[krimbow]

شكرا وائل

طالما عم نحكي عن "ابجديات الاقصاء"، إذن لنجعل حديثنا عن ابجديات الاقصاء، و من ثم نتطرق للتطاول على الذات الإلهية، و بعدها نوضح موقف الادارة


الاقصاء يعني: اعتبار المختلفين عنا بالفكر او الفلسفة او الأيديولوجيا، غير موجودين بالمستقبل، و بالتالي سيسقطون من مخططاتنا المستقبلية

شو يعني هالعلاك؟
يعني اي بني آدم، بيعتمد على فلسفة معينة لتفسير الوجود، سواء كانت مادية او روحية او دينية او ...الخ، هلأ على اساس هالفلسفة منروح منبني حياتنا، و منهيئ مستقبلنا، لهون تمام
بيصير الاقصاء لما نحنا منسقط عمدا الناس يللي بيفسروا الحياة بمنظور تاني غير منظورنا من مخططاتنا، و اذا بدنا نحطهم بمخططاتنا فرح يكون بهدف ابادتهم او لنبسط الكلمة... لنقصيهم

و هالشي ما بيتوقف ع فكر معين، يعني الشيوعي ما بيتصور حياة شيوعية بوجود راسمالي، و هالشي طبيعي نابع من اساس الايديولوجيا الشيوعية، و ازا اعترف بوجودهم بمرحلة معينة، فرح يكون هالراسمالي هدف للابادة بالنسبة للشيوعي

و كذلك المؤمن، ما بيتصور وجود الملحد، و المسلم ما بيتصور وجود الغير مسلم، و كذا المسيحي و اليهودي و و ...الخ

هلأ تكمن الطامة الكبرى، لما يقرر احد الافراد، دفاعا عن احدى الفلسفات، انو "يمحي" وجود اشخاص تانيين ما بيعتنقوا فلسفتو

هون منضرب فرام
هون منضرب فرام يا مخايل
هون خط احمر

"ما بتقدر أبدا تلغيني
بدك تسمعني و تحكيني
و إذا فكرك عم تداويني
مش هيدا هوي الدوا

انا بتنفس حريي
ما تقطع عني الهوا
و ما تزيدا كتير عليي
احسن ما نوقع سوا"

يعني هالاغنية الرائعة للرائعة "جوليا بطرس" بتلخص موقف الاخوية
بس قبل ما ننتقل ع موقف الاخوية، خلونا نحكي عن الذات الإلهية، او بالاحرى عن التطاول على الذات الإلهية

يعني اسمحولي، بس كلمة تطاول مطاطة كتير كتير
بتبدا بالشتيمة الصريحة و ما بتخلص اذا قلنا لشي حدا الو فضل علينا "شكرا" (انو ما بيصير نشكر غير الذات الإلهية)

و الآن، و في خضم هالضبابية حول حدود الذات الإلهية و وين مسموح نحكي و وين مش مسموح
و في ظل ممارسات الاقصاء، قررت إدارة اخوية الاعتماد على اكتر ميثاق انساني موجود حتى اليوم، و يللي هوي "الميثاق العالمي لحقوق الانسان"
و اعتمادا عليه قررنا عدم اقصاء اي جهة و اي توجه فكري من الاخوية

يعني مع احترامنا لجميع المقدسات، و مع احترامنا لجميع الاطياف و المذاهب الفكرية، نحنا مش رح نقصي اي رأي من الاخوية

هلأ لما يجي حدا كاتب موضوع عن "ابجديات الاقصاء" و يطالبنا انو "نقصي" بعض البعض، يعني ما بعرف، بس انت و لو اختلفت مع المجرم يللي كاد ان يدمر الاخوية بالوسيلة، بس متفق معو بالهدف

و اذا بتلاحظ يا وائل، انت مشكلتك مع الارهابي المجرم، انو هكر موقع بيكتب فيه مسلمين، يعني عفوا لو كان هالموقع ما بيكتب فيه غير ملحدين كنت رح تكون مع التهكير؟

وا عجبي، و وا عجب المتعجبين