[Abu ToNi]

الحكي كان كتير حلو على انه العلمانية ما بتتعارض مع الدين مع بقية الحكي
انا عندي رأي تاني ممكن شوي نحكي فيه
العلمانية ما بتتعارض مع الدين هاد الحكي صحيح
العلمانية تتعارض مع الاسلام كمان هاد الحكي صحيح

قبل ما حدا ينطلي على كيف زبطوا معي جاييكم بالحديث بس طولوا بالكم علي

المشكلة ، او خلينا ما نسميها المشكلة خلينا نسميها الحلقة الناقصة
الحلقة الناقصة هية انه الاسلام ليس مجرد دين ، الاسلام الحالي اللي بين ايدينا مقدّم على اساس دين ودولة بآن واحد
التعاليم الاسلامية منقدر نقسمها لمجموعتين رئيسيتين الاولى متعلقة بالاسلام الديني والاسلام السياسي او بمعنى آخر الاجتماعي
ومشان اللي ما عبيفهم شو الفرق بجيب مثال صغير ، وقت الاسلام بيحكيلك على كيفية ارضاء الله ، وقت بيحكيلك على الصلاة ، وقت بيحكيلك على الزكاة .. هاد الوجه الديني للاسلام
وقت بيحكيلك على الإرث والورثة ، وقت بيحكيلك على الزواج ، وقت بيحكيلك على تقويم تصرف المرأة الناشز ، هاد هوي الوجه الاجتماعي للاسلام ،،
هلق وين النقص او الفراغ اللي عنا ،
الدين ثابت ولا يتغير كون الله ثابت ولا يتغير ،، هي فكرة ظريفة كتير وحلوة وانا شخصيا كتير بتعجبني يعني الله بكون سعيد وراضي وقت الانسان بيهتم بأخوه الانسان ماديا ، بكون راضي وقت الانسان بيتواصل معه عن طريق الصلاة ، بكون سعيد اذا صار هاد الشي اليوم او امبارحة او بكرا او في ايا زمان كان .
كل الاشياء المدرجة تحت الدين تعتبر ثوابت وممكن بشكل او بآخر نأدرجها تحت العلاقة الشخصية مع الله وما بتخيل في عنا مشاكل فيها داخل تنظيم الدولة والتاثير عليها ، وانا من الاشخاص اللي بالاخوية ما بحب كتير اتطرقلها جوات الاخوية من باب عدم المساس بالعقائد لا اكتر ولا اقل .
اما الاشياء الاجتماعية فهية اشياء متغيرة باستمرا غلط اننا نثبتها ، لأن المجتمعات عبتطور وغلط اننا ما نطور مفاهيمنا ، وإلا لصرنا خلف بقية المجتمعات وهاد اللي صاير مع الدول الاسلامية ، كونها متعلقة بالحدود الاجتماعية اللي مفروضة او مقدمة لانسان عاش قبل اكتر من 1400 سنة
انا متأكد بان متطلبات الانسان تبع 1400 سنة وافكاره جدا مختلفة عن متطلباتي وعن احتياجاتي وبالتالي غلط اني آخد مرجعيتي من مصدر ما بيقدر يفيديني او من مصدر ما بيتماشى مع عصري
وكون متبع الاسلام (( بشكله الحالي )) لا يطلق عليه اسم (( مسلم ملتزم )) الا اذا كان عبطبق جميع التعاليم الدينية والاجتماعية وايا انقاص بالامور الدينية او الاجتماعية يعتبر خارج عن الخطوط وغير ملتزم بالحدود اللي الله وضعلنا ياها .
فالمسلم الملتزم بالتعاليم الاسلامية الحالية (( الاجتماعية والدينية على حد سواء )) لا يمكن بشكل من الاشكال ان يدعى علماني فجواب سؤالك هوي ، كلا لا يمكن ان يحدث ذلك .

وعذرا على الاطالة

كلمة هاموشية موجهة لله لا لأحد غيره :
خيو كنت بدي ابعتلك رسالة بموضوعك اللي نزلتلك ياه مرسيل (( رحم الله روحها الالكترونية )) بس استقصرت الطريق من هون وقلت لحالي انا هون وهون وانت موجود هون وهنيك فليش حتى اروح لهنيك طالما انت هون !؟
خيو بالمختصر المفيد انت روح وبتفهم بالروحانيات ، وانا انسان وبفهم بالانسانيات وعلى مبدا المتل اللي يمكن مانك سمعان فيه (( عطي خبزك للخباز ولو اكل نصه )) عيفلنا الامور الاجتماعية للدولة وللافراد نشتغل فيها متل ما عفنالك الامور الروحية لحتى انت تشتغل فيها .
جازاك سعدو كل خير . وفي مكان تاني (( هابي بيرزداي )) وفي مكان تالت : امتى بدك توفي بوعدك وتبعتلنا المسيا ؟! وفي مكان رابع ، بلتقى فيك باليوغا بعد شوي ، وفي مكان خامس ... المهم شوف الجملة اللي بتعنيك وفصل منها توب على قياسك