[خيالات واوهام]

كاتب النص الأصلي : الموسيقار

هلأ بتصدق أو ما بتصدف قرأت ردكـ بعناية .. بالغة ..

وكلامكـ .. كتير جميل وأكتر من صحيح.. هلأ القصة اللي صارت أنو انا انحرفت (غصب عني) عن الغاية الأساسية بالموضوع .. والسخرية اجت من أحلام وردية ما بتمت للواقع بصلة ..

هلأ خليني بـ ردكـ اللي كان موضوعي كتير .. وشامل للجوانب اللي أنا بشوفها أنها مثالية لتحل كل مشاكلنا .

أنا معكـ بأنو الكاتب المسرحي اله أثر كبير بالنهوض الاجتماعي.. بس كمان القصة لازم تاخد مداها الزمني اللي كل الأمم أخدته ..

يعني .. أوروبا لصارت أوروبا ضللت تكح بالقتل والدم .. وملاحقة أصحاب الرأي واللي حاولوا يتمردوا عالكنيسة أكتر من سبع قرون ..


لحتى تبلور .. الفكر اللي حيد الكنيسة والانتماءات عن التعاطي السياسي .. و كان في بهالسبع قرون نهضة على جميع الأصعدة ثقافية .. واقتصادية .. عسكرية .. وبعدين وصلوا للسياسية ..

فرنسا احتاجت 4 جمهوريات لتبلور شكل الجمهورية الحالي .. صح ولا لأ؟

كانت كل ثورة .. تستوجب ثورة لتصلح أخطاء الثورة اللي قبلها .. حتى كتير من الناس اللي استلموا الدولة الفرنسية ديمقراطية نوعا ً ما .. نصبوا حالهون اباطرة بعدين .. متل نابليون وكلنا منعرف قصتو كيف صار امبراطور ..

بس تشارل ديغول لما شاف أنو تبلورت التجربة الديمقراطية .. وشاف الشعب الفرنسي أنضج من انو ينضحكـ عليه ما قدر يمشي كلمتو عالشعب الفرنسي.. وقال كلمتو الشهيرة ..
(يحرجني الشعب الفرنسي بحضارته كلما أردت أن أستبد بـ رأي)

طيب .. ؟ نحن وين من هالحكي ؟

كيف بدنا نطلب من دولة عالم ثالث يكون فيها معارضة وموالاة .. وحكم ديمقراطي . .وما يكون فيها معتقلين سياسيين ؟
نحن أنبياء لحتى نقفز المراحل اللي ضلت أوروبا تكح فيها سبع قرون ؟

جاوبني.. ازا ممكن .

هادا رد يدعو للإحباط 7 قرون!!!!؟؟؟؟ في عدة أمثلة بتقول أنو حكيك غلط. أسبانيا كان بيحكمها فرانكو وبعد وفاتو كان في ارادة شعبية للتحول للديمقراطية وهيك كان. نفس الحكي البرتغال. ألمانيا كان بيحكما ديكتاتور دموي هو هتلر وهلق من اكثر الدول تطورا بالعالم وإيطاليا كل هل الدول كانت ديكتاتورية بمطلع القرن العشرين.

كمان مثالين بيثبتو ان الديمقراطية بتصلح بالدول الإسلامية عنا جارتنا تركيا وأندونيسيا، هلق رح تقلي ديمقراطية العسكر بتركيا ومشاكل الحجاب ومذابح الأرمن بقلك أنا رضيان بربع ديمقراطية تركيا.

سوريا قبل البعث كانت من اكثر الدول العربية ديمقراطية. إنقلابات عسكرية كتيرة مظبوط بس كمان كان دولة مؤسسات كان فيها البرلمان برلمان عن جد، وكان كلشي معقول (رغم كثير من العيوب والأخطاء). الخطأ الأكبر كان الوحدة مع مصر لأنو كان أول حكم شمولي في سوريا بعد الإستقلال واجت فترة الانفصال وكان فيها قدر معقول من الحرية حتى اجا البعث علحكم.

ما بدنا ديمقراطية متل فرنسا بس عل الأقل ما يزتو رجال متل ميشيل كيلو أو رياض سيف بالحبس منشان رأي أو اعتراض على فساد رامي مخلوف.

ما بدنا ديمقراطية كاملة بس ما بدنا يتعذب المعتقلين السياسيين والجنائيين ويموتوا تحت التعذيب.

انو نكون دول عالم تالت ما في شي بيمنع انو يكون عنا معارضة لأنو المعارضة هو أمر طبيعي وحي لأي نظام حكم مهما كان مثالياً. واذا مفكر انو الأوربيين كلون مثقفين ومفكرين كتير غلطان. الأوربيين والأمريكان معظمون ما بيفكرو الا بالسهر والشرب والجنس وجزء منون بالمخدرات. بس ناجحين لآنو بس يلاقوا زلمة فهمان متل ميشيل كيلو او عارف دليلة ما بيحبسو علعكس بيستفيدو منون لأقصى حد وبيأمنلون الجو المثالي حتى يعطو اكتر. هنيك كل المناصب بتتوزع حسب الكفاءة والخبرة العملية مو حسب الانتماء الحزبي والقرب من الأجهزة الأمنية.