إي وسعدو ( الواو واو القسم يعني ) اجا هليوم اللي ما كنت متوقعه
وليكني فايت على قسم المسابقات وعم حط موضوع جديد
ما علينا
اللعبة اليوم يا اخوات ويا أخوة متل ما واضح من اسما ( معادلات )
بس هية مو معادلات رياضية بحتة متل ما تعودنا عليها
اللي هون معادلات بتعتمد على العمليات الرياضية فقط ومعطياتا بتكون ( انسانية - اجتماعية - نفسية - فكرية - سياسية )
يعني فينك تشكلها بالشكل اللي بدك ياه وتعبر عن الفكرة اللي بدك ياها بالعمليات الرياضية اللي كلنا منعرفها ( يفضل ما نستعمل اكتر من الجمع والطرح )
فكرة اللعبة بأن كل واحد فينا عنده معادلة رياضية مطلوب منه اثباتا\نقض اثباتا
بحسب ما هوي بشوف مناسب
يعني مثلا ولنفرض كانت المعادلة بالشكل :
اقتباس:
حكومة واعية - " اشارة ناقص" شعب واعي = دولة متخلفة
|
هون ممكن كل واحد يكون اله رأي .. يعني ممكن عالم تخالف هلمعادلة من باب أنو الحكومة هية اللي بتحدد مستوى الدولة عن طريق اجراءاتها وعن طريق اساليب تعاملها وهية قادرة على رفع العالم شو ما كان مستوى الوعي عندن لتعمر بلد متحضرة وطول ما انه الحكومة واعية فالدولة اكيد متحضرة وليكا ماليزيا مثلا من وقت ما حطت حكومتها طريق واضح قدامها صارت دعايات الرحلة لماليزيا شي بيفتح النفس .. والله شي بيفتح النفس
وممكن واحد يقلك انو لا ياسيدي هلمعادلة مزبوطة ومافيها شي غلط لأن طالما الشعب مانو واعي ما بحياتا الدولة ممكن تصير متحضرة وليكنا بلدان العالم التالت شو ما مرق على راسنا حكومات منبقى آخر بلدان البشرية بالتطور والتحضر .. يعني اللي عم يشلف زبالته بالطريق هاد مافي حق عليه وكل الحق على حكومته ؟! والله سمعة هي !!
بمعنى رياضي بحت انت يا اما بتاثبت صحة المعادلة المحطوطة بأدلة منطقية وبراهين مقبولة
يا اما بتأثبت عدم امكانية صحة هلمعادلة او صحتها بظروف محددة جدا .. هلشي بيتحدد بمدى منطقية تعاملك مع الموضوع ومدى عرض زلاعيمك وقدرتك على بلف العالم واقناعن بالفكرة
خلونا نبدا مع المعادلة الأولى لنشوف اذا بدكن تقدروا تأثبتوها أو بدكن تنفوها بشكل جزئي او قطعي
أب سيئ + أم سيئة = طفل سيء
هاموش ضروري الكل يقراه :
بجوز مع الأيام تنفصم شمسيتي بشكل كامل وانسى الباسوورد واليوزر تبع الأخوية أو حتى انسى كيف بكتب اسم الموقع فما تنتظروا مني شي كتير
يعني اللي حس بأنه انحكى بنقطة معينة لفترة كبيرة وانلعى قلب العالم والحوار مانه كتير حامي الوطيس( التعن بستمية صرماية اذا كنت بعرف شو هاد الوطيس ) وبنفس الوقت عنده شي فكرة عرف يمثلها بشكل معادلة وحابب يحطا بالساحة .. ما يستحي ولا يخجل من حدا ومانه مضطر ابدا يراسلني او يطلب مني او يعتذر مني او ايا شي من هلأشياء
البيت بيتكن يعني مافي حدا غريب وانا ضيف علموضوع متلي متلكن
على راسي شبيبة المسابقات والضواحي التانية كلها
