اقتباس:
كاتب النص الأصلي : phoenixbird
هلا جزء من اللي اتقال صح وجزء تاني غلط
مومعقول انو العنصر الامني هوي اللي ورا عدم تقدم الجامعات في عدة اسباب اهمها انو بالاساس الدولة مو
عاطيتا الاهتمام الواضح والمظبوط يعني تجهيزاتون مبهدلة وكتبون من العصر الحجري والمخابر فايتة بستمية حيط
عدا عن فساد عدد من استاذة الجامعات مو كلون
لهالسبب الاساتذة عم تتسابق مين بيدرس بالجامعات الخاصة
بالنسبة لموضوع الامن فمعروف انو كل الجامعات وعم بحكي بسوريا مليانة امن من طلاب واستاذة واداريين بس كمان تدخلاتون خفت شوي يعني موضة شحط الطلاب قدام الدكاترة بالمحاضرة انتهت
وتحركشون بالبشر خف كتير
هلا موضوع السياسة الحقيقة صار في جدل كبير حول القصة بجامعتي مثلا ياما ناقشنا وحكينا سياسة مع اساتذة الجامعة طبعا بالكلية ما بنحكي كتير سياسة لانو بالاساس الدكاترة بتقول هاد مكان علمي مو سياسي
بس باقي الكليات بنحكي معون وبالجامعة عموما تناقشت امور سياسية كتيرة
بس بجامعة دمشق والجامعات الحكومية في كتير سيطرة على هالموضوع انو ولا حركة ولا مناقشة ولا اعتصام ولا شي بنوب الا عن طريق الهيئة الطلابية اللي سعدو اعلم كيف بتوصل والعلة انو غالبا ىما بتعمل شي
|
اول شي صديقي خلينا نناقش قضية تخلف الجامعات , انا ما بظن السبب بتخلف الجامعات عنا هو بس النقص بالموارد هي دول الخليج عندن بجامعاتن معدات مو موجودة ببعض جامعات اوربا وشو النتيجة؟ متخلفين اكتر منا بكتير.
اذا لاحظت انو باول المقال الكاتب قال انو بتصنيف الجامعات بالعالم الجامعات العربية ما الها ولا حتى تصنيف وهالشي صحيح ب 2007 عملوا مؤتمر عالمي ب شنغهاي بالصين وعملوا تصنيف لجامعات العالم على اساس اسهام كل جامعة بالبحث العلمي بتلاقي جامعات اسرائيلية,تركية ,سنغافورية بس ولا جامعة عربية
وهي الرابط
http://en.wikipedia.org/wiki/Academi...d_Universities
والسبب برايي انو البحث العلمي بيتطلب حرية لانو بدون حرية ما في ابداع ومنين بدك تجيب الحرية للجامعة اذا المخابرات هي صاحبة الكلمة الاولى والاخيرة في كل شي بسوريا واذا التعيين بالمناصب بتم على اساس الولاء وليس على اساس الخبرة والمؤهلات
على زمن عبد الرؤوف الكسم(ليتو يضرب بهالكسم) قرروا يبعتوا حوالي شي خمسة الاف خريج جامعي ليعملوا دكتوراة بدول اوربا الشرقية وهدول غربلون على اساس الولاء لنظام الحكم واللي كان ومازل يحدد هالولاء هو الامن, وهدول لما راحوا ورجعوا سببو كارثة للجامعات السورية وخاصة جامعتي تشرين والبعث اللي كانو لسا جدد بوقتها وخاصة بمجالات الهندسة لانو متل ما بتعرف الشهادات بدول اوربا الشرقية لساتها لهلق من دون اي مصداقية حقيقية وهدول هلق صار معظمن رؤوساء اقسام وعلى اساس عم يمشوا الجامعات
هلق الاخ عمرو كمان حكى فوق عن قصة الحكي بالسياسة بالجامعة , يعني الحكي هون عم يتم على اساس الخطوط المرسومة للشعب كلو من قبل المخابرات رح اعطيك كم مثال من دون ما نطلع كتير عن الموضوع
, بدك تحكي على الحكومة ورئيسها العطري لك احكي طز ,اصلا هو العطري كلو على بعضو موظف بينفذ اوامر وبس وما بيسوى شي
بدك تحكي على الفساد معلش بس ما كتير ترفع راسك ممكن تحكي مثلا على وزير سرق او شرطي ارتشى او مدير عام نهب معلش اما تسال مثلا مين اللي لهف اموال النفط السوري من 1988 ولسنة 2001 _(اول مرة بيدخل النفط لموازنة الدولة كان 2001 رغم انو انتاجو بسوريا مبلش ب التمانينات)
بدك تحكي على خدام معلش العن ابوه كل يوم بس مسموح تسال ليش سكتوا علي كل هالوقت ياويلك ساعتها بيتهموك باضعاف الشعور القومي
بدك تحكي عن الاخطاء والجرائم اللي عم تصير متل ما عمل الاخ عمرو معلش خود راحتك حبيبي بس اوعى يخطرلك انو القائد الخالد الو اي علاقة بخراب البصرة هو او اي عضو بالعائلة الحاكمة , هدول الهه اللي بيقرب علين بصير في متل ما صار بشباب اخوية
واللي بدي قولو يعني انو هي مو حرية ولا اسمها ممارسة حق في التعبير لما بحقلي انا الجامعي احكي بس اللي بيسمحلي فيه ضابط مخابرات حمار داخل كلية حربية بالواسطة وبشهادة صف تاسع
الجامعات متلها متل كل قطاعات هالبلد تعرضت لتخريب متعمد من قبل النظام بهدف خدمة هدف واحد هو بقاء النظام وتوريثو الى الابد