[ويحد سوري]

بالفعل هدوك لي ما بيتسموا فهمانين !!! يعني من بعد رفع هالواسطة عن أغلب السلع لي نحنا مو كتير بحاجة إلها بلشنا نحس ع دمنا و نطلب و ندعي انو الله يغفر ذنوبنا من كتر ما دعينا عليهن , أي يعني الواحد يكون صريح ولو مع حالوا, مثلا: اليوم اذا بدك تاكل سندويشة شاورما لا زم تعد للعشرة لأنو ممكن اللحمة تكون مو لحمة (لأنو موضوع الثقة راح) أو الفروج ممكن يكون من مزارع مكعبات ماجي يعني بيضر لهيك رح ترجع تطلب سندويشة فلافل ولو زاد حقها عشر ليرات (10-20) و بتحس انو صارت بتشبع يمكن نفسيا بتشبع , و بضل صحتك تمام ولو انت مو شايف هالشي (الجماعة هدوك شايفينها ومن زمان) مو الصحة تاج على رؤوس الأصحاء !! . في مثال تاني موضوع السرافيس و زيادة الاجرة يعني سابقا كان في مشكلة اذا طلعت بسرفيس و شفت حدا بتعرفوا يعني بضل تتشارع انت و صاحبك شي ربع ساعة ع دفع الاجرة و مين بدو يدفع عن التاني و بهل الاثناء بيكون الشوفير عم يقول و يسمع حكي : مين اسى ما دفع يا شباب ؟؟ و أما هلق شوف الحل شو سهل اذا طلع حدا بتعرفوا بالسرفيس لا بتحلف عليه ولا بيحلف عليك وما بدك وجعه هالراس كل واحد بيدفع عن حالوا (الجماعة هدوك بيفكروا بطريقة أوربية أو غربية ) أما حضرتك كنت مستلم موضوع النخوة و الكفو و الله حيو و أجو هدوك ليريحوك و يخلصوك من هالعقد و خصوصا إنو صرنا بالقرن 21. (شوف اشقد تعبانين لحتى واصلين لهل النتائج ) ..............الخ
وفي أمثلة كتيرة بس المشكلة إنو الامثلة موجهه للطبقة المترفة(بالفقر) بهل المجتمع و لي مو ناقصها أمثلة هلق اذا لازم نحكي عن مشاكل هدوك لي ما بيتمسوا منوصل لنتيجة إنو مشاكل هدوك من ضغوط التحت و طلباتن و حكيهن لي ما بيخلص ف بالنتيجة لازم لي بياكل فلافل بعشرين ما يعارض أفكار هدوك , لأنو راسوا ما بيستحمل الحكي لي رح يسمعوا من لي بالي بالك....و خصوصا اذا كانو أول طلعتن من طبقة أكيلة (لي بياكل فلافل )الفلافل .
و هيك اذا هدول ما نقوا و هدوك ما سمعوا كل المشاكل بتنحل ...و يقوم البطل بتقبيل البطلة و تغلق الستارة مع بكاء و زغاريد ناتجة عن تداخل المشاعر لانو ما حدا فهم شو صار ....