أخوية - عرض مشاركة واحدة

handsome · 15/02/2008

hanny dagher

اذا خيروك تكون فارة أو جردون شو بتكون وليش
ما كتير فهمت معنى السؤال ؟ بس انو رح قول فارة ... لانو كل عمري صحبي انا والفيران .. وبتزكر لهلق مرة وكنت صغير كنت بالضيعا وكان في فارة صغيري عما تقطع الطريق.. قمت مسكتة .. ومدري كيف فتلت عأصبعتي وعضتني .. وضلت معلقة شي ساعة عأصبعتي ومعد تفلتو .. بس بعدين نجوت من الحادثة بسلام

شو بتفضل انك تموت بالسم أو بشي مفرمة من تبع صدام
انو بشكل عام في متل بيقول ... لا يضر الشاه سلخها بعد زبحها ... يعني بالنهاي موت موت .. اذا الواحد توجع هالتلت ثواني لبين ما يموت او لاء .. ما كتير رح تفرق ...
بس مع هيك بختار اني موت بالسم

شو لون جراباتك المفضل
ابيض ... ما عندي اصلا غير جرابات بيض .. في كام واحد صيفيات لونو رمادي .. والباقي كلون بيض.. وبكره الجرابات الرسمية كتير

اي بزورات بتحب اكتر شي من يللي بكونو بالمخلوطة
شو هاي المخلوطة ؟؟؟ بس بشكل عام اكتر الشي موالح بحبها هي الكاجو . وبلا منازع

ايهما افضل سمك بلا حسك او فروج عالفحم
ما بعرف التنين بشكل عام طيبين . هلق انا بفضل الجاج عن السمك هاي الشغلة مافيا نقاش بنوب .. بس اذا سمك بدون حسك مشوي .... يا ويلاه ... وقتا بتكون عظمة على عظمة
شو حلمك اللي ما بتتوقع انو رح يتحقق؟؟
ما كتير بحلم احلام بحس انا ما رح تتحقق ... كتير اوقات بحلم فيا وبعرف انو ما رح تتحقق هلق .. بس رح تتحقق بعدين .. مشان هيك بتكون بالنسبة الي بالفترة المرحلية حلم غير قابل انو ياحقق ... بس مع الايام رح يتحقق اكيد

شو هوي الشي اللي مستعد تشتغل فوق طاقتك لحتى تققو؟
قصدك حققو ما ؟

بشكل عام اي شغلة صغيري كانت او كبيري وبيكون بدي اعملة وما بقدر اعملة بامكاناتي العادية ... بصير وقتا بالفترة الاخيرة مستعد اعمل شغلات فوق طاقتي لحتى ققدر نفزة ... وخاصة بما يتعلق بالـ

عرفلي الحب بمفهومك الخاص
جاوبت عهالسؤال قبل بمرة .. وبعتقد اذا رح جاوب عسؤالك هلق .. رح يكون غير الجواب تبع هديك المرة ... مشان هيك رجاع بالمقلاي شوي بتلاقي

عرفلي الصداقة بمفهومك الخاص
اي هي اسا ما عرفتة .. رح حاول عرفة بكل بساطة ... الصديق هوي الشخص الي ما بيكون في داعي تعيطلو لما بتكون بحاجة الو .. لانو رح يكون لحالو واقف جنبك ... واذا شي مرة قلتلو بدك اي نوع من المساعدة .. بتلاقي دغري وافق ولا كانو كان في مجال تقول لاء ...
ايام الرفقة الحقيقة كانت كتير حلوي ... هلق الرفقة بتلاقي كل مين راح بمحل ... وصار رفقة جداد .. وللاسف الواحد بيضل يقارنة الرفقة الحالية برفقة ايام المراهقة والطيش .. مشان هيك بيصير كتير صعب يحس الواحد بانو اسا في رفقات حقيقين حوالي

انت عايش شي قصة حب ولا لاء؟
عايش واساتني عما عيش ... احلى شغلة ممكن تصير مع الانسان هي قصة حب ... وخاصة اذا قدر الواحد يكملة عالاخر ...

لو سكرو منتدى اخوية للابد شو بتعمل؟
ما بعرف اذا رح تكون الشغلة بهالبساطة ... بس بقلك هلق انو رح اترك شغلة المنتديات ... لاني حاليا مابفوت بالشبكة العنكبوتية غير على منتدى الاخوية ... واذا تسكر ... فرح شيل فكرة المنتديات من راصي ... لانو الواحد مستحيل يلاقي هيك منتدى عالنت ... ووقت الواحد بيتعود عالعز .. صعب يبعد عنو ..

