اقتباس:
كاتب النص الأصلي : sweetbaby
لك حبيبتي...وحدة حتكون مريضة نفسيا كيف حتقدر تربي ولادها تربية سليمة؟؟
بعدين من مين بدها تنذل؟؟ من امها وابوها واخواتها؟؟
|
عفوا
!
مريضه نفسيا ً ؟؟ .. أنا اعترض على اعتبار المغتصبه مريضه نفسيا ً تحت اي ظرف من الظروف .. و بعتقد هيك انت ناقدتي نفسك وقت قلتي انو في مليون واحد بياخدها و انها مريضه نفسيا .. لأنو ما بتخيل في مليون واحد رح يرضو يتزوجو وحده مريضه نفسيا .. المغتصبه ممكن تكون محطمه نفسيا ً لكنها مش مريضه نفسيا ؟؟
و المغتصبه برأي عندها قدره تربي ولادها .. يعني ما بشوف انو موضوع تربايه الولاد مشكله كبيره بحياه المغتصبه .. لأنو وقت بتكون وصلت لأنها تختار تأنجب بتكون قطعت شوط كبير ..
و بتنزل من قبل امها و ابوها و اخواتها اي نعم احتمال وارد جدّا بمجتمعنا الغير افلاطوني .. اضافه لأنو بتنزل من السمان اب صبحي و جارتهم ام سعيد و بياع الغاز ابو عبدو و مصلح البسكليتات (( وينك يا غوسي
)) و و و .. المجتمع بدو دف ليرقص عكتاف النساء خاصه .. و خليني قول و اكد اني مش مع تزويج المغتصبه من المغتصب ..
يعني حكي كلو ما بيعني اني انا مع او ضد بالمطلق .. أنا مع النظر بكل حاله لانو كل حاله رح بتختلف عن التانيه و في اوقات ممكن الزواج يكون حل مناسب بالنسبه للطرفين و في اوقات ممكن يكون السجن هو الحل و اوقات تانيه بتختلف فيها الحلول .. أنا ما بشوف في شي مطلق بالأحوال الشخصيه حيث انو لكل حاله وضعها الخاص اللي لازم يـُراعى .. لكني ضد ضد ضد ضد ضد اي شي بصير بعدم موافقه الفتاه أولا ثم الشريك - او اللي رح يصير شريك - و ضد ايجاد حلول مؤقته كي يتم لفلفه الموضوع او غيره ..
في كاتبه أميركيه - نسيانه شو اسمها - تم اغتصابها وقت كانت مراهقه و كتبت تلات كتب - على ما اذكر - عن الموضوع بعدها .. هنن مش حلوين و أنا شخصيا ما حبيتهم و لكنهم بيحكو عن الاغتصاب و المجتمع .. للي مهتم بالموضوع واحد منهم هو The lovely bones بهالكتاب الفتاه بتغتصب من قبل استاذ عندها بالمدرسه و بيقتلها بعدين و كيف اهلها بيتلقو الخبر و بدورو عالقاتل و كيف بأثر هالشي عالعيله و هيك .. و الراوي بالقصه هو الفتاه نفسها