[ري مي]

القصة انو الانسان ما بيعرف
واذا الانسان ما بيعرف.. يعني بدو يتصرف عالسبحانية
واذا تصرف عالسبحانية ..يعني يمكن تنقش معو ويمكن لاء
واذا ما نقشت معو بيكون تصرف غلط
واذا نقشت معو بيكون حظو حلو وبيكون تصرف صح
........................... وهيك
بهالمناسبة رح احكيلكون حكاية الدبانة يللي غطت عالتلج

قال مرة كان فيه دبانة غطت عالتلج
قالتلو: ويلي يا تلج ما ابردك وما ابردك
قللا: شو ما ابردني وما ابردني .. هلق بتجي الشمس بتدوبني

راحت لعند الشمس
وقالتلا: ويلي يا شمس ما ادوبك وما ادوبك
قالتلا: شو ما ادوبني وما ادوبني.. هلق بتجي الغيوم وبتغطيني

راحت لعند الغيوم
وقالتلا: ويلي يا غيوم ما اغطاكي وما اغطاكي
قالتلا:شو ما اغطاني وما اغطاني .. هلق بتجي الريح بتسفني(بالفصحى هالكلمة يعني بتطيرني من محلي مع الشدة على الفاء)

راحت لعند الريح
وقالتلا: ويلي يا ريح ما اسففك وما اسففك
قالتلا:شو ما اسففني وما اسففني .. هلق بتجي الجبال بتصدني


راحت لعند الجبال
وقالتلا: ويلي يا جبال ما اصددك وما اصددك
قالتلا: شو ما اصددني وما اصددني.. هلق بتجي الفيران بتعشش بحيطاني

راحت لعند الفيران
وقالتلا: ويلي يا فيران ما اعششك وما اعششك
قالتلا: شو ما اعششني وما اعششني.. هلق بيجي القط بياكلني


راحت لعند القط
وقالتلو: ويلي يا قط ما اكلك وما اكلك
قللا: شو ما ااكلني وما ااكلني.. هلق بيجي الانسان بيموتني


راحت لعند الانسان
وقالتلو: ويلي يا انسان ما اموتك وما اموتك
قللا: شو ما اموتني وما اموتني.. هلق بيجي عزرائيل بياخد روحي


اي عاد هيي ما بتسترجي تحكي عزرائيل ف سكتت.