[fady juventus]

مرحبا داني
أنا أول ما شفت إنك رديت عالموضوع قلت "أكلناها"
لأنو إذا بتذكر إنو سابقا كنا كتير نختلف و بكتير مواضيع ... و دايما كان نقاشنا أنا و إنت يحتد ، بس هلأ أنا شايف إنو نحنا متفقين بالمجمل لجهة قراءة أبعاد هالحدث و الغاية منو ومستقبلو ، باستثناء المسبات اللي كتبتا و سببها إني كتبت الموضوع فور إقرار المحكمة وكنت كتير مزعوج وعم قاتل دبان وشي ، ومع إني كنت لحالي بس صرت سب و إلعن واللي زاد عصبيتي كلام سفير لبنان بفرنسا جوني عبدو عالعربية اللي سب أكتر مني لكن بقالب دبلوماسي وكان كلامو عم ينقط سم وحقد ع سوريا وما خلا كذبة إلا وقالا ...
أنا وعم أكتب الموضوع ، أكتر من مرة قررت إحذف المسبات بس بالأخير خليتها لتكون فشة خلق من مهزلة مبارح.

أنا بختلف معك داني إنو سوريا مابينوبها ولا حتى طراطيش.. صحيح إنو الحرب و المواجهة رح تكون بين اللبنانيين وعلى أرضن ، بس الغاية النهائية من تسليح 14 آذار هيي إضعاف و ربما كسر شوكة حزب الله واللي بيمثل بالنسبة لسوريا جبهة لصالحها بحالة الحرب مع إسرائيل أو اسمحلي قول لواء مقاتل إضافي ومن الدرجة الأولى قدر يهزم إسرائيل و يردعها بحرب تموز ومن دون ما يستخدم كل إمكانياته.
هلأ الفوضة الخلاقة اللي بدها إياها أميريكا بلبنان رح تسمح بإطلاق يد إسرائيل بلبنان لتدمير حزب الله والمنظمات الفلسطينية على أرضو.