اذا قالولك انو بكرا بدهون يسكروه مين الاعضاء اللي بتحاول قد مافيك انك تتعرف عليهون؟
ما حدي !.... انا ما بفوت عالاخوية مشان اتعرف على عالم جداد .. بفوت عالاخوية على انا منتدى .. وبس حس انو في شي حدي قريب عني بطريقة او باخرة او من الممكن اني اتفاهم معو ... فرح يصير التعارف قبل ما يتسكر الموقع .. ما والله رح يستكر الموقع وانا اسا بدي اتعرف عالاشخاص س و ع و ص و م و ك و ل و....
-شو رايك بالمثل ياللي بيقول (من خان لاجلك خانك)؟
حكي فاضي ... وقت حدي بيخون مشاني ... بيكون عمل هالشي لاني مميز بالنسبة الو .. ما لانو بيحب الخيانة .. وخيانة لالو وقت بصير فكر هيك

شو بتقول عن الحب عالنت؟
قلت من قبل .. اني ما بحس انو الحب عالنت هوي هالشي الفظيع .. لانو ببساطة النت هي متل التليفون عبارة عن طريقة تواصل ما اكتر ... يعني متل لما حدي بيسألك شو رأيك بالحب عن طريق التليفون؟؟؟

بتحس حالك بتشبه محمد سعد ؟
ما بعرف مين محمد سعيد ؟؟ في واحد كان معي بالمدرسة اسمو محمد سعيد ابراهيم, هادا هوي نفسو شي؟

شو رايك بالاعجاب(اعجاب مو حب) عالنت يعني تعجبك شخصيه معينه كتير كتير ولوين بيوصل؟
يلعن ديب هالنت هوي والمقلاي ... شي مليون سؤال عن النت والاعجاب والحب والجواز والخ ....

شو هوي الاالم ياللي فيه لذتك؟
ما بعرف ... في شغلة براصي .. بس ما بعرف اذا كانت بتكون الجواب لهالسؤال !

شو الغناي ياللي بتسمعا بينك وبين حالك غير(التنورة )وبالمره خبرنا مين لابسة التنورة؟
شو يعني غنية بسمعة بيني وبين حالي يعني غنية بخجل اسمعة ادام العالم
مين لابس تنورة ؟؟؟ احلى اختراع نعمل بالبشرية للبنت هوي التنورة ... والـ هي الي لابستة

