شكراً إلك ... و رح إهديك ردّة شروقي لموسى زغيب
يَلّلي بِوجِّك حزن وِ عْيون تعبانين
قولي الحقيقة الْ بِقلبِك حاجْ مقهورة
ما بحِبّ قَطْف النَّحل بِكْفوف مكشوفين
وْ لا بْحبّ صَيْد السّمَك بِنْهور معْكُورة
المرأة مسافة مْن العشرين للخمسين
بتْصير تَلْجه .. بِشال الصُّوف مغْمورة
عن هالمسافه اسألي أهل الشّرع وِ الدِّين
أكتر ذنوب العِشِق بِتْكون مغفورة
دُوخي عَ مسْرح صِبا إيّامِك الحلوين
وْ خَلّي شْفاف الهوا عْناقيد معْصورة
بُكرا بْتنسي العطَش وِ بْيِبْغَتِك تشرين
و صدْق المرايه معِك بِيْغَيِّر الصُّورة
بذْكُر حَلاكي بْكُفْر ما بْتَعرفو شْياطين
بذْكُر حلاكي بْصَلا رِهبان بِدْيُورة
وْ كل ما بيلُوح الهوا شالات وِ فْساتين
وْ كل ما بْيكرُج وعْد عَ زِيف تنّورة
رُوحي تَ نهْرُب سوا هَوْنيك عَ بْساتين
من زَخم ريح التَّلج عَ تْلال مهجورة
تْسَرِّب طُيُور المسَا وِ يْضّلّْ هالشّاهين
يْفَلِّي رِياش العِشق عَ جْناح عَصفورة