[..AHMAD]

هوي الموضوع مو بهالأهميّة يللي بتخليني كتير اكترث بخصوصه أو ادايق منّو, بس جد يعني المفروض بدو يكون في شوية تدقيق و مراعاة للغير أثناء النقد .. خصوصاً استخدام مصطلحات النقد .
طبعا النقد وارد و مسموح في هون, و لكن بمكان و وقت مناسبين ...

أولاً ... النقد تشوهت صورتو .. لما صار في محسوبيات لكل كلمة بدها تنحكى ... وما عاد في شي اسمو نقد ... ولو بدي اطلع عن الفكرة الأساسية اللي جاي مشانها انت .. بس بنصحك تتطلع هون بخصوص النقد ... وتشوه صورتو .النقد .. اهمية الفكرة وتردي الاسلوب
ولما بدي اعمل حساب ..لفلان .. ولعلتان.. عالكلمة هي والكلمة هديك .. فـ النقد راحت صورتو الأساسية .. وصار مشوه تماماً .. وما عاد اسمو نقد ..

هلأ بدي احكي عن تجربتي مع المنسّق AHMAD يللي و حياة الله ما بعرفو و مافي عندي كمان أي رغبة بمعرفتو
صار في تواصل لمرّة بيناتنا بخصوص تعديل معنى لكلمة انكليزية هوي باعتقادو كانت صح .. فقمت راسلتو و بيّنتلو الصح من الغلط .. هاد باختصار يللي صار بيني و بينو من أول ما دخلت هون ..

بخصوص الكلمة .. فـ عراسي .. وانت معلمي .. وممنونك انا ..

بحياتي ما تناقشت معو بموضوع أو حتى بأفكار .. كمان ما بظن الشب بيدخل على المواضيع يللي أنا بشارك فيها

في شي اسمو نظرة عامة... مو ضروري اعرفك واخد فكرة عنك من خلال نقاش دار بيني وبينك .. متلك متل اي شخص .. قابل لأني حبو من نظرة عامة عمشاركاتو .. وممكن اني امتعض منو .. كمان من مشاركاتو ... بدون ما نحكي مع بعض أي حرف
يعني انت هون .. عندك رأي .. فكر ... مبدأ .. منطق ... وجاية عمتطرحو .. او عالقليل عمتطلعنا عليه .. انا هالــ أشيا الي عمتطلعنا عليها وتطرحها .. قابلة للاعجاب .. وقابلة لعدمو .. فلذلك ... مو كتير ضروري ... انو كون متناقش معك لحبك او اكرهك..

من هالمنطلق بدّي قول:

موضوع المقلاية موضوع كتير حلو و مهضوم و بيعمل تواصل بين الأعضاء .. ما بظنّو موضوع لنقد الآخرين أو مُتنفس للبعض ليحطو آراهن بأفكار الآخرين بطريقة نقدية ساخنة .. يعني بصراحة المقلاية بتجمع الكل للتعارف و التصواصل أكتر .. بس ما بظن المفروض ينكتب فيها شيئ يعمل على زرع تنافرات و تناحرات و ضغينة

بالنسبة لموضوع المقلاية...
موضوع المقلاية ... هوي عبارة عن سؤال وجواب .. مش أكتر ..
لا هو .. للنقد ... ولا للمدح .. ولا لسب .. ولا لكولك .. لفلان وعلتان
اما بالنسبة لزرع التنافرات والتناحرات والضغينة .. فـ هاد بيرجع للشخص ازا بيتقبل النقد او المزح او تلطيش الحكي او او او الخ ) أو لاء .

الكلام متل السيف .. هيك برأيي أنا و لكن في حال استخفاف الكلام و عد اعارتو أهمية فأكيد رح يكون متل فقاعة الصابون يللي رح تتلاشى بفراغ ما .. أنا هيك صار معي بخصوص تعليق المنسق AHMAD يللي كتب هيك
اقتباس:
التقرير الجوال
بصراحة !!! ما مستهضمو كتير ... معلاق مو ؟ اي مو ونص
الحقيقة أنا اندهشت كتير لمّا قريت التعليق .. و فكرت بأنو شو القصة يعني الشب بعلمي ما بيدخل على مواضيع اجتماعية كتير أو حتى دينيه!

هلئ هون المشكلة فيني ... لما حب واحد ... ما رح اتباطأ بقول هالشي...
ونفس الحال لما ما حب حدا ...
مشكلتي .. انو ما بقدر مسح جوخ .. او كذب عليك .. او كذب على حالي ... لأنو ببساطة ..
متل ما انطرح اسم لشخص بيهمني .. وذكرت هالشخص انو بيهمني وبحبو
انطرح اسمك ... وبكل بساطة عطيت انا وجهة نظري فيك .. الفكرة العامة اللي اخدتها عنك .. خلتني ما استهضمك
انو يعني قلك بحبك وانا مو حابّك ؟ ما عمتزبط معي .. ولا رح تزبط!
لأنو ببساطة ما بقدر قول لواحد بحبك ما بحبك .. مراعاة لشعورو مثلاً .. اعكس الحالة .. فـ نفس الشي

جد يا شباب يعني بحياتي ما عرفتو إلا لمّا صار منسق لنو تغير لون اسمو و صار مميز عن البقيّة.

هون هي النئطة انو كان عضو ومافي منو ... وصار منسق .. ,الله بزاتو ما بيحكي معو.... بتمنى ما عاد تنذكر .... نهائياً ... لا هلئ ... ولا بعدين .. ولا حتى بعد مليون سنة...

كتابتي للموضوع هون بدي من العاملين المسؤلين عن الموقع بيتفهمو صح .. أنا ما عم اعرض شكوى و لكن عم اعرض ظاهرة تقريبا عم بستخدمها البعض .. استخدام حق النقد و لكن بأسلوب فض .

برجع بكرر .. لما النقد يصير فيه محسوبيات .. ما عاد نقد

للحقيقة أنا ما كتير اكترثت برأي الشب عنّي و كمان ما بدي تقييم بس, يا حبّذا إذا صار في تقييم بدو يكون بأسلوب أرقى من هيك لأن الكلام مراية بتعكس شخصيات البشر ..

طيب ولا يهمك ... بحال تاني مرة ... حبيت انقدك .. بحاول اني كولك شوي ومسح جوخ واعمل محسوبيات .. لشوه صورة النقد .. كرمال الرأي العام ما يزعل مني وعليي .

انت فيك توصف رفيقك بكلمة من باب الدعابة و هاد من حقذك أما بتقيم انسان بكلمة غليظة! فما بظن رح تكون مقبولة من أي باب جاية هالكلمة ..
المنسق بعتلو عالخاص و جد ما كان ببالي اكتب أو حتى رد على تقييمو و قلتلو انو يا أخي والله عيب هيك استخدام كلمات اذا بدك تنقد البشر .. يعني مو لازم في مراعاة لأي كلمة بتكتبها

طيب بعد اذنك .... عطيني مرادف للكلمة التالية ..
معلاق = ؟؟؟
ما مستهضمو = ؟؟؟
لحتى عدل الرد .. واعتذر منك قدام هالبشرية .. كونو انا ارتكبت غلط فاحش ..ويمكن كفرت!

يللي بعرفو بانو الكلام لازم يكون غالي و بدها الكلمة دراسة قبل ما تطلع من التم .. هيك تعلمنا..
طيب الشب رد على رسالتي هيك
اقتباس:
اول شي .. مية هلا ...

تاني شي ما صار حديث بيناتنا ... بس كـ نظرة عامة ,,, حكيت اللي شفتو ...

تالت شغلة ... انا مو مشان موضوع تصحيح كلمة الانكليزي اخدت هالنظرة عنك .. بس عمقلك كنظرة عامة من مشاركاتك .. يعني انطباع عام

تالت شي .. ماحكيت حكي طالع نازل ... بقا يمكن هي الكلمة بقلك ياها هلئ الك

رابع شي .... وحياة عينك محترم حالي ومحترم الكل .. ما بدي حدا ينبهني عالاحترام

وخامس شغلة ... بيؤسفني ازا دايئتك صراحتي .. بس ما بئدر اضحك عحالي .. ولا بقدر جامل ..

ويا مية مية مية هلا من جديد
قلتلو برسالتي يعني كان المفروض بيكون في شوية احترام باختيار الكلام .. عالقليل لينقبل الكلام بأسلوبو النقدي ..
على فكرة ... انا هون رح اتغاضى وجداً عن نقل البرايفتس ... عالعموم ..
كونو برأيك انا غلطان بحقك
وانا هلق برأيي انت غلطت بحقي وزيادة
فـ ممكن نكون 1-1


و جد ما بعرف كيف طلع معو يقول بيؤسفني اذا أنا دايقت من صراحتو و كمان ما بيقدر يضحك على حالو ..
شايف الشب عن يحكي عن حالو كتير و هاد من حقّو بس
جد ياشباب و أنا هون عم خاطب الموجهين بالموقع بأنو ياريت تعيروا هالنقطة اهتمام أكتر ياريت قبل ما تختاروا تتوسعو بدراسة الأعضاء أكتر ..
بدي كفّي كلامي مع المنسقAHMAD
قلتلو إذا ردي رح تقرأه بالمقلاية قام رد هاد الرد
اقتباس:
عفكرة.. ما رح قلك مشان الله لا ترد بالمقلاية
وهات ايدك لبوسها
ويستر على عرضك
ودخيل رجلك

بس ازا شفت انو ردك مالو علاقة بالمقلاية كلها ... فـ ببساطة يعتبر سبام ..

بقا ازا بدك ترد .. يفضل انو تراعي الرد ما يكون سبام .. مشان اكبر شريحة من العالم تقدر تطلع عليه

ويسلمو مسبقاً ها .!.

شايفين هاد الرد!!!
هاد خلاني غيّر فكرة انو رد عليه بالمقلاية أو حتى أعير نقدو أي اهتمام, جد يا أخي الناس مو بالعادة تحكي هيك
بالنهاية الموضوع اذا حبيتو لايجاد حل لظاهرة بيجوز غير مستحبة و هي استخدام النقد بأسلوب همجي
ما تآخذوني بالكلمة بس ما لقيت كلمة بتعبر غير هي .
أما عنّي فجد أنا مو من أي نوع بيحب يعمل استعراضات و كتابة شكاوي و هيك بس جد القصة لازمها انتباه و اعادة دراسة و تقييم بعض الشخصيات يللي المفروض تكون شخصيات عاملة على التوجيه .

!!!!
هلئ لقلك شغلة ....
تأكد تماماً ... لما قلتلك هالجملة انا بالموضوع... قلتها بصفتي احمد ... وبصفتي عضو من أخوية .. مو بصفتي منسق ...
وتأكد تماماً .. .بعرف حالي شو حاكي .. وبعرف ليش حاكي ...
وتأكد تماماً .. انو اخر شي بالحياة ممكن يحصلي ... انو يجي أي شخص .. يقيمني ... ويعملي "إعادة تأهيل"... لأنو هاد انا .. وتقبلني على حالي ... لأني ما رح اتغير

وبالنهاية ... بدي اعتذر عن هالطريقة الي حكيت فيها هلق ... كونك تعرضت لمسألة شخصية .. قدام العموم ... فـ من حقي احكي بهالطريئة


طيب اذا مطلوب تعليق من الادارة رح رد أنا (التأخير ناجم عن عدم وجود حدا من الادارة يوم أمس لأسباب سفرية)

اداريا مافيني اتدخل.. هو الموضوع فيو لمسة لاذعة من حيث انو الواحد يحكي هيك دج (هو هاد اللي مكيفين عليه الشباب الطيبة ) و على مدى خمس مقلايات (و هاي السادسة) كل اللي مرو فيها أكلو شي توصيف من هالنوع أو أسوء حتى.. مني و هيي طالعة ... بعتقد انو مانو أمر كبير أهمية خصوصي انو عم تقول انو جاي من شخص لا بتعرفو و لا جاي ع بالك تعرفو.. فيعني أبتفرق..

كرأي شخصي و بمعرفة الحيثيات لو أنا مكانو ما بحط هالكلمة.. و غالبا ما كنت رح حط شي لأنو ماني متأكد انو الطرف التاني ممكن يتقبل اللمسة اللاذعة من الموضوع..

لذلك هلأ نلغي القطّاع اللي عمل المشكل.. و نلغي اسم "التقرير الجوال" من هالموضوع.. هاد حقك.. ما حدا مجبور يشارك أو يتشارك باسمو ازا ما بدو...


و ياهلا

المشكلة ياس .. انو اسمو انطرح .. لاوصفو بكلمتين ... ولو بتلاحظو انو انا حطيت ردي بعد بـ 4 ساعات من طرح السؤال.. كوني ما كنت موجود .. وطالما التقرير الجوال مطلّع عالموضوع .. كان فيه يقدم اعتراض انو يا عمي شيلو اسمي من القائمة ... مابعرف هالشخص ولا بيعرفني ... بس كونو اسمو انطرح .. وما شفت منو اعتراض قبل الاجابة .. فـ من كامل حقي .. اني احكي... بغض النظر عن الحكي ان كان مدح او ذم..

دايه بحب قلّك انو من الممكن يكون أحمد ما شاف الموضوع انّو موجه اله لذلك ما رد لانّه اساسا ما شاف الموضوع مش بالضروره اهمال او ما اليه لكن مافي شي بالعنوان بـيوحي ان يكون الموضووع موجه لاداري معيّن و بذلك يمكن ما اطلع عليه اصلا ..

وفعلاً .. انا هلق لانتبهت للموضوع ... كوني بني ادم وباكل وبشرب وبنام وبدرس وبشتغل .. وماني فايق نايم بأخوية لأسهر على حماية الشعب ... وتلبية متطلباتهم .

النقد اجـمالا هو فـن قادر على جـذب الناس للسلـبيات ضمن العمل و مـش صحّي انّه يكون سـاخر بكل الاحوال لكن ببعض الحالات كونو بيـفقد هـدفه على ذلك , لكن ايضا بحـاجه للـسخريه لتوصيل الفكره احـيانا كونها ما ممكن تـصل بذات الطريقه او ممكن تكون حادّه لو ما لبـستها روح ممن الـسخريه ..

طبعا هاد الحكي عن النـقد اجـمالا مش عن حكـيك الموجه للمـنسق احمد , فيما يـخص احمد انا مش رح بجاوب عنّه تماما لانّه قادر يجاوب عن نفسه لكنّ بتخيّل ان المقلايه تحـديدا فـيك تفوت هلـئ و تلقي نظره تانيه عن طبيعه الاسئـله فيها و الاجوبه ايـضا .. المـقلايه هي لعبـه مرحه سـاخره اكيد مش كل شي بينقال فيها متل اللي عم ينقال بمـوضوع حوار جدّي و فاهمه انّ قـصدك مش بس عالمقلايه لكن طرحك بهالموضوع بيتناول مثال المقلايه فقـط ..
عن أحمد فمـا بتخيّل يكـون قـاصد يجرحك او قـاصد يزعجك شـخصيّا كونو مافي بينك و بيـنه علاقه كافيه تخـليه يكرهك - او يحبّك - لكنّه قال رأيه بطريقه مزح و سخـريه طبـعا من حقّك تعاتبه على ذلك لكن ما بتخيّل الاداره بتقدر تاخد بحقّه ايّ اجراء كونو بالمقلايه صـار الحديث و المقلايه هيّ المكان اللي بكون فيه الـعضو - او الاداري يعني - عم ينـشوو و طالعه ريحتهم و نـازلين تقفيـل و مزح و ما اليه ليروحو عن نفـسهم

تماماً ...
من حقو يعاتبني
ومن حقو يساوي اللي بدو ياه ...
بس بيني وبينو ...
بس من بعد اول برايفت.. لما يقلي انو الرد حكيون بالمقلاية ... شي طبيعي انو يصير عندي نوع من الـ لا اهتمام .. كونو اجت بنوع من التهديد والتوعد ..
فـ بالنسبة الي كانت بما معناه .. مش فارقة معاي .... لأنو بحياتي ما انحطيت بموقف تهديد محرج .... ولا رح اسمح اني انحط فيه .
كمان بالاضافة لأنو الادارة او اي شخص ما بتقدر يعمل شي .. كونها مسألة شخصية ..

كمن فسّر الماءَ بالماءِ .. عزيزي أنا طلبت منّك تلغي اسمي؟ و على افتراض .. أنا ما طلبت هيك و إذا لاحظت, أنا حكيت عن ظاهرة و هي الأسلوب المتّبع بالنقد .. يعني انت فيك تعمل توجيه بأنو النقد بدّو يكون بأسلوب و أصول بحيث ما بيتعدّى حدوده المألوفه ..
بكل الأحوال أنا بدّي من المنسق يجي و يجاوبني شو يللي خلاه ينعتني هالنعت؟
تانياً أنا ما بدي اعرفو و هاد من حقّي بس كمان ما بدي منّك تستخدم كلامي هاد بحل المشكلة, بظن هوّي تعدى
و الحل ما بدّو يكون هيك برأيي .. و باعتبار الأمر مو كتير مهم بس الحاصل صار في تعدّي و أنت نفسك سميتو دج حكي ..
هلأ أنا من حقي رد عليه!
بعدين إذا مافي علاقة أو تواصل كيف سمح لنفسو هيك, هي النقطة يللي بدي منك تعالجها.

كل النقط الي طالب مني توضيح ... توضحت بالنص السابق .. !


أي أخي كيف سمح لنفسو .. الناس بتختلف و أنا ما عم هوّل الموضوع و إذا بدّك تشوف انطباعك أو انطباعو هوي
فبدي اسمح لنفسي ابدي رأيي في بناءاً على ما قال ..

أنا شايف بأنها وقاحة منّو الطريقة يللي اتبعها بابداء رأيو فيني .. و اذا دلّت على شيئ فأكيد بدل على تخلف حضاري .
شو رأيك هلأ .. أنا كمان بيطلع معي كلام.

متل ما أنا حكيت .. انت بتحكي .. وبتضل آراء شخصية .. وحتى لو بتمسنى .. من حقي عاتبك .. بس مو من حقي حاسبك ... وهاد الي عميصير

بتمنى تكون وصلت الفكرة "بالمجمل"

كوني شرحت كل ما يمكن شرحو بخصوص هالموضوع .. وازا في اي استفسار تاني .. فـ نحنا هنا وازا وصلت الفكرة وما عاد في شي .. بتمنى منك تغلق الموضوع ..