في ببالي هيك فكرة صغيرة أو رد كنت عمفكر حطو تعليق بموضوع هون ببريد المنتدى رداًً على العضو (( مايسترو )) عميشتكي من وضع الخلافات بين الأديان .. و أنا عمبكتب هالرد, سرحت كتير الظاهر و وقت خلصت لقيت إنو الأفضل يكون موضع منفصل لأنو ماعادو بنوب رد صغير أو تعليق على موضوع ...
من فترة شوي طويلة كانت علقانة هون بالمنتدى العلقة العجيبة, إسلام مسيحية ضمن حوار الأديان , و خود يا معلم على مسبات و تحديات و إثباتات و نظريات و كلمات حتى كبار السياسين ما بيعرفوا يستخدموها .. و هون إنبثقت من ظلام الحرب فكرة إغلاق منتدى حوار الأديان .. و صار كتير لف و دوران و ناس مع و ناس ضد بس بالآخر إتسكر منتدى حوار الأديان ..
بعد بفترة صار في خلافات بين سنة و شيعي بالمنبر الحر, الخلافات ما كبرت كتير لدرجة إنو يصير تدخل من قبل الإدارة لحلها, لأنو بالأساس إجت هالخلافات من كتابات لا علاقة لها بأخوية و من مواضيع بالأصل منقولة من أماكن أخرى ...
بعدها إجت مشكلة السعوديين , أو بالأحرى الخلافات مع السعوديين, و هون عاد شفنا العجب, و قرينا كلمات عجزت قواميس الشوارع كلها عن إستيعابها, و بانت العنصرية على أصولها على كل من الطرفين .. و إتخذت الإدارة مشكورة بعض الإجراءات للحد من هذه الخلافات ضمن بيئة أخوية ..
بعد فترة الأدارة خففت إجراءاتها ضد السعودية, و ما إستفدنا شي .. الوضع رجع متل ما هو و رجعت المشاكل و الإدارة رجعت إتخذت إجراءاتها مرة تاني ..
و هلأ بعد ما عدينا عن المشكلة مع السعوديين رجعنا مرة تاني لمشكلة مع بعض ..
وهون أنا بسأل نفسي دائماً, إنو ليش هيك ؟ طبيعتنا يعني منحب المشاكل , والشغلة الأهم , مين هو رفيقي أو صديقي و مع مين لازم إتقاتل ..
هلأ المتل بيقول , أنا و أخي على إبن عمي , و أنا و إبن عمي على الغريب ...
هون فيني فسر الوضع هيك , بلشنا أول شي سوريا ضد السعودية ..
طلعت السعودية , رجعنا سوريا ( مسلم ) ضد سوريا ( مسيحي )
و متأكد متل ماني شايف الكيبورد
إدامي , إنو إذا طرف من هدول الطرفين الأخيرين طلع رح تصير المشاكل هيك على سبيل المثال :
سوريا ( مسلم \ x \ )ضد سوريا ( مسلم \ z \ ) و بعدها كمان رح يصير في إنقصامات لو فرضاً ربح الطرف x و منكمل المعادلة على هاد الأساس :
سوريا ( مسلم \ x -من الحارة الفوقانية- \ )ضد سوريا ( مسلم \ x -من الحارة التحتانية- \ )
و تستمر المشاكل و تستمر و تستمر ... لحتى يفضل بالمنتدى أنا و أخي يلي من أبي و أمي لأنو إبن عمي قوصناه من شي ساعتين لأنو هيك بيقول المتل (( أنا و أخي على إبن عمي ))
بعد فترة ساعتين و كام دقيقة, بكتشف خيانة أخي, بكتشف إنو طلع وثباوي .. و لك أخ .. بعد كل هالعيشة سوا أنا و أنت , و كل هالحروب اللي ربحناها ضد كل الأعداء و آخرتها إنتصارنا على إبن عمي بتطلع وثباوي ... كنا تقريباً 14 ألف عضو بالمنتدى و أنا و انت وصلنا على النهاية و صفينا كل الأعداء من جميع الطوائف و جميع القوميات و جميع محبي هاني شاكر .. و بالنهاية بكتشف هالمصيبة !!! طب ليش ماخبرتني من الأول ..
و بسرعة البرق باخد المسدس اللي مازالت السبطانة تبعيتو سخنة من الرصاصة تبعيت إبن عمي و بلقي نظرة سريعة على مستودع الطلقات بلاقي فيه إسا كام طلقة , لأنو ما صرلي ساعتين زمان معبيه .. و بدون ما عيد التفكير , لأني بالأساس ما فكرت بالموضوع , بصرخ بأعلى صوتي :
وثباويييييي يا حقييي******ر (( قال لازم تتشفر الكلمات هاي )) و طاااااخ ...
و شي ربع ساعة عمبيلعلع صدى صوت الطلقة بادني و بالمنتدى , لأنو المنتدى صار فاضي و بالهدوء بيضل الصدى شي نص ساعة أو تلت رباع الساعة عمبيروح و بيجي و يخبط بهالحيطان و بهالمنتديات الفاضي .. و يعلق شي كام ثانية بالجملة المكتوبة تحت (( أكتر مرة عجقت عنا عالخط : 1,006 يوم 30/06/2006 في 15:19. ))وهون ضحك الصدى و كفى خبيط بهالحيطان .. و طلع لفوق شوي و بيعلق كمان كام ثاني بالجملة (( البشر المنورينا هلق: 1 (1 عضو و 0 ضيف) يا لطيـــــــف!))هون شفتو بعوني عمبيضحك ضحكة خبيثة و بيتسائل بينو و بين حالو .. أنا هلأ ضيف هون ليش مانون حاطين إنو في ضيف ...
أكيد .. ما أنا ضليت لحالي بهالمنتدى ..
شي نص ساعة زمان تاني بيبلش صدى الطلقة تدريجياً بالتلاشي .. و بشعل سيجارة النصر على جميع الأعداء هالمرة عنجد .. نصر نهائي .. ما عاد ضل حدا غيري هون .. كل المعوقات اللي حكيت عنها أزلتها من طريقي , و هلأ فيني كفي الطريق .. بس المشكلة إنو ...
لوحدي