ازا انصدمت من شخص معين انو عمل بحكي غير ياللي كان يحكيه شو بتكون ردة فعلك معو؟
عادية كتير كتير .. بتأثر شي لحظة .. وقت بسمعو اول مرة عما يحكي هيك .. بس بعدين بيصير عادي ... اسا ما بعرف لهلق ولا شخص من وقت ما خلق لوقت ما مات ما غير قناعاتو ولا مرة ... بغض النظر كيف الطريقة !
وينك أنت ؟ بالمانيا, قدي طولك ؟ 186 سم, قدي وزنك ؟ شي 70 كغ, قدي نمرة رجلك شي 44, شو نوع أو (( الستايل )) تبع الألبسة اللي بتلبسها؟ كتير عادي, بنطلون جينز وكنزة قطن!
لما واحد يسألك شو دينك ...شو رأيك بهالسؤال باعتبارو محبوب كتير عند الشعوب المتخلفة ؟
بقول اني ما كتير صحبة مع الاديان ... سؤال سطحي جدا
برأيك هالناس بهالمجتمع بيلبقلون الواحد يكون صريح و صادق وقلبو طيب معون ؟
اي .. مافي بولا محل و بولا مع اي شعب بيكون الكذب التخفي او الهروب هوي الشي الصح
برأيك هالمجتمع مجتمع حيوانات بالغابات ولا مجتمع بشر بهالعالم ؟
لأ مجتمع بشر! ما لو كانو حيوانات كانو اتفقو من زمان وما كان صار هالقد مشاكل بهالدني
أذا حطوك رئيس للجمهورية شو بتعمل ؟
جاوبت... بخلي الشعب ينتخب حكومة ديمقراطية
شو رأيك بالضغوط على سوريا ؟
ما بعرف.. ما كتير بفهم بالسياسة ... بيطلع بالاخبار عن المسؤلين انو نحنا ما بتفرق معنا هالضغوضات .. بس الشعب تبعنا منـ*** أملو .. ما بعرف كيف بيزبطو الشغلتين سوا .. بس هيك الي عما يصير
شو رأيك بأميركا ؟
امريكا بلد صناعية بحتة .. هلق بسب اقتصادة القوي عاملة شرطة العالم .. بس ما بعتقد انا مطولة كتير على هالحالة ... كتير بحب زور امريكا ( ما عيش فيا ) بس مشان شوف الحياة الي كل العالم حلمون يعشوا ؟؟؟ مع اني بشك انو رح تكون حياة حلوة
شو رأيك ببريطانيا ؟
والله ما بعرف يا باشا ... ما عندي اي فكرة جدية عن بريطانية !!
شو رأيك بفرنسا ؟
ما بعرف بفرنسا اكتر بريطانية .. بس بعتقد انو فرنسا اساتا عايشة بالقرون الماضي وقت كانت قوة عظمة .. ووقت كانت تقول للجبل زح من هون بيرزح غصب العنو ... بس للحقيقة هلق دولة اوروبية عادية جدا .. في عندا قوة عسكرية ما اشبة شي ... بس مع هيك لا بتقدم كتير ولا بتاخر .. وما شاطرة غير تعمل البابا الحباب للبنان وتتقاوة عسوريا
شواهتماماتك و شو تعلمت بالمانيا ؟
اهتماماتي التكلنوجية شوي .... وشوي كتير صغيري الرياضة ( بس بحب اسبح واركب عالبسكليت ( رفيقتي الوحيدة الي بتكون جنبي بكل الاوقات والي بتسايرني بس كون متدايق وبتتدرج معي بس كون مبسوط ) وبتابع القورملة 1 ) ..
تعلمت بالمانيا شو معنا الحياة ... بجوز اساتني بالمرحلة النظرية من التعلم ... بس بعتقد الواحد بس يكونو لحالو بالغربي بيخطو خطاة اكبر واسرع بكتير من الخطاة الي بيخطية واحد بنفس المواصفات عايش بسوريا مع اهلو, او وحدة من التنتين...

هل أنتي مهتمة باللي عم تدرسي ؟
انو فينك تقول هيك شي....
أنت بتفكر بعقلك ولا بعواطفك؟
كوكتيل بين التنين
شو بيقولولك رفقاتك واهلك بس ترجع ع سوريا بشي أجازة أو عطلة...شو بيسألوك يعني ..؟
كيفني؟؟؟ واذا كنت مبسوط هون ... واذا كنت عما انجح بموادي ... وكام سنة بقيان لخلص ... وعالم بتسأل اذا رح ضل هون بس خلص
شو رأيك بهالغربة اللي أنت فيها و شو شعورك ؟
الغربة كربة ... اوقات بتخلي الصخر يبكي .. واوقات بتخلي الواحد يقول الحمدالله اني هون....
عدد أقسام الصاروخ الباليستي و شرح عن ميزاته باختصار ؟
متل الصاروخ ابو العشر ورقات بس اكبر بشوي
سوريا لازم يكون عندها قنبلة ذرية ولا لأ ..وليش ؟
لاء.. حدي بيجيب الوجع لراصو ... وعكل الحوال القنبلة الذرية بتكون كانو واحد عايش بالرياض وفرحان بحالو انو عندو يخت حاطو بالكراج تحت الفيلا ( بالرياض ما بالبحر )
... سوريا لازم يكون عندها طاقة ذرية للأغراض السلمية ولا لأ.. وليش ؟
نفس الكا كا
شو رأيك بهالأمة العربية ال *** ؟
بت***
أذا الله حاكم ع أغلبية أمة العرب بالفشل و التخلف و التبعية ... حدا بيقدر يوقفو شي ؟
انو بعتقد صعب على الله يحكمنا بالفشل والتخلف والتبعية اكتر من هيك .. مشان هيك سؤالك غلط
كمان شو الحل مع هالتخلف ؟
هي هي ... مافي

تنشوف رأيك أذا انوضعت بهالمواقف

إذا أنتي بهالدنيي مو عامل شي لحدا (( يعني آدمي بعيد عنك )) بس هالناس كلها متسلطة عليك شو بتعمل ؟ و ليش بهالحالة الناس بتكون متسلطة عليك ؟
شو بعرفني؟؟؟ شو هالسؤال الغريب !! يضلو متسلطين عليي , شو يعني, واذا ؟

إذاأنتي واحد بتحب تعيش هالحياة متل ما بدك و كيف ما بدك و ع تفكيرك و ع حسب تجربتك الخاصة بدون ما تآذي حدا... و في شي مليون بني آدم حابين يغيروك أو يتحكموا فيك و أولهون أهلك ... شو بتعمل ؟ وشو موقفك ؟
بعيش الحياة متل ما بدي ... بشرح لاهلي ( و لاهلي وبس ) الشي الي بدي اعملو وليش بدي اعملو .. اذا قبلو منيح واذا ما قبلو فرح تكون مشكلتون ( مع اني بشك انو اهلي ما يقبلو شغلة انا رح اعملة الا اذا كان في اسباب مقنعة )

أذاأجا واحد عمل معك فصل بايخ متل وشو و أجاك شي مليون واسطة تتسامحو ... ومنكتر الضغط سامحتو بس مو من قلبك بالكلام... لأنو ما اعترف بغلطو... و هويحس بهالشي و مصر تكون المسامحة من قلبك ... شو بتعمل؟
انو بضلني مسكت العالم عاساس مسامحو ... طالمة انا وهوي عرفانين انو القلوب مانا صافي ... فخلص ما كتير بيفرق وضع البقية

أذاواحد أو وحدة كبيرة بنظرك و بتعزها و غالية عندك ...غلطت معك أول مرة وسامحتها و التانية وسامحتها أو حتى ما أهتميت طنشت وكبتت القصة بقلبكوكذلك الغلطة التالتة و كلها أخطاء حقيرة بتخليها تنزل من عينك ... بتنسى و بتغير نظرتك ألها و تعاملك معها ؟ ولا بتنفجر بوشها و بتسفقها بهدلة ماتنساها بحياتها وبتقلعها ؟
ما بتزكر اني بهدلت حدي على طريقة معاملتو معو ... حتى لو تغيرت بساعة وحدة 180 درجة ... بجوز اتفجأ .... بس ما بعيط وبس ليش هيك صار

شو شعورك وأنت تحت الضغط بال Pressure Machine تبعي ؟
ما بعرف عادي .. بجوز حاسس بشوي نعس ما اكتر

وقت بتكون معصب شو بتعمل لحتى تروق
وقت ما بيكون في حدي احكي معو .. باخد شوطة عالبسكليت .... وبضلني عما بعد عن البيت طول ما انا متدايق ... وبس حس حالي روقت ... بلف وبرجع ... وبس وصل عالبيت بيكون كانو ما صار شي ... وبالسباحة كمان نفس الشي .. بضلني عما اسبح لحتى انسى الشي الي مدايقني .. بعد ما كون فكرت في كتير ... وبعدا بصير فكر بشغلات عادية كتير

لمين بتسمع اكتر شي من المطربين
حاليا زياد ولينا .. لانو التنين حاطون عال ام بي 3 وعما ضلني عما اتسمع عليون كل الوقت
شو الفيلم المفضل عندك
حسب المزاج .... بس بشكل عام في عندك 21 غرام بحسو كتير حلو ... مامينتو ... وفي عندك القصص تبعيت سو saw بس كتير بكره الافلام الي فيون وحشية ... مشان هيك بسو الشغلة عالحد تماما ... وبحب كيل بيل كمان
شو شعورك هلأ بهاللحظة
والله شعور عادي جدا ... مع القليل من النعس المفرط

مشان هيك رح قوم نام انا هلق .. وبكرا بيعيني الله عالباقي ..

اخر مرة اخواتي بكلكون ... اذا حدي عندو شي سؤال شخصي ... ما يعني شخصي شخصي ... بس انو سؤال طلع ببالو الي شخصي ... فيسأل من هلق لبكرا الضهريات... اذا شي حدي بدو ينسخلي شي اسألة من شي محل فبلاهون .. لانو عاساس عما فكر بكرا خلص من المقلاي وشوف مين رح زت محلي

صحي خيو هاني ..شو مشان في كتير اسألة مدري كيف ... غير انو مافي تنيسق بنوب للنص يا شيخ.. والله حرام عليك هيك الي عما ينقلة يضل ساعة عما يزبط بهالنصوص

بس مع هيك في اسألة ماشي الحالة ...
ميرسي خيو .. انشالله كون جاوبت صح

سلامات خيو

وسلامات للجميع