[مالي خايف]

مسا الخير جميعا شباب وصبايا اختيارية وولاد

الحقيقة أنا ماقريت كلشي تعليقات عالموضوع لأنهون كتار

بس من بداياتو لقيت انو كتير من الشباب والصبايا اخدين فكرة عن هالجماعة من المسلسل بس
أنا بدي احكيلكون عنهون باعتباري عايش بيناتهن يعني الجو المحيط فيني من هالجماعة هدول

الجماعة هي لاهي عاملة مذهب لحالها ولا هيي عاملة دين لحالها ولا مألهة الآنسة بإختصار شديد

هالمجموعة هي ظهرت كنوع من إعطاء الدروس للنسوان بحكم انو مافي من هالحكي للنسوان هالحكي بس موجود للرجال
كبدايات كانت الآنسة منيرة من جماعة كفتارو يعني تلامذتو وبعدين فكرت انو يصير في دروس للنساء على غرار
الدروس الموجودة للرجال.
هلأ طبيعة الأمور الدينية المدرسة فيها أو النظام الي ماشيين عليه هالجماعة هي ومن خلال الكتب يلي بشوفها
بين الأيادي هي أغلبها كتب للشيخ البوطي إذا مو كلها يعني كل ما يدرس يدرس من كتب الشيخ البوطي
هلأ نقطة تانية تعليقا على موضوع انو الحيط مذكر فهاد الشي حرام للمرة والمخدة مؤنث فالرجال مابيصير ينام على مخدة فهاد الشي غلط مليون بالمية ومافي إلو اساس من الصحة

هلأ في ناس كتير استغلت هالموضوع هاد لأغراض شخصية ويعني اي جماعة من عشر أشخاص بيطلع فيهون واحد عاطل بيهلك الجماعة كلها
وصندوق التفاح الي في تفاحة معاينة مابنشتريه لأنو خلص شفنا وحدة منزوعة فسقطو من عينا كلهون ونفس المثال بالنسبة لصحن البيض الي في بيضة مكسورة الخ الخ الخ من أمثلة الفواكه والخضراوات

هلأ حابب أعطيكون فكرة عن تنظيمهم يمكن تساعدكون بفهمون أكتر

خلينا ناخد جامع من جوامع الشام والي بيكون في مجموعة آنسات ومجموعة سيدات هلأ كل جامع لنفرض في عشرين حريمة طلاب بيكون الهون أربع حريمات معلمات

هالأربع حريمات هدول بيكون الهون حريمة مسؤولة عنون والي هيي نفسها بتعطيهون دروس يعني طلابها

هالمسؤولة عنهون كمان طالبة بحلقة تانية والها معلمة عندها فقه بالدين أكتر بتعلمهون وهيك خليك عم تقيسها لتوصل للآنسة منيرة

وبحب آخر شي وضح نقطة جدا مهمة انو مو كل الحريمات الطالبات محجبين في كتير منهون سبور يعني بيطلعوا ببدي وبنطلون وأحيانا بيلبسوا بنتكور هي تعقيبا بس على سامر الي قال انهون بيقولوا عن الي مو محجبة فاسقة
وكمان بالنسبة لتجربتي الخاصة بما اني عايش بينهم فبحب الكون انو حياتنا طبيعية جدا جدا وآخر رواق ومافي أي تعقيدات فيها

وبالمناسبة أوبس فيكي تقليلي أي وحدة من يلي بالصورة الي حاطيتيها قبيسية

وأي تعليق عاللي كاتبو أو استفسار أو نقض فأنا جاهز وبإنتظاركون

وعلى راسي الجميع دون استئناء

مساكون سعيد