[عمرو الحسيني]

والله الحقيقة ما بعرف شو بدي قلك

أكيد في ممارسات غلط واعتقالات صارت داخل الحرم الجامعي وناس محبوسين حتى الآن
بس الحقيقة أنت عرضت الموضوع أو كاتب المقال على الأقل كاتب الموضوع بشكل مليء بالسلبية والإحباط

أمن الجامعة أمر ضروري جداً لأنو لما يكون عندك نسيج متعدد الأطياف والأعراق والأديان بالجامعة فيهون المنيح وفيهون العاطل وفيهون ناس جاية تخرب وتسرق
حصلت حوادث إذا بتذكر لشباب كانت ترمي مية النار على الصبايا بسبب وبغير سبب

بكلية الزراعة مثلاً في حرامية سرقوا الخزنة المالية من قلب الكلية وفيها رواتب الموظفين

في مرة لقطوا ناس كانت عم تزرع قنابل بكلية الآداب

في مرة لقطوا خلية بنات كانت عم تنشر الإيدز حوال 6 أو 7 صبايا وطلعوا مجندين بالموساد

بالنهاية بحب أكد على شغلة كتير مهمة أنو الجامعة ليست مكان سياسي تسيطر عليه جهة أو حزب أو ميليشيا الجامعة مكان لكل أطياف الشعب وينبغي منع نشاطات سياسية فيه لأنه مكان للدراسة والتحصيل العلمي وليس مكان للإضرابات والخلافات السياسية وتعطيل التقويم الجامعي لصالح جهات

أنا شخصياً وقفت في مؤتمر طلابي وكان يحضره أعضاء من الحزب وكل دكاترة الجامعة وشهيناز فركوش نفسها كانت حاضرة ألقيت خطاب وكان عبد الحليم خدام قد رمي بالخيانة وهرب إلى فرنسا وانتقدت الوضع القائم وحكيت بكتير مواضيع انتقدت فيها كتير من الأشياء والأخطاء

مع العلم أنو مالي حزبي ومالي مخابرات والحقيقة واجهت مشكلة إنو في ناس خافت مني واعتبرت هيك كلام مو طبيعي ينحكى
يعني حكيت بالمشرمحي أنو كل قضايا الفساد يلي انلقطت على خدام بعد ما هرب وصار خائن ما عرفتو تلقطوها وتحاسبوه عليها لما كان نائب للرئيس هلأ لما صار خائن طلعتوا دفاتركون القديمة وصرتوا تنكشوا

وقلت كمان أنو في كتير فاسدين لازالوا في مناصبهم حتى الآن وطالبت سيادة الرئيس المفدى بشار الأسد بمحاسبتهم وتنفيذ ما جاء في خطاب القسم
طبعاً لما بدك تحكي بدك تعرف تجرح وتداوي وتمدح تارة وتقدح تارة ، في أسلوب للكلام وللمعارضة البناءة لازم تستعمل لتوصل كلامك

أنا بعرف أنو في أخطاء كتير وفي مشاكل كتير يمكن بتصير بجامعاتنا وكانت عم تصير من زمان بشكل مقرف للغاية لكن الوضع اختلف حالياً كتير ومن الظلم أنك تعتبر أنو الوضع على حالو ما تغير

وفي أمثلة كتير لنشاطات قاموا بها الطلاب بإذن من عميد الكلية أو بدون إذن بس المجال لا يتسع