[abosleman]

تحياتي للجميع قبل البدء
أصدقائي خلينا نحكي شوي هيك حكي بعيد عن الشعارات وبعيد عن اللغة الأكاديمية في السياسة
خلونا نحكي هيك كشوية شباب سكرانين او خلينا نقول بأول السهرة وعم يحكوا يعني بعيدا عن المنابر

اي والله هات لنشوف صبلنا كاسة عرق

يعني بصراحة انتوا شايفين انو بمجتمعنا في مشكلة سياسية كتير ضخمة صح وانا معكن وانا معكن كتير في عندك ضغوطات خارجية كتير ضخمة وفي مشكلة عويصة اليوم بالبلد من ناحية الفعل السياسي واهم شي الأحزاب السورية بشقيها معارض وجبهوي

لحد هون كلام لا خلاف عليه

هيدول الجماعة عندهن مشكلة كتير ضخمة في تعزيز الثقة بينهم وبين الشباب السوري ولحتى نكون اكتر وضوحا خلينا نقول الجماعة عندهن مشكلة ضخمة بألية الخطاب المهترئ تبعهن اللي عم يخاطب جيل السبعينيات اللي صار فينا نقول ايقنا إنو كان أكثر ثقافة من جيلنا .

لحظة بس... هون في نظرية بالعكس انو الشغلة بلشت من خطاب جيل السبعينيات اللي توجه للشباب السوري بدون مراعاة احتياجات الجيل الثقافية يعني كانت متل افكار جامدة دفعت الشباب للهرب منها وهاد سبب رئيسي بالدرجة الثقافية للجيل البعض اتقوقع وصارعبارة عن آلة تبريد لحفظ الخطاب السبعيني والبعض وهدول نسبة لا يستهان فك هالخطاب المجمد وإضافو عليه افكار وقيم بتختلف مع افكار جيل السبعينيات وهاد الشي اللي ماسمح لجيل الشباب السوري المثقف من الظهور امام جيل السبعينات واللي ظهروا ماعاد ظهروا او تجمدا من جديد

يا سيدي الجماعة قاعدين عم يحكوا باللغة الأكاديمية السياسية تبعتهن وقاعدين عم يحكوا سياسة بينما صدقوني الشباب السوري بس تلحق وتقلوا نشاط سياسي بيحمل شنطة المدرسة وبيركض او حتى شنطة الجامعة يعني خلص كلمة فعل سياسي نشاط سياسي بناء حر هيدي الكلمات كلها صار مصادر خوف وقلق وازعاج للشباب السوري

هلئ هون متل ما قلت من شوي بس بدي ضيفسؤال كونك حكيت عن طلاب المدارس والجامعات شو هو النشاط السياسي الموجود او المطروح من قبل جيل السبعينيات للشباب ؟؟؟؟
اتأكد انو هالنشاط اللي عم يواكبوه ماعم يواكبوه منشان الثقافة واللي ماعم يواكبه هنن الجيل المثقف

بينما بالجهة التانية في شغلات لسا بتعجبوا للشب السوري اللي الله ما بيقدر يفهموا بس في شغلات لسا بتعجبوا واللي هي الثقافة معليش يمكن ينطوا الشباب يقولولي لأ ما هيك بس هيدا الواقع وخلينا نجتزأ من الثقافة جزء ونضخمه جدا واللي هو الثقافة الموسيقية ونتاجها من الموسيقى الحقيقية " مارسيل خليفة - الرحابنة بكل ما انتجوا - فيروز - جوليا وهيدا الفن اللي فينا نقول هو موسيقا النخبة الثقافية "

ما بعرف انا هون ما فهمت شو بتقصد بالضبط .... انو الشباب السوري المثقف سياسيا هو اللي بيسمع هالنخبة الموسيقية ولا الشباب المثقف موسيقيا هو اللي بيسمعن !!؟؟انا بفترض انو اي انسان طبيعي بغض النظر عن ثقافتو رح يسمع هالنخبة الثقافية متل ما قلت

هلأ ليش هيدي الأحزاب المهرتكة ما بتبدأ من هيدي النقطة لحتى تغير الشباب يا اخي بيضل الواحد يأدمن على السياسة احسن بكتير من الفراغ اللي ممكن ينتج أدمان على شغلات اللي ما بحبها ... فهمتوني
طيب ليش هيدي الاحزاب بدل ما بمؤتمراتها وندواتها سواء منها اللي بالمركز الثقافي أو اللي بشي بيت مهرهر بشي ضيعة بعيد عن عيون الأجهزة الأمنية ليش ما بتكون هيدي النشاطات ثقافية فنية أدبية وهيك بتقدر تجذب اكبر عدد ممكن من الشباب لحتى يصيروا اكثر اطلاعا والإطلاع كل ما كتر كل ما وسع مدارك وعلى الأقل بيصير في حراك بشكل من الأشكال بالبلد بدل هالفراغ اللي صاير ...
ولا شو رأيكن انتوا ؟

يا اخي هالكاس دوخني ماعاد عم اعرف مين بتقصد بالاحزاب المهرتكة ؟؟ فيا ياريت تبقى توضحلي هالفكرة مع ما سبق ذكره لعل وعسى افهم واتعلم ...مع اني بشوف انو اللي بدو يوسع ثقافتو مانو بحاجة لحدا يوجهو وممكن اي مجموعه من الشباب تعمل نشاط ثقافي وفني ولو كان بدائرة صغيرة

تحياتي الحارة
ظل جيفارا

وتحياتي إلك ظل جيفارا
وبتمنى اني كون عم استوعب عليك شو قاصد بالموضوع لاني حسيت حالي دخت وطلعت لبرا كتير