمِل للأم وردي و ياسمِيني
و قَصَدها وراح حدّ الباب يِركَع......... بِحَسرَة و قال جِيت استَقبليني
يا أمي لو مَلاك المَوت يِقنَع......... قَسَم ما بَينِك و بَيني سنِيني
أنا السَّبَب في مَوتِكِ المِروع......... أنا خَاطي بْحَقِّك سامحيني
حكي صَوتِ الحَنُونة وقال إسمع......... يا إبني و لا بَقا تِجرَح حَنيني
دخيلَك لا بَقا عالبَيت تِرجَع......... لأنّو الظَّالم احْتَل المَديني
و شَعّل فَرشتَك و البيت زَعْزَع......... و لَولَا منِ الغَفَا تْهزَّك يَميني
كان جدّد بِقلبي جِرح أروع......... من الجِرح المعَلَّم عاجْبِيني
عِرِف سِرّ الحَقيقة و صَار يِدمَع......... بحَسرَة و قال يا أمّي ارحميني
عليّي سَاهرَه في كُل مَوضِع......... كأنّو الربّ وَدّاكي مَلاكي
تابِحيَاتِك و بمَمَاتك تحرسيني
موسى زغيب
peace, love, and gratitude