[VivaSyria]

بداية ياشباب ويا صبايا لازم يكون واضحلكون إنو النقاش هون ماهو عن أديان أو أشخاص وإنما هو عن طريقة تفكيرنا وحياتنا يلي تتسم بكثير من السخافة والغباء وإنعدام الرؤيا... ليش؟؟!!!

بكل صراحة وموضوعية ومع إنقسام شباب أخوية كما أفراد المجتمع بين الأديان والطوائف والمذاهب ومع ظن الجميع إنو المنهج الذي يتبعوه هو الصحيح وكل ماعدا ذلك هو خطأ ظهرت حالة بالمجتمع غريبة كتير وهالحالة هي ضياع الهدف... بمعنى أبسط:

إن كان موسى رسول ولا مو رسول... إنت شو دخلك؟؟
ياعمي إن كان عيسى إبن الله ولا الله ولا روح الله وإن إنصلب وإن ما إنصلب... إنت مين أخد منك شي؟؟
وإن كان محمد صادق ولا كزاب... إنت شو خسران من جيبتك؟؟
وإذا علي الخليفة المستحق ولا الله ولا إبن خالة الله... إنت شو بيهمك بهالحكي؟؟

يعني إنت شو دينك "يلي مقتنع فيه"... شو بدك بباقي البشر شو بدون يفكروا؟؟؟ وبشو بدون يقتنعوا وبشو بدون يأمنوا ويصدقوا؟؟؟ ليش مضيع حالك وتفكيرك ونسيان أهداف حياتك الرئيسية؟؟؟ شو رأيك تفكر بشي أهم؟؟ ياعمي عليك من حالك وشغلك ومستقبلك...

شو علاقة هالشي بالمستقبل والشغل هون نقطتنا... نحنا على إعتبارنا شعب غبي صار شغلنا الشاغل هو الأديان والمذاهب والطوائف والحكي على بعض وتكفير بعض... ونسينا إنو البشرية ماشية بسرعة رهيبة ونحنا مقبورين بعدنا مختلفين المسيح انصلب ولا ما انصلب ومين أحق بالخلافة علي ولا أبو بكر...

بدي وضحلكون نقطة مهمه هون إنو ياعمي البشرية عمرها 6 ملايين سنة وعمر أقدم دين سماوي "اليهودية" حوالي 3000 سنة... طيب كيف كانت الأمور ماشية قبل هيك؟؟ ياعمي هلكنا ونحنا نقول الأديان هدفها الأساسي تحديد وتنظيم مجموعة القيم التي تضبط علاقة الأفراد ببعض بغية الوصول إلى مجتمعات حضارية محترمة...

وللعلم فمو جديد علينا موضوع الغباء وإنعدام الرؤيا والهدف والدليل نزول كل الرسالات والأديان بأرضنا... حدا بيقدر يقلي شو السر من نزول جميع الأنبياء والرسل والكتب بأرضنا؟؟ عمرك سمعت برسول نزل بالصين أو بسويسرا مثلاً؟؟ أنا بقلكون مو لأنو أرضنا هيّ أرض شريفة... الله ما عندو أرض شريفة وأرض نص كم... بس لأنو نحنا شعب مابيقتنع ونحنا شعب مابيعرف شو بدو... يعني بصراحة الله تعب معنا من كتر مانزل رسل وكتب على أمل إنو بيوم من الأيام نصير شعب محترم وحضاري... بس نحنا ما بدنا...

أوروبا والعالم بدون رسل وبدون كتب وبدون مذاهب وأفلام وقصص ماشية بشكل حضاري وعين الله حولها.. ولسا إنتو مختلفين مين دينو صح ومين دينو غلط... والله صار لازم نفيق بقى...

بوذا قال " أفضل معبد على وجه الأرض هو قلبك"... وأنا بقول إذا حنبقى هيك أول ما نتعرف على حدا من دين أو طائفة معينة بدنا نفكر بدينو أو طائفته لجزء من الثانية ونحمل سيف الجهاد لإثبات صحة ديننا وخطأ بقية الأديان بعمرنا ما حنصير بشر...

ودمتم.