[الموسيقار]

كاتب النص الأصلي : خيالات واوهام

هادا رد يدعو للإحباط 7 قرون!!!!؟؟؟؟ في عدة أمثلة بتقول أنو حكيك غلط. أسبانيا كان بيحكمها فرانكو وبعد وفاتو كان في ارادة شعبية للتحول للديمقراطية وهيك كان. نفس الحكي البرتغال. ألمانيا كان بيحكما ديكتاتور دموي هو هتلر وهلق من اكثر الدول تطورا بالعالم وإيطاليا كل هل الدول كانت ديكتاتورية بمطلع القرن العشرين.

كمان مثالين بيثبتو ان الديمقراطية بتصلح بالدول الإسلامية عنا جارتنا تركيا وأندونيسيا، هلق رح تقلي ديمقراطية العسكر بتركيا ومشاكل الحجاب ومذابح الأرمن بقلك أنا رضيان بربع ديمقراطية تركيا.

سوريا قبل البعث كانت من اكثر الدول العربية ديمقراطية. إنقلابات عسكرية كتيرة مظبوط بس كمان كان دولة مؤسسات كان فيها البرلمان برلمان عن جد، وكان كلشي معقول (رغم كثير من العيوب والأخطاء). الخطأ الأكبر كان الوحدة مع مصر لأنو كان أول حكم شمولي في سوريا بعد الإستقلال واجت فترة الانفصال وكان فيها قدر معقول من الحرية حتى اجا البعث علحكم.

ما بدنا ديمقراطية متل فرنسا بس عل الأقل ما يزتو رجال متل ميشيل كيلو أو رياض سيف بالحبس منشان رأي أو اعتراض على فساد رامي مخلوف.

ما بدنا ديمقراطية كاملة بس ما بدنا يتعذب المعتقلين السياسيين والجنائيين ويموتوا تحت التعذيب.

انو نكون دول عالم تالت ما في شي بيمنع انو يكون عنا معارضة لأنو المعارضة هو أمر طبيعي وحي لأي نظام حكم مهما كان مثالياً. واذا مفكر انو الأوربيين كلون مثقفين ومفكرين كتير غلطان. الأوربيين والأمريكان معظمون ما بيفكرو الا بالسهر والشرب والجنس وجزء منون بالمخدرات. بس ناجحين لآنو بس يلاقوا زلمة فهمان متل ميشيل كيلو او عارف دليلة ما بيحبسو علعكس بيستفيدو منون لأقصى حد وبيأمنلون الجو المثالي حتى يعطو اكتر. هنيك كل المناصب بتتوزع حسب الكفاءة والخبرة العملية مو حسب الانتماء الحزبي والقرب من الأجهزة الأمنية.

منبدا منفصفصهم وحدة وحدة ..

اسبانيا كانت قبل فرانكو ديمقراطية .. ومؤسسة ع هالأساس .. اجا فرانكو غير السيستم .. فترة قصيرة بعدين رجعت الامور .. لطبيعتها .. يعني القاعدة كانت الديمقراطية المبنية .. ومأسسة منيح .. والاستثناء هو فرانكو ..

ونفس الشي بالنسبة لهتلر الحزب النازي .. كان طفرة مو أكتر .. خلصت بانتهاء الحرب العالمية التانية ..

ورجعت القاعدة التطويرية الكبيرة .. تسيطر بعد ما راح هتلر .


أما بالنسبة لتركياا .. ف هي حالتا كتير خاصة ..

أنت ما بتعرف أنو العناية الثقافية اللي أولتا الامبراطورية العثمانية لآسيا الوسطى كانت رهيبة ؟ على خلاف الدول العربية اللي كانت محتلة من قبل الدولة العثمانية .. كان من مصلحة الدولة العثمانيةة أنو أقاليم بلاد الشام والرافدين وشبه الجزيرة يضللو متخلفين ليسها التحكم فيهون .. أربعميت سنة من التعمية المستمرة .. ما ساوت تخلف ؟ ؟

بعد صارت حركة أتاتوركـ وتعلمنت الدولة اجاها تيارات كانت عم تجي أصلا ً من البلشفية .. والراسمالية عملت تزاوج حضاري رهيب ..


هاد كلو ما صار عندنا ..

أنو نكون دول عالم تالت .. شي بيمنع قطعا ً أنو نتبروظ بكلمة ديمقراطية لأنو القصة كتير مكلفة ..

وكتير بدها ناس .. واعيين لمووضوع أنو صوتهن ممكن يغير يعني خليني قللكـ كلمتين ..

عطيني تجربة ديمقراطية عربية ناجحة .. وأنا مستعد اتوفى هلق . .