الاربعاء 3/6/2009
بق بق .. بق بق .. بق بق.. 
هاد ماي قلب عم يدق من الرعبة ... 
انو يا سيدي من الساعة 12 بالليل للساعة 6 الصبح في التاريخ المحدد اعلاه ما كنت نام وعلى سف قهوة وحشيش 
انو ادرس وادرس و ادرس .. وعلى اساس فهمان.. الشي يلي بيعلق بيعلق ويلي ما بيعلق انشالله عمرو 
عيرنا الموبايل عالساعة 7 منشان نفيق ... 
فقنا الساعة سبعة ع صوت الاماما وغنية "بصراحة " شيت زياد .. شنو كنا عم نسهر عليه 
المهم هيك فقت وع الشريع لبست هالبنطلون بايد ومسكت سندويشة المسبحة واكلت بندورية بايد تانية 
طباً الصبح بلا التهاج وخوف ما بيمشي حالو .. قعدت سنة دور عالبطاقة وسنة دور عالقلام ...
اسرعنا بالخروج .. بعد ما اخدنا رضا الوالدة 
وبعد ما حوطتني بالكبجاية وبالايات والادعية
يا سيدي بعد هالمقدمة الدراسية الطويلة العريضة .. طلعت من البيت والخوف والتلبك والقلق والتوتر والفوبيا يمل قلبي 
مع انو كان معي وقت اوصل للمركز شيت الامتحان مشي .. بس مدري ليش اول ما شفت سيارة صفرا اسرعت بالركوب فيها .. وما ادراك ما السيارة الصفرا ... (حسيت حالي متل مرسيل باترفلاي ) .. طلع ع العدّاد 9 ليرات .. أخد 25  
المهم وبلا طول سيرة انتقعنا برا المدرسة شي ربع ساعة .. قدام المزابل 
بعدين فتنا وشفنا الوجوه يلي بتقطع الرزق وبلشوا يقولوا التعليمات السخيفة كـ العادة 
طلعنا عالقاة وقعدنا ندور .. قول انا ما دورت كتير دغري لقيت صفي ومطرحي .. بس المشكلة انو يلي ويلي قدامي كسلانين اكتر مني وقعود واحد ينعرك من قدام والتاني من ورا منشان تنقلو .. بس انا حقير ما بعملها 
اجا المراقب بوجه بشوش .. اوجت المراقبة بوجه ابشش 
الله لا يورجيكن .. البيديكور الاحمر الفاقع.. والشحاطة الصفرا والشعرات المنكوشين .. والعلكة يلي بتصرع المخ
انو اشتهيت شوف مراقبة ما بتعلك مسكة ! 
الله وكيلكن ضليت بين ما وزعوا الوراق ايدي على قلبي وعم قول .. هلأ بموت وشوي بموت ... بس ما متت
بعد ما اجو هالاسئلة .. حسيت براحة .. شوي .. بس بعد ما قريت الاسئلة عقلي طار 
ضليت شي ربع صاعة مسكر ادنيي ومغمض عيوني بعدين رجع عقلي وجاب معو المعلومات وفاتوا عالجمجمة وبلشت اتزكر كل شي 
يحرق اخت الفلسفة .. اليوم تفلسفت ليوم الفلسفة ... لك الله وكيلكن صرت امرّ من مؤلفين الكتاب باللعي الفاضي والتفزلك
يعني الحمد لله قدمت بشكل جيد .. جاوبت على كل الاسئلة .. شي فلسفة .. شي صح .. شي تخبيص وفزلكة
ما صدقت ايمتا صار نص الوقت .. قعدت ربع ساعة بعدين سلمت بعد ما تنعور بدني من يلي ورايي .. يبعتلو قتلي ما اغلظو 
مرقنا هيك ع الاصحاب وصحاب المحلات يلي بعرفهن وبلشنا نطمن البشر .. بعدين رجعت عالبيت فارط وبس بدي نام ..
شفت شي 12 ميسد كول .. شي من اهلي وشي من لمّة .. يسلملي ربها هالبيت شو بحبها 
رنيتلها كـ العادة  وهيي دقت واتطمنت 
ومن ثم قدحناها نومة للـ 6.30 المسا .. فقت تزهرمت وسمعنا فيروزيات المسا ..
وهي جيتي عالكافي نت لنسلم ونتطمن عالبشر ونكتب هي اليوميات
اقول قولي هازا .. وادعو سعدو .. ان لا يتعطل السيرفر وانا افقش على (ارسال الرد)
نراكم في الحلقة القادمة 
وغداً نلتقي 
الكلُّ سفّاح و ابنُ سفّـاح
.
القومُ أبناء القومِ يا صــاح
.
عندهم الدّينُ زهقُ أرواح
.
والذّبحُ للنّاس نهجُ إصْلاح
|