وها انا بينكم من جديد بوجه اخر وايهاب اخر
اول شي صباح الخير ليلي توقيتو الصبح ومسا الخير ليلي توقيتو المسا
طبعا بعد غياب اكتر من و4 شهور عن اخوية وكان هالغياب(طوعي ) وبعد سلسة من الالحاح وممارسة الضغط عليي قررت اكتب بهالموضوع الكبير والجريئ , طبعا هلئ بس الاعضاء يشوفو اسمي ومشاركتي اكيد رح تنقسم الأراء شي بقول الله لا كان جاب الغلا انت شو جابك العمى هادا فلاش باك لسانو متل الشفرة وقسم رح ينبسط ويقول الحمد على السلامة وبعد زمان وقسم مارح يكون في عندو اي رأي بحكم انو مابيعرفني .
المهم منجي عى الموضوع يلي من خلالو كتب هالمشاركة وبتمنى من الكل ياخدا براحبة صدر
السؤال الاول يلي بجي على بالي هلئ وعلى بال قسم من الاعضاء انو ليش هالموضوع هون انو ليش انكتب ؟
والجواب هو خلونا نرجع سنة وشوي لورا ونشوووووووف هالموضوع
http://www.akhawia.net/showthread.ph...517#post581517
لأنو بداية هادا الموضوع مرتبطة هنيك بهداك الموضوع وهو انو شو سبب اختيار (المشرفين ) يلي كانو منسقين على ايامي , طبعا صار جدال طويل وعريض وصار عي وصار جئ ولوص بالحكي بس ماعرفنا ليش
بوقتا على ما اظن يا اما بترفلاي يا اما ذا لايت قالولي باحد الردود انو اخي انتو ليش عم تحكمو علينا ولسا ما بلشنا شوفو شغلنا بعدين حكمو (بهالمعنى كان الحوار ) , اما اليوم فبظن صار الحكم معروف
بالنسبة الي انا مارح صوت لسبب جوهري وهو انا كنت بعيد عن المنتدى ومابعرف شو صار وشو ماصار
بس هالمرة رح سمي الامور بمسمياتها من باب آخر وهو مين يلي مابيستحق يكون منسق بوقتا وصار هلئ مشرف
طبعا الحكي رح يدايق اصحاب العلاقة واصدقائهم والاسماء يلي بدي حطا مالي اي مشاكل معن ابدا لامن قريب ولا من بعيد ولكن هي (من منظور شخصي ) بناء على وجودي بتلك الفترة
1-ريمي
2- مريومة
3- جي ام سي
4- سويت بيبي
اعزائي اعذروني على الصراحة يلي ممكن تكون زعجتكن بس انا ما بكن غير المودة الكن بس في ناس اجدر بهيك شغلة غيركن
وفي قائمة تانية وهي بتضمن اسمين ما كانو لازم يصيرو منسقين لأسباب مختلفة مع انن عندن الثقافة بس بوقتا كانو طائفيين ومارح اذكر اسمائن لأنو مو محطوط اسمائن بالقائمة تبع هالموضوع
وبدي احكي كلمة لأسير وكلمة لماد ماكس انتو التنين كلامكن صح بس طولو بالكن على بعض
وبتمنى من أسير (بما انو عم يحكي لى المكشوف ) او اي عضو عندو معلومات عن اجتماع حمص (الشهير ) يلي صار بشهر 10/2006 وعالم نزلت من الشام وعالم نزلت من حلب وعالم اجت من خارج الاراضي السورية وحضروا هالاجتماع وطلعو بقرار اختيار المنسقين (المشرفين الحاليين ) مو مشان شي بس مشان التاريخ
طبعا انا شفت نتيجة التصويت الحالية وكل شخص صوت حسب رأيو وطيبيعة علاقتو بالمشرف بس يلي مستغربو
كيف ريمي بتختار اسم من زملائها على اساس التجريب ؟
لا والاحلى من هيك بتجي وحدة تانية اسما فوفو بتختار نفس الاسم وقال شو مع انو مابعرفا بس اخترتا ( صراحة شي بشهي والله ) انو مابتعرفيا ليش اخترتيا ؟
وسمعت من كم يوم انو في قائمة عم تتحضر للتنسيق بحب قلن ( مع اني مابعرف جدا منن الا 2 منن ) وخاصة انو القوائم ما طلعت بشكل رسمي بس بقلن الف مبروك بس لا تخلو المناصب تغيركن متل ماغيرت غيركن , ودائما اشتغلو بمقولة (لو دامت لغيرك ماوصلتلك ) هادا الحكي جاية من تجربة شخصية على ارض الواقع وليس في عالم النت
انا طلعت كتير عن الموضوع وبعتذر من صاحب الموضوع
وهلئ ببحبشة سريعة في المنتدى لقيت احد الاعضاء وهو صديق لي انو في الو اكتر من موضوع مثبت بقسم مستلمو صديق الو (صديق صديقي )
(جرى التنويه ) لا اكثر ولا اقل
ومشرف اخر لقيتو بالبحبشة السريعة انو مثبت مواضيع الو بقسمو (بجوز هو معتبرا انو مهمة والله اعلم )
وبدي سلم على بعض الاعضاء هون وبدي قلن
1- حسن : انت اغلى شخص عليي باخوية ومن اغلى الناس بحياتي الواقعية لهيك بقلك حسن حسن حسن لاتتغير وبعرفك شجاع خليك هيك بس عم اسمع عنك اخبار انك متغير شوي وصاير ما عم تقول يلي بقلبك صراحة نحنا عرفناك صريح خليك صريح ويمكن فهمت اصدي
2- سريان انجل : اصيلة
3- جاد : ياريت كلنا عنا شجاعتك
4- ليوبراد : سامحني اني ماودعتك
5 -وائل76: اشتقتلك واشتقت لحوارك
6- الحاج متولي : حبيبنا منشوفك على خير
6- بلاك : الي الشرف اتعرف عليك مع انو ماحكينا كتير واكيد النا قعدة بمعيتك
7- مورنيغ: الى الامام
8- محمد ابراهيم : تأخرت معرفتي فيك يا عمدة حئك عليي
9- مي تو : اشتقنالك
10- مستر سامو : انت بالقلب وطول عمرك وفي
11- كوستا : سلامك وصلني وبكفي اني لسعتني بذاكرتك
12 - سرسورة : كل الاحترام
13 غزوول : قمة الاكابرية
14- صياد الطيور : الك وحشة
وبقلن فلاش باك يحبكم جميعا
وبالنهاية يحضروني القول العظيم وهو
اني ارى رؤس قد اينعت وحان قطافها ..................... كملو انتو الباقي
لهيك بالنهاية لازم ينحل الموضوع من بدايتو مو من النهاية ويكون عنا كلنا الشجاعة وخاصة المشرفين ويقولو كل واحد عن حالو وين اخطأ
وممكن تكون غيبتي كمان طويلة هالمرة بس حسب الخالة اذا كان في داعي للاستنفار متل اليوم اكيد رح تشوفوني مرة تانية
بخاطركن
سلامات