الإخوة الأحباء المسلمين في الأخوية
هاد أول عيد بيمر بعد انتسابي لمجتمعكن الظريف (على اعتبار انو التقويم بيبدأ بيوم اشتراكي, وبحسب الأيام بقبل الإشتراك وبعد الإشتراك)
والله يا اخواني وأخواتي الله يعطيكن العافية عالصيام ومشقّاته بهالشهر يللي مضى بسرعة, وبتمنى من ربي يقبل صيامكن ويؤجركن عليه أجمل أجر.
وانشالله يكون كل واحد منّا فكّر بالمعنى الروحي للصيام.
وبهالمناسبة بتذكر مقال للفنان دريد لحام كتبه بجريدة سورية وحكى فيه عن البيّاع يللي حلفله انه ماعم يكذب وأتبع حلفانه بجملة "ولو الدنية رمضان معقول اكذب عليك استاذ؟"
وكانت فكرة دريد لحام فتوى أطلقها على مسؤوليته وبيحض فيها الناس انهن يعكسوا العادة :" وعلى مسؤوليتي اكذبوا برمضان إذا بتوعدوني تصدقوا بباقي شهور السنة".
ما بقصد بكلامي التلميح عن حدا معيّن لكن في كتير عادات بتظهر عند الناس الصايمين برمضان ويا ريت بتنسحب على باقي شهور السنة ولاّ شو رأيكن؟
فطر مبارك, وكل عام وأنتم بخير, .... وشوكمان؟ ... ينعاد عليكم وعلى أخوية بأيام سعيدة